Uyu muhanda ni wo uzajya uberaho isiganwa rya Formula 1 African Grand Prix, biteganyijwe ko rizatangira kubera mu Rwanda mu ntangiriro z’imyaka ya 2030, nyuma y’uko ku wa 13 Ukwakira 2026 hatangajwe amasezerano y’imyaka 10 yo kuryakira.

Ni amasezerano azatuma Formula 1 igaruka ku Mugabane wa Afurika nyuma y’imyaka isaga 30, kuko isiganwa rya nyuma ryahabereye mu 1993, kuri Kyalami Circuit muri Afurika y’Epfo.

U Rwanda ruzaba igihugu cya gatatu muri Afurika cyakiriye isiganwa rya Formula 1 kuva iri rushanwa ryatangira mu 1950, nyuma ya Maroc yaryakiriye mu 1958 na Afurika y’Epfo.

Nubwo kwakira iri siganwa byamaze kwemezwa, umuhanda rizaberaho nturubakwa. Imirimo yo gutegura igishushanyo mbonera cyawo iracyakomeje, ndetse n’itariki nyayo y’isiganwa rya mbere ntiratangazwa.

Gusa hari amakuru y’ibanze yamaze gushyirwa ahagaragara agaragaza aho uzubakwa, imiterere yawo, ibizaba biwugize n’uburyo uzakoreshwa no mu bindi bikorwa bitari Formula 1.

Umuhanda wa F1 African Grand Prix izajya ibera mu Rwanda, uzubakwa mu Karere ka Bugesera

{{Umuhanda uzubakwa he?}}

Umuhanda wa Formula 1 uzubakwa mu Karere ka Bugesera, mu bilometero bigera kuri 40 uvuye mu Mujyi wa Kigali, hafi y’Ikibuga Mpuzamahanga cy’Indege cya Kigali gishya kiri kubakwa muri ako karere.

Iki kibuga cy’indege giteganyijwe gutangira gukora mu ntangiriro za 2028, bikazafasha mu kwakira abantu bazajya bitabira amasiganwa ya Formula 1 n’ibindi bikorwa bizajya bibera kuri uwo muhanda.

Mu guhitamo aho umuhanda uzubakwa, abawushushanya bashyize imbere imiterere y’ubutaka bwaho, by’umwihariko imisozi n’ikiyaga cya Kidogo kiri hafi y’ahazashyirwa uyu mushinga.

Bateganya kubaka umuhanda unyura hagati y’imisozi ibiri, ukazajya ugira ibice bizamuka n’ibimanuka, aho abashoferi bazajya basiganwa bitegeye ikiyaga n’imiterere yihariye y’aka gace.

Alex Wurz, wahoze atwara imodoka za Formula 1, ubu akaba ari umwe mu bashinzwe gushushanya uyu muhanda, yavuze ko mbere yo guhitamo Bugesera hari haratekerejwe ku handi hantu hatandukanye, harimo no kubaka umuhanda unyura mu mihanda isanzwe ikoreshwa n’imodoka.

Nyuma yo gusura Bugesera, basanze imiterere y’aho hantu ibaha amahirwe yo gukora umuhanda wihariye badakeneye guhindura cyane imiterere y’ubutaka.

Wurz yasobanuye ko imisozi ibiri n’ikiyaga cya Kidogo kiri hagati yayo ari byo byatumye babona ko aho hantu habereye uyu mushinga.

Uyu muhanda urimo gushushanywa ku bufatanye bw’ikigo Tilke Engineers and Architects cyo mu Budage, cyari gihagarariwe na Carsten Tilke, na WurzDesign cya Alex Wurz.

Tilke ni ikigo kizwi mu gukora imihanda ikoreshwa mu masiganwa y’imodoka, kikaba cyaragize uruhare mu mishinga itandukanye irimo umuhanda wa Sepang International Circuit wo muri Malaysia.

U Rwanda rwahawe kwakira Grand Prix ya Formula One kuva mu 2030

{{Uzaba ufite uburebure bwa kilometero 6 n’amakona 17}}

Igishushanyo mbonera kigaragaza ko umuhanda wa Formula 1 uzubakwa mu Bugesera uzaba ufite uburebure bw’ibilometero bitandatu n’amakona 17.

Uzaba ufite ibice birambuye imodoka zishobora kwihutiraho cyane, ariko ukagira n’ibindi bisaba abashoferi kugabanya umuvuduko no gukata mu buryo bwitondewe.

Kimwe mu bice byawo kizaba ari inzira igororotse ifite uburebure burenga kilometero imwe. Nyuma yayo hazaba hari igice gisaba abashoferi kugabanya umuvuduko cyane mbere yo gukata.

Abawushushanya bavuga ko iki gice kizajya giha abashoferi amahirwe yo kunyuranaho, kuko imodoka zishobora kugera ku mpera y’inzira igororotse zifite umuvuduko mwinshi, mbere yo gufata feri.

Carsten Tilke yasobanuye ko intego yabo ari ugukora umuhanda uzajya usaba abashoferi ubuhanga mu gutwara, ariko nanone ugatuma amasiganwa arushaho kuryohera abayareba.

Ikindi kizawutandukanya n’indi mihanda myinshi ya Formula 1 ni imiterere y’aho uzubakwa.

Mu gihe imodoka izaba izenguruka umuhanda wose, izajya inyura mu bice bifite impinduka z’ubutumburuke zigera kuri metero 197.

Ibi bivuze ko abashoferi batazajya basiganwa ahantu hahanamye kimwe, ahubwo bazajya banyura mu bice bizamuka, ibimanuka n’amakona amwe ateye ku buryo uruhande rumwe rw’umuhanda ruba ruri hejuru y’urundi.

Iyi miterere ishobora gutuma abashoferi barushaho gukoresha ubuhanga mu kugenzura umuvuduko, gufata feri no kuyobora imodoka mu makona.

Umuhanda kandi uzajya uzengurukwa mu cyerekezo kinyuranye n’icyo urushinge rw’isaha ruganamo, kizwi nka ‘anti-clockwise’.

Wurz yagaragaje ko imiterere yawo izatuma imodoka zigenda zizamuka kandi zimanuka, ku buryo gutwara kuri uyu muhanda bizaba bitandukanye no gusiganwa ahantu harambuye.

Umuhanda wa Formula One wubakwa witondewe ku buryo ufasha imodoka kunyuranaho byihuse kandi hitawe ku mutekano

{{Ni ibihe bipimo bisabwa umuhanda wa Formula 1?}}

Kubaka umuhanda wa Formula 1 ntibisaba gusa gushyiraho kaburimbo imodoka zishobora kunyuraho zihuta.

Bitewe n’uko imodoka zikoreshwa muri aya masiganwa zishobora kurenza umuvuduko wa kilometero 300 ku isaha, imihanda yazo itegurwa hitawe cyane ku mutekano w’abashoferi, abakozi b’amasiganwa n’abafana.

Umuhanda wo mu Bugesera uzubakwa hakurikijwe ibipimo bya FIA Grade 1, ari cyo cyiciro cy’impushya z’imihanda zemerera kwakira amasiganwa ya Formula 1.

Ibi bisaba ko umuhanda uba wujuje ibisabwa mu bijyanye n’imiterere y’amakona, uduce two kugabanyirizamo umuvuduko, ahantu imodoka ishobora kunyura igihe ivuye mu muhanda w’isiganwa, inkuta n’ibindi bikoresho by’umutekano.

Ugomba kandi kugira uburyo bwo gutabara mu gihe habaye impanuka, inyubako zifasha mu kuyobora isiganwa n’ibindi bikorwaremezo bikenerwa mu marushanwa mpuzamahanga.

Mbere y’uko umuhanda mushya wemererwa kwakira Formula 1, FIA ibanza gusuzuma igishushanyo mbonera cyawo, igakora isesengura ry’umutekano, ndetse ikazawusura umaze kubakwa kugira ngo igenzure niba wujuje ibisabwa.

Ku bw’ibyo, nubwo hari ibipimo by’ibanze byamaze gutangazwa ku muhanda wo mu Bugesera, igishushanyo cyawo cya nyuma n’ibindi bisobanuro bya tekiniki biracyategerejwe.

Ku wa 13 Ukwakira 2026 ni bwo byemejwe ko u Rwanda ruzakira Formula One mu gihe cy'imyaka 10 kuva mu 2030

{{Aho imodoka zizajya zihagarara n’ahazakorera amakipe}}

Mu bikorwaremezo bizajya bifasha mu mikorere y’uyu muhanda harimo ahazwi nka pit lane, aho imodoka zishobora kunyura zivuye mu isiganwa kugira ngo zihagarare gato zikorerwe ibikorwa nk’ihindurwa ry’amapine.

Mu masiganwa ya Formula 1, icyo gikorwa cyo guhagarara no gukorerwa imodoka cyitwa pit stop.

Mu gihe cya pit stop, abakozi b’ikipe bashobora guhindura amapine y’imodoka mu masegonda make, ubundi umushoferi agasubira mu isiganwa.

Ibi bikorwa bibera mu gice cyihariye gitandukanye n’umuhanda nyamukuru imodoka ziba zisiganiraho, kugira ngo amakipe akore akazi kayo mu mutekano.

Hazaba kandi inyubako zikoreshwa n’amakipe, aho abashoferi n’abandi bakozi bakorera, ndetse n’ahagenewe gutunganyiriza no kubika ibikoresho by’imodoka.

Carsten Tilke yavuze ko inyubako zo muri ako gace zizubakwa hakurikijwe imiterere y’ubutaka, kandi zikagira isura ishingiye ku myubakire n’umuco Nyarwanda.

{{Hazajya hakirwa abafana bagera ku bihumbi 100}}

Uretse kuba umuhanda ugomba gufasha abashoferi gusiganwa neza, abawushushanya banatekereza ku buryo abafana bazajya bakurikira amasiganwa.

Imiterere y’imisozi ibiri iri ahazubakwa umuhanda izatuma haboneka ahantu hameze nk’ibibuga by’abafana byaremwe n’ubutaka ubwabwo, ku buryo bamwe bazajya barebera amasiganwa bari ahirengeye.

Ibi bizafasha abafana kubona imodoka mu bice bitandukanye by’umuhanda, aho kurebera gusa ahantu hamwe.

Umuyobozi Mukuru w’Urwego rw’Igihugu rw’Iterambere (RDB), Jean-Guy Afrika, yatangaje ko iyi nyubako izaba ifite ubushobozi bwo kwakira abantu bagera ku bihumbi 100.

Uretse ibibuga by’abafana, hateganyijwe n’ibindi bikorwaremezo bizajya bifasha mu kwakira abashyitsi, abakinnyi, abakozi b’amakipe n’abandi bazajya bitabira ibikorwa bitandukanye.

{{Umuhanda ntuzajya ukoreshwa na Formula 1 gusa}}

Nubwo umuhanda uzubakwa mu Bugesera uzaba ugenewe kwakira rimwe mu masiganwa akomeye ku Isi, intego si uko uzajya ukoreshwa gusa mu minsi mike Formula 1 imara mu Rwanda.

Ahubwo uteganyijwe kuba igice cy’ahantu hanini hazajya habera ibikorwa bya siporo, ubukerarugendo, ubucuruzi n’imyidagaduro umwaka wose.

RDB yatangaje ko hazajya habera ibindi bikorwa birimo ibitaramo, imurikagurisha, inama n’andi marushanwa yo gusiganwa mu modoka.

Hazaba kandi umuhanda wihariye w’imodoka nto zo gusiganwa zizwi nka karting, zikoreshwa cyane mu gutangira kwigisha abakiri bato gutwara imodoka zo mu masiganwa.

Mu bindi biteganyijwe harimo ahazajya higishirizwa gutwara imodoka, aho abakunzi b’imodoka bazajya bashobora kuzikoresha mu bikorwa bitandukanye, n’inzira zagenewe gutwarirwamo imodoka hanze y’imihanda isanzwe.

Ibi bikorwaremezo biteganyijwe gufasha mu guteza imbere impano z’abakiri bato no guha amahirwe Abanyarwanda bifuza kwinjira mu mwuga wo gutwara imodoka zo mu masiganwa cyangwa mu bindi bikorwa bijyanye na zo.

Jean-Guy Afrika yasobanuye ko intego ari ugutuma iki gikorwaremezo kigira akamaro karenze kwakira isiganwa rya Formula 1 rimwe mu mwaka.

Uyu mushinga uyobowe na RDB, ukaba ugamije no kongera amahirwe y’ishoramari, imirimo n’ubukerarugendo.

{{Isiganwa rya mbere rizaba ryari?}}

Amasezerano y’imyaka 10 hagati y’u Rwanda na Formula 1 yamaze gutangazwa, ariko itariki nyirizina y’isiganwa rya mbere ntiramenyekana.

Icyemejwe ni uko Formula 1 African Grand Prix izatangira mu ntangiriro z’imyaka ya 2030, nyuma y’uko umuhanda uzubakwa mu Bugesera uzaba warangiye kandi wemerewe kwakira amasiganwa.

Imiterere y'ahazubakwa ikibuga cya Formula One mu Karere ka Bugesera

Umuhanda uzanyura hafi y'ikiyaga cya Kidogo

Abapilote ba F1 bazajya bazamuka, banamanuke bitewe n'imiterere y'ahagiye kubakwa umuhanda wa F1 Afican Grand Prix

Umuhanda wa Formula One uzubakwa hafi y'Ikibuga Mpuzamahanga cy'Indege cya Kigali gishya kiri kubakwa mu Bugesera

Biteganyijwe ko uyu muhanda wa F1 uzaba warangiye mu ntangiriro za 2030

1c4:Te20,

Ubutumwa bwashyizwe kuri konti ya X y’Ibiro by’Umukuru w’Igihugu, Village Urugwiro ku wa 13 Ukwakira, bugaragaza ko uyu musangiro wabaye nyuma y’igikorwa cyo kwemeza u Rwanda nk’igihugu kizakira Formula 1 African Grand Prix kuva mu 2030.

Buti “Nyuma yo gutangaza ko u Rwanda ruzakira Formula 1 African Grand Prix, Perezida Kagame na Madamu Jeannette Kagame bakiriye ku meza Perezida wa FIA, Mohammed Ben Sulayem, Perezida wa F1, Stefano Domenicali, abayobozi b’ibigo byigenga ku mugabane n’abafatanyabikorwa bo mu muryango w’abasiganwa mu modoka.”

African Grand Prix izaba isiganwa rya 24 ku ngengabihe ya Formula One yari isanzweho Grand Prix 23 zibera ku migabane itandukanye y’Isi. Iyo mu Rwanda ni yo yonyine izajya ibera muri Afurika.

Ikibuga kizakinirwaho iyi mikino kigiye gutangira kubakwa mu Bugesera hafi y’Ikibuga cy’Indege gishya cya Kigali.

U Rwanda rwemejwe nk’igihugu kizakira iyi mikino ku wa 13 Ukwakira 2026, hanasinywa amasezerano y’imyaka yo kugarura ku Mugabane wa Afurika Shampiyona y’Isi y’amasiganwa y’imodoka ya Formula 1, ategurwa ku bufatanye n’Ishyirahamwe Mpuzamahanga ry’Imikino y’Imodoka (FIA).

Aya masezerano y’igihe kirekire ateganya ko isiganwa rya mbere rya Formula 1 mu Rwanda rizaba nyuma yo kurangiza kubaka ikibuga cyihariye cy’amasiganwa y’imodoka mu Karere ka Bugesera. Biteganyijwe ko iki kibuga kizaba cyuzuye mu ntangiriro za 2030.

Ni ikibuga kizubakwa hubahirijwe ibisabwa n’Ishyirahamwe Mpuzamahanga ry’Imikino y’Imodoka (FIA) ku bibuga byo ku rwego rwa mbere, bizwi nka FIA Grade 1, ari na rwo rwego rukenewe kugira ngo ikibuga cyemererwe kwakira amasiganwa ya Formula 1.

U Rwanda ni kimwe mu bihugu bya Afurika byari byatanze kandidatire yo kwakira iri siganwa, mu bindi birimo Afurika y’Epfo. Rumaze igihe rushyira imbaraga mu bikorwa bigamije guteza imbere siporo, ndetse rwakiriye amarushanwa akomeye arimo Shampiyona y’Isi y’Amagare, Shampiyona ya Basketball muri Afurika, BAL n’andi.

Rwakiriye kandi Inama y’Inteko rusange ya FIFA yo mu 2023 ndetse n’Inteko Rusange ya FIA n’umuhango wo gutanga ibihembo bya FIA byabaye mu 2024.

Isiganwa rya Formula 1 African Grand Prix, rizaterwa inkunga na Visit Rwanda, rifatwa nk’indi ntambwe ikomeye mu cyerekezo cy’u Rwanda cyo kuba igicumbi cya siporo, ubukerarugendo, ibishya n’ubucuruzi kizwi ku rwego mpuzamahanga.

Ntihatangajwe amakuru arambuye ajyanye n’itariki isiganwa rya mbere rizaberaho, ibyiciro byo kubaka ikibuga cy’amasiganwa ndetse na gahunda y’ibikorwa bizajya biba mu mpera z’icyumweru cy’amarushanwa.

Perezida Kagame na Madamu Jeannette Kagame bakiriye ku meza abayobozi batandukanye

Perezida Kagame n'abayobozi barimo uwa FIA na F1 bafatanyije gutangaza ko u Rwanda ruzakira Formula 1 African Grand Prix kuva mu 2030

1c5:T1011,

Yabivuze agaruka ku nyungu u Rwanda n’urubyiruko rwa Afurika bashobora gukura mu kwakira Formula One kuri uyu mugabane.

Ni nyuma y’uko kuri uyu wa 13 Ukwakira 2026, u Rwanda rwahawe kuzira Grand Prix ya F1 guhera mu 2030, mu gihe cy’imyaka 10.

Iri siganwa ry’imodoka nto zigendera ku muvuduko uri hejuru ryari rimaze imyaka 33 ritabera ku Mugabane wa Afurika.

Abajijwe ku batekereza ko ari igikorwa kinini kirenze urwego n’ubushobozi bw’u Rwanda, Perezida Kagame yavuze ko kiri mu ishusho y’ibyo igihugu kigomba gukora.

Ati “Ndabwira abo bantu guhumeka cyane, bagatuza noneho bagategereza kureba ikigiye kuza. Mbere na mbere turi abantu nk’abandi bo mu bice bisigaye by’Isi, nta kintu cyangwa igikorwa kiruta abantu. Turi igihugu gito ariko turi abantu. Ni byo rwose Formula One ni ikintu kinini, ariko ni ishusho nini y’ibyo u Rwanda rugomba gukora.”

Yavuze ko nubwo iri rushanwa rizajya ribera mu Rwanda, ariko zizafungurira amahirwe Afurika muri rusange.

Ati “Hari ibintu byinshi u Rwanda rwiyemeje gukora, twateye imbere nk’igihugu, nk’abantu, ariko by’umwihariko nko kuri iyi Formula One nka siporo ifite aho ihuriye na Afurika, ntituri kureba ku Rwanda gusa, turi kureba ku Rwanda mu ishusho y’umugabane kandi dufite intego zo kwinjizamo abandi bavandimwe b’Abanyafurika ngo bitabire.”

Perezida Kagame yatanze ingero z’ibindi bikorwa bikomeye u Rwanda rumaze kwakira, birimo Basketball Africa League, Inteko Rusange ya FIFA na Shampiyona y’Isi y’Amagare.

Yongeyeho ati “Hari n’ibindi bizaza. Twishimiye kwakira Formula One kandi tuzagerageza kumvisha abo batabyumva ko bashobora kubigiramo uruhare bakabibonamo inyungu.”

Umukuru w’Igihugu yagaragaje ko u Rwanda ruzafatanya n’abikorera n’abashoramari bo mu bihugu binyuranye.

Ati “Tuzagira abashoramari, mu by’ukuri hazabamo uruhare rukomeye rw’abikorera ku giti cyabo. Dufite inshuti hano zaje kwifatanya natwe n’izindi bitakunze, ariko zashakaga kuba ziri hano. Rero ni igikorwa cy’u Rwanda, ni icya Afurika kandi ni igikorwa gikomeye twishimiye kuba dufite aho duhuriye na cyo.”

Perezida Kagame yashimangiye ko kwakira African Grand Prix bizatuma abafana ba Formula One bayegera kurushaho, aho kuyirebera gusa kuri televiziyo.

Ati “Hari abafana benshi ba Formula One n’izindi gahunda zijyanye n’imikino yo gusiganwa mu modoka. Bahoraga bayarebera kure, bayarebera kuri televiziyo, ariko bashaka kuyagiramo uruhare. Twavugaga ko ibi ari ukuyabegereza, kubafasha kuyagiramo uruhare.”

Yavuze ko amahirwe azanagira uruhare mu guhanga imirimo no guteza imbere ubumenyi bw’urubyiruko.

Ati “Abafana bakiri bato ntibazaryoherwa no kureba ibiri kuba gusa, bazabigiramo uruhare nk’aba-engineers, abakanishi, noneho habe abashoramari n’abandi bakora ibitandukanye bisaba amagana cyangwa ibihumbi by’abantu. Ibi ni byo urubyiruko rwa Afurika rukwiye kandi turavuga ko bari mu bibigize, turi kubizana hafi yabo muri Afurika.”

Yakomeje agira ati “Tugomba gukora ku buryo ibyo tuvuga biva mu magambo bikagaragara kandi abaturage bacu bakabyungukiramo. U Rwanda n’ahandi hasigaye ku mugabane, bazabyungukiramo. Turashaka ko n’abandi babigiramo uruhare. Ni yo mpamvu imipaka yacu ifunguye, gukuraho ibisabwa bya viza byakozwe ku bushake, si ibintu byabaye ku bw’impanuka.”

Perezida Kagame yavuze ko Formula One ari ishusho y'ibintu binini u Rwanda rwifuza gukora

U Rwanda rwahawe kwakira F1 guhera mu 2030, mu gihe cy'imyaka 10

1c6:T2e59,

African Grand Prix igiye kuba isiganwa rya 24 ku ngengabihe ya Formula One yari isanzweho Grand Prix 23 zibera ku migabane itandukanye y’Isi. Iyo mu Rwanda ni yo yonyine izajya ibera muri Afurika.

Ikibuga kizakinirwaho iyi mikino, kigiye gutangira kubakwa mu Bugesera hafi y’Ikibuga cy’Indege.

Kwemeza u Rwanda nk’igihugu kigiye kwakira African Grand Prix, byabereye muri BK Arena kuri uyu wa Kabiri, tariki 12 Ukwakira. Perezida Kagame ni umwe mu bayobozi bakuru bari bitabiriye iki gikorwa.

Ni mu muhango wasinyiwemo amasezerano y’imyaka 10 yo kugarura ku Mugabane wa Afurika Shampiyona y’Isi y’amasiganwa y’imodoka ya Formula 1, ategurwa ku bufatanye n’Ishyirahamwe Mpuzamahanga ry’Imikino y’Imodoka (FIA).

Ni intambwe ikomeye mu mateka ya Formula 1, kuko aya marushanwa agiye kongera kubera ku Mugabane wa Afurika ku nshuro ya mbere kuva mu 1993.

Kugarura amasiganwa ya Formula 1 muri Afurika ni icyifuzo cyari kimaze igihe kirekire. Mu mpera za 2024, ni bwo Perezida Kagame yatanze kandidatire y’u Rwanda yo kwakira, Formula One.

Mu ijambo rye, Perezida Kagame yavuze ko u Rwanda rwiteguye kuba umufatanyabikorwa mwiza mu guteza imbere isiganwa ry’imodoka ku mugabane wa Afurika.

Ati “Uyu munsi, nishimiye gutangaza ku mugaragaro ko u Rwanda rumaze igihe rushyira imbaraga nyinshi mu myiteguro yo kwakira isiganwa rya Formula 1 African Grand Prix mu ntangiriro z’imyaka ya 2030.”

Yakomeje agira ati “U Rwanda rwishimiye kandi rufite amatsiko yo kugira uruhare muri uru rugendo ruzahindura uburyo Afurika ibonwa mu ruhando rwa siporo ku Isi.”

Stefano Domenicali, Umuyobozi Mukuru wa Formula 1, yavuze ko umunsi utari uwo gutangaza gusa ko hagiye kuba Grand Prix muri Afurika, “ahubwo uyu munsi ni intangiriro y’igice gishya mu mateka ya Formula 1.”

Yavuze ko amarushanwa ya Formula 1 asanzwe abera mu bice bitandukanye cyane kandi hafite amateka akomeye ku Isi gusa mu gihe kirekire, “hari umugabane umwe wari utarabona umwanya ukwiriye muri uru rugendo rwacu, uwo ni Afurika”.

Yavuze ko Afurika ari “umugabane ukungahaye ku mateka, umuco, udushya, impano n’amahirwe menshi. Ni umugabane urangwa n’imbaraga, ubushobozi bwo guhangana n’ibibazo ndetse n’ubushobozi butagira imipaka bwo gukomeza gutera imbere.”

“Tumaze imyaka myinshi tuvuga ko twifuza kugaruka muri Afurika, ariko buri gihe twashimangiraga ko tugomba kubikora mu buryo bukwiye, dufite icyerekezo gikwiye kandi dufatanyije n’umufatanyabikorwa ukwiriye. Uwo mufatanyabikorwa ni u Rwanda.”

Aya masezerano y’igihe kirekire ateganya ko isiganwa rya mbere rya Formula 1 mu Rwanda rizaba nyuma yo kurangiza kubaka ikibuga cyihariye cy’amasiganwa y’imodoka mu Karere ka Bugesera. Biteganyijwe ko iki kibuga kizaba cyuzuye mu ntangiriro za 2030.

Ni ikibuga kizubakwa hubahirijwe ibisabwa n’Ishyirahamwe Mpuzamahanga ry’Imikino y’Imodoka (FIA) ku bibuga byo ku rwego rwa mbere, bizwi nka FIA Grade 1, ari na rwo rwego rukenewe kugira ngo ikibuga cyemererwe kwakira amasiganwa ya Formula 1.

Uyu mushinga uri muri gahunda ngari iyobowe n’Urwego rw’Igihugu rw’Iterambere (RDB), igamije guteza imbere siporo, ubukerarugendo, ibikorwaremezo n’ubucuruzi.

Ikibuga kizubakwa mu bilometero bigera kuri 40 mu majyepfo y’Umujyi wa Kigali, hafi y’ahari kubakwa Ikibuga Mpuzamahanga cy’Indege cya Kigali gishya mu Bugesera.

Imiterere yacyo izashingira ku miterere karemano y’aho kizubakwa, ku buryo imihanda izakoreshwa mu masiganwa izajya inyura ahantu hari ubutumburuke butandukanye.

Ibi bizatuma abapilote b’imodoka bahura n’imbogamizi zidasanzwe mu gihe cy’amasiganwa, ari na ko abakunzi b’uyu mukino bazaba bafite ahantu heza ho gukurikiranira uko imodoka zisiganwa.

Biteganyijwe ko kizajya cyakira andi marushanwa mpuzamahanga y’imodoka, ibirori bikomeye, inama n’ibikorwa by’imyidagaduro.

Ibi bizafasha gukurura ishoramari, guteza imbere ubucuruzi no kuzamura ubukungu bw’akarere mu gihe kirekire.

Aya masezerano asinywe nyuma y’imyaka myinshi y’ibiganiro n’ubufatanye, hagamijwe gushyiraho urufatiro rukomeye no kubona umufatanyabikorwa ukwiriye, kugira ngo hategurwe isiganwa rya Grand Prix riri ku rwego mpuzamahanga, rizagenda neza kandi rifite inyungu zirambye ku bisekuru bizaza.

U Rwanda ni kimwe mu bihugu bya Afurika byari byatanze kandidatire yo kwakira iri siganwa, mu bindi birimo Afurika y’Epfo. Rumaze igihe rushyira imbaraga mu bikorwa bigamije guteza imbere siporo, ndetse rwakiriye amarushanwa akomeye arimo Shampiyona y’Isi y’Amagare, Shampiyona ya Basketball muri Afurika, BAL n’andi.

Rwakiriye kandi Inama y’Inteko rusange ya FIFA yo mu 2023 ndetse n’Inteko Rusange ya FIA n’umuhango wo gutanga ibihembo bya FIA byabaye mu 2024.

Isiganwa rya Formula 1 African Grand Prix, rizaterwa inkunga na Visit Rwanda, rifatwa nk’indi ntambwe ikomeye mu cyerekezo cy’u Rwanda cyo kuba igicumbi cya siporo, ubukerarugendo, udushya n’ubucuruzi kizwi ku rwego mpuzamahanga.

Ntabwo higeze hatangazwa amakuru arambuye ajyanye n’itariki isiganwa rya mbere rizaberaho, ibyiciro byo kubaka ikibuga cy’amasiganwa ndetse na gahunda y’ibikorwa bizajya biba mu mpera z’icyumweru cy’amarushanwa.

U Rwanda rwahawe kwakira Grand Prix ya F1 mu 2030

Igikorwa cyo gutangaza u Rwanda nk'igihugu kizagira F1 African Grand Prix mu 2023 cyabereye muri BK Arena kuri uyu wa Kabiri

Perezida Paul Kagame yavuze ko u Rwanda rwiteguye kuba umufatanyabikorwa mwiza mu guteza imbere isiganwa ry’imodoka ku Mugabane wa Afurika

Perezida wa FIA, Mohammed Ben Sulayem, yashimye intambwe yatewe hagati y'u Rwanda na Formula One

Umuyobozi Mukuru wa Formula 1, Stefano Domenicali, yavuze ko kugira isiganwa mu Rwanda ari ntangiriro y’igice gishya mu mateka ya Formula 1

Imiterere y'ikibuga cya F1 kigiye kubakwa mu Bugesera

1c7:T1b00,

Iyi mishinga iri mu bikorwa by’ingenzi bikubiye mu mihigo y’urwego rw’imiturire n’iterambere ry’imijyi ya 2026/2027, iyobowe na Minisiteri y’Ibikorwaremezo (MININFRA), igaragaza ko Leta iteganya gukomeza gushora amafaranga mu kubaka amacumbi, kuvugurura ibikorwa remezo no guteza imbere imiturire ibereye abaturage.

Muri rusange, ibikorwa bikubiye muri iyi mihigo byagenewe amafaranga arenga miliyari 92,6 Frw, akubiyemo ayo kubaka no kuvugurura amacumbi, gusana ibishanga, kubaka ibikorwaremezo bya Leta no kunoza imicungire y’imijyi.

Ni amafaranga agaragaza ko imiturire itareberwa gusa mu kubaka inzu nshya, ahubwo ihuzwa no gukemura ibibazo by’abaturage batuye ahashyira ubuzima bwabo mu kaga, kugeza serivisi z’ibanze mu duce dutuwe no guteza imbere imijyi itangiza ibidukikije.

Mu mishinga itatu y’imiturire iri mu Mujyi wa Kigali, hateganyijwe ibikorwa bifitanye isano n’amacumbi 2.029 ya Nyabisindu, 548 ya Batsinda 2 n’andi 88 azubakwa i Mpazi, yose hamwe akaba ari 2.665.

{{Nyabisindu: Umushinga w’amacumbi 2.029 wagenewe miliyari 25,5 Frw}}

Umwe mu mishinga ikomeye ni uwo kuvugurura imiturire ya Nyabisindu, mu Karere ka Gasabo, aho hateganyijwe kubaka amacumbi agezweho azifashishwa mu gutuza abaturage bari batuye mu duce twubatswe mu buryo budakurikije igishushanyombonera.

Mu mihigo ya 2026/2027, uyu mushinga uzwi nka Nyabisindu Informal Settlement Upgrading and Rehousing Project ugaragaza ko ugamije gutunganya amacumbi 2.029.

Wagenewe miliyari 25,6 Frw.

Muri Gicurasi 2025, Umujyi wa Kigali wari watangaje ko uyu mushinga uzakorerwa ku buso bwa hegitari 38,54, mu midugudu ya Nyabisindu, Amarembo I, Amarembo II n’Ibuhoro, mu Murenge wa Remera.

Mu ishyirwa mu bikorwa ryawo, Ikigo cy’Igihugu gishinzwe Imyubakire (RHA) gifite inshingano zo gukurikirana imirimo, mu gihe Urwego rw’Ubwiteganyirize mu Rwanda (RSSB) rufite uruhare mu gutanga amafaranga yo kuwushyira mu bikorwa.

Umujyi wa Kigali na wo ufite inshingano zijyanye n’ubukangurambaga mu baturage, kimwe no gukurikirana ibibazo birebana n’imiryango igirwaho ingaruka n’uyu mushinga.

{{Batsinda 2: Amacumbi 548 n’ibikorwaremezo bya miliyari 1,7 Frw}}

Undi mushinga ni uwa Batsinda 2, uzwi nka Heza Estate, uherereye mu Karere ka Gasabo, ugizwe n’amacumbi 548 yubatswe mu nyubako z’amagorofa.

Ni umwe mu mishinga igaragaza impinduka mu buryo bwo gukoresha ubutaka bwo mu mijyi, aho izo nzu z’amagorofa zifasha gutuza abantu benshi ku buso buto.

Amakuru ya MININFRA agaragaza ko uyu mushinga ugizwe n’inyubako 18, ugamije kongera amacumbi agezweho mu Mujyi wa Kigali.

Mu mihigo ya 2026/2027, hateganyijwe miliyari 1,7 Frw yo kurangiza ibikorwaremezo by’uyu mushinga.

{{Mpazi: Inzu 88 zo gutuzamo imiryango yimuwe i Nyabisindu-Nyagatovu}}

Mu gihe Nyabisindu na Batsinda 2 bigamije guteza imbere amacumbi, undi mushinga ufite umwihariko wo gutuza abaturage bari batuye ahantu hashobora gushyira ubuzima bwabo mu kaga.

Ni uwo kubaka inzu 88 i Mpazi, mu Karere ka Nyarugenge, zigenewe imiryango yo mu gace ka Nyabisindu-Nyagatovu.

Uyu mushinga wagenewe miliyari 2,7 Frw.

Mu mihigo ya 2026/2027, hateganyijwe ko ibikorwa byo kubaka izi nzu bizagera ku 100%.

Izi nzu ziteganyijwe gutangwa nk’ingurane y’amacumbi ku miryango igirwaho ingaruka n’ibikorwa byo kuvugurura imiturire.

{{Indi mishinga y’imiturire mu gihugu}}

Nubwo imishinga itatu iri mu Mujyi wa Kigali ari yo yibanzweho, gahunda ya 2026/2027 igaragaza ko hari n’ibindi bikorwa bigamije kunoza imiturire mu turere dutandukanye.

Mu Karere ka Gakenke, hateganyijwe kwagura umudugudu w’icyitegererezo wa Muzo, ukava ku macumbi 180 ukagera kuri 220.

Bivuze ko hazongerwamo amacumbi 40 mashya, ku ngengo y’imari ya 500.000.000 Frw.

Mu Karere ka Bugesera, hateganyijwe 668.683.985 Frw yo kubaka amacumbi 96 azimurirwamo imiryango yo ku Kirwa cya Sharita, mu Murenge wa Rweru.

Iyi gahunda ikubiyemo kwimura imiryango ikayituza ahandi, bikaba biteganyijwe ko ibikorwa byayo bizagerwaho muri uyu mwaka w’ingengo y’imari.

Mu Karere ka Kayonza, na ho hateganyijwe 381.201.508 Frw yo kubaka amacumbi 41 azatuzwamo imiryango yimurwa mu gace gakorerwamo ubucukuzi bw’amabuye y’agaciro mu Murenge wa Rwinkwavu.

Ku rundi ruhande, hari gahunda yo kubaka inzu 271 zigenewe abarokotse Jenoside yakorewe Abatutsi, ikazatwara miliyari 5,4 Frw.

Iyi gahunda igamije gufasha abarokotse Jenoside bakeneye amacumbi akwiye, mu rwego rwo kubateza imbere no kunoza imibereho yabo.

Hari kandi inzu 318 zasenywe n’imyuzure n’inkangu ziteganyijwe kongera kubakwa, ku ngengo y’imari ya miliyari 1,4 Frw.

Imirimo yo kuvugurura ibishanga iri kwihutishwa kugira ngo irangirane n'uyu mwaka w'ingengo y'imari

{{Bugesera na Rwamagana mu mishinga y’amacumbi mashya}}

Mu rwego rwo gutegura imishinga y’imiturire y’ejo hazaza, hateganyijwe kandi ubushakashatsi n’ibishushanyo mbonera by’ahazubakwa amacumbi mu turere twa Bugesera na Rwamagana.
Mu Bugesera, hateganyijwe 170.631.274 Frw yo gukora inyigo n’ibishushanyo mbonera, harimo n’uburyo bwo kubaka amacumbi atangiza cyane ibidukikije, agabanya imyuka ihumanya ikirere.

I Rwamagana, hateganyijwe 198.243.274 Frw yo gutegura umushinga w’igerageza w’amacumbi ahendutse.

Iyi mishinga yombi ntisobanura ko amazu azaba yahise yubakwa muri uyu mwaka. Ahubwo amafaranga yateganyijwe azifashishwa mu gukora inyigo no gutegura ibishushanyo bizashingirwaho mu byiciro bizakurikiraho.

{{Miliyari 26 Frw zo kuvugurura ibishanga byo muri Kigali}}

Gahunda yo guhindura isura y’Umujyi wa Kigali ntigarukira ku kubaka amacumbi gusa.
Harimo n’umushinga wo kuvugurura ibishanga byo mu Mujyi wa Kigali, mu rwego rwa gahunda ya kabiri yo guteza imbere imijyi, izwi nka Rwanda Urban Development Project II (RUDP II).

Uyu mushinga wagenewe miliyari 26 Frw mu mihigo ya 2026/2027.

1c8:T759,

Bikubiye mu itangazo ryashyizweho umukono n’Umuvugizi wa RCS, CSUPT Hillary Sengabo, rivuga ko abari baririmo bimuriwe mu yandi magororero.

RCS yagize iti “Ubuyobozi bw’Urwego rw’u Rwanda rushinzwe Igorora (RCS) buramenyesha abafite ababo mu Igororero rya Bugesera, ko iryo gororero ryafunzwe guhera uyu munsi, bityo mukaba mumenyeshejwe ko abari barimo bimuriwe mu yandi magororero.”

Uru rwego rwanatangaje ko abagororwa bashyiriweho uburyo bwo kuvugana n’abo mu miryango yabo, kugira ngo babamenyeshe aho bimuriwe.

Ayo magororero bimuriwemo ni yo imiryango yabo izajya ijyaho kubasura.

Iti “Muramenyeshwa kandi ko abagororwa bashyiriweho uburyo bwo kuvugana n’abo mu miryango yabo aho bimuriwe ari na ho bazajya baza kubasura.”

CSUPT Hillary Sengabo, yabwiye IGIHE ko iri gororero ryari risanzwe ricumbikiye abantu 2320.

Ati “ Impamvu muri rusange ni uko imibare y’abagororwa mu gihugu iba yaragiye igabanyuka. Iyo imibare igabanyuka n’amagororero aragabanyuka. Ubu abimuwe nta kibazo cy’ubucucike bateza aho bagiye kuko ubucucike dufite buri kuri 97%, mbese ntabwo tugifite ahubwo buragenda bugabanyuka, kubajyana rero twagiye tureba ahatari ubucucike akaba ariho tubajyana.’’

Abantu bari mu magororero uyu munsi babarirwa muri 68.733.

U Rwanda ubu rusigaranye amagororero 12 arimo arindwi agororerwamo abagabo gusa, mu gihe abiri [Nyarugenge na Musanze] abarizwamo abagabo n’abagore naho irya Nyagatare rikaba ribarizwamo abana. Amagororero abiri [Nyamagabe na Ngoma] abamo abagore gusa.

RCS yemeje ko Igororero rya Bugesera ryafunzwe

1c9:T173d,

Gukurirwamo inda ni imwe muri serivisi z’ubuvuzi zikunze guteza impaka, cyane cyane hashingiwe ku myemerere y’amadini atandukanye. Icyakora, amategeko y’u Rwanda ateganya impamvu zituma umugore cyangwa umukobwa ashobora gukurirwamo inda mu buryo bwemewe.

Iteka rya Minisitiri rigena ibigomba kubahirizwa kugira ngo umuganga akuriremo umuntu inda, riteganya ko iyi serivisi ishobora gutangwa igihe utwite ari umwana, yakorewe imibonano mpuzabitsina ku gahato, cyangwa yatwaye inda nyuma yo gushyingirwa ku gahato.

Izindi mpamvu zirimo kuba inda yaratewe n’umuntu bafitanye isano ya hafi kugera ku gisanira cya kabiri, cyangwa kuba inda ibangamiye ubuzima bw’utwite cyangwa ubw’umwana atwite.

Uretse igihe inda ibangamiye ubuzima bw’utwite cyangwa ubw’umwana atwite, gukurirwamo inda bikorwa igihe itarengeje ibyumweru 22.

Iri teka riteganya kandi ko iyo ushaka gukurirwamo inda ari umwana, abisabirwa n’abamuhagarariye bemewe n’amategeko nyuma yo kubyumvikanaho. Iyo batumvikanye hagati yabo cyangwa batumvikanye n’umwana, icyifuzo cy’umwana ni cyo cyitabwaho.

{{Abasaba gukurirwamo inda biyongereyeho abarenga 1.000}}

Umuyobozi w’Agashami Gashinzwe Gahunda zo Kwita ku Buzima bw’Ababyeyi n’Abana mu mavuriro muri RBC, Dr Cyiza François Regis, yatangaje ko ivugururwa ry’amategeko ryagize uruhare mu gutuma abantu benshi batangira kwitabira serivisi zo gukurirwamo inda mu buryo bwemewe.

Yabigarutseho ku wa 9 Ukwakira 2026, mu biganiro byahuje Ihuriro ry’Abagize Inteko Ishinga Amategeko Baharanira Imibereho Myiza y’Abaturage n’Iterambere (RPRPD) n’abanyamakuru.

Yagize ati “Ubona ko imibare y’abahabwa iyo serivisi igenda yiyongera aho tugereranyije nko mu myaka itatu ishize wasangaga abantu basaba serivisi yo gukurirwamo inda mu buryo bwemewe mu mavuriro bazihawe, ni ukuvuga mbere ya Kamena 2025 wasangaga bari hagati ya 1800 na 2200 ku mwaka.”

Yakomeje agira ati “Turebye mu mwaka ushize tubona ko abantu batse serivisi yo gukurirwamo inda mu buryo bwemewe n’amategeko bageze kuri 3200. Ni bwo wabonaga ko abantu 1000 biyongereye ku bari basanzwe basaba iyo serivisi.”

Dr Cyiza yasobanuye ko kwiyongera kw’abitabira izi serivisi bigaragaza ko hari abantu benshi bari bazikeneye ariko bakagorwa no kuzigeraho, kuko zatangirwaga cyane cyane mu bitaro bya Leta, ibyigenga no muri polyclinique.

Ingingo ya gatanu y’iteka rya Minisitiri iteganya ko serivisi zo gukurirwamo inda zishobora gutangirwa mu bigo by’ubuvuzi bya Leta cyangwa ibyigenga byemerewe na Minisiteri y’Ubuzima, birimo ibitaro, ibigo nderabuzima na polyclinique.

Iri teka riteganya kandi ko Minisiteri y’Ubuzima ishobora kwemerera ivuriro ryigenga ryujuje ibisabwa gutanga izi serivisi, nyuma yo gusuzuma niba rifite ubushobozi bwo kuzikora.

{{Serivisi zo gukurirwamo inda zigiye kwagurirwa mu bigo nderabuzima byo mu gihugu hose}}

RBC yatangaje ko gahunda y’igerageza ryo gutangira serivisi zo gukurirwamo inda mu bigo nderabuzima yatanze umusaruro, ku buryo hateganywa kuyigeza mu gihugu hose.

Iyi gahunda y’igerageza yamaze umwaka, ishyirwa mu bikorwa mu bigo nderabuzima 43 byo mu turere twa Musanze, Karongi, Rwamagana na Ruhango.

Dr Cyiza yavuze ko mu bagore n’abakobwa 3.200 basabye izi serivisi mu mwaka w’ingengo y’imari wa 2025/2026, abari hagati ya 900 na 1.000 bazihawe mu bigo nderabuzima byari muri iryo gerageza.

Ati “Bamwe bakiriye iyo serivisi ku bigo nderabuzima bari hagati ya 900 na 100 mu mwaka w’ingengo y’imari washize wo kuva muri Nyakanga 2025 kugera muri Kamena 2026.”

Muri iyi gahunda, umuforomo cyangwa umubyaza wabihuguriwe yakira umuntu ukeneye gukurirwamo inda, akamusuzuma ndetse agakora ibizamini bikenewe.

Ibisubizo by’ibyo bizamini bishyirwa mu ikoranabuhanga, bigasuzumwa n’umuganga uri ku bitaro, ubiganiraho n’umuforomo cyangwa umubyaza wakiriye uwo muntu, mbere yo gufata icyemezo ku itangwa rya serivisi.

Dr Cyiza yavuze ko iri gerageza ryagaragaje ko izi serivisi zishobora gutangirwa mu bigo nderabuzima mu buryo bukwiye.

Ati “Turi guteganya noneho kubijyana no mu gihugu hose.”

{{Bite ku bigo by’ubuvuzi bishamikiye ku madini?}}

Nubwo gukurirwamo inda mu buryo bwemewe n’amategeko byashyizwe muri serivisi z’ubuvuzi, hari amadini akomeje kugaragaza ko atabishyigikiye, ashingiye ku myemerere yayo ijyanye no kurengera ubuzima bw’umuntu kuva agisamwa.

Ibi bituma havuka ikibazo cy’uburyo ibigo by’ubuvuzi bishamikiye ku madini bizitabira gahunda yo kugeza izi serivisi ku baturage, cyane ko hari n’amadini atemera bumwe mu buryo bwo kuboneza urubyaro.

Dr Cyiza yasobanuye ko RBC ikorana n’ibigo by’ubuvuzi bishamikiye ku madini, ariko ko iyo ikigo kidashobora gutanga serivisi runaka kubera imyemerere yacyo, umurwayi afashwa kumenya ahandi ashobora kuyibonera.

Yagize ati “Ibigo by’ubuvuzi bishamikiye ku miryango y’abihayimana bikorana na Leta usanga abaganga babikoramo na byo ubwabyo bitanga serivisi muri rusange z’ubuzima nubwo kuri izo serivisi [zo gukurirwamo inda mu buryo bwemewe n’amategeko] bitewe n’imyemerere yabo haba hari ibyo baba bumva batemera ariko na bo turakorana ku buryo uba usanga hari amavuriro ahagaragiye, mu gihe wa muntu ukeneye iyo serivisi bo badashobora gutangira muri iryo vuriro rigengwa n’uwo muryango ushingiye ku iyobokamana, bafata wa murwayi bakamubwira aho ashobora kujya gufata iyo serivisi.”

Dr. Cyiza François Regis yavuze ko abagore bakuriwemo inda mu buryo bwemewe n'amategeko biyongereye

1ca:T2a2e,

Yabigarutseho ku wa 11 Ukwakira 2026, mu birori byo kwizihiza isabukuru y’imyaka 25 Itorero Africa New Life Ministries rimaze rikorera mu Rwanda.

Africa New Life Ministries ni Itorero ryashinzwe mu 2001 na Rev. Dr. Charles Buregeya Mugisha, nyuma yo kuva mu buhungiro muri Uganda. Ryatangiriye ibikorwa byaryo mu Karere ka Kayonza, mu Ntara y’Iburasirazuba, mbere yo kwagurira ibikorwa mu Mujyi wa Kigali mu 2004.

Madamu Jeannette Kagame yagaragaje ko iri torero ryavutse mu gihe u Rwanda rwari rukigerageza kwiyubaka nyuma y’amateka akomeye rwari rwaranyuzemo, yasize ubuzima n’imibereho by’Abanyarwanda byarahungabanye.

Ati “Africa New Life Ministries ntiyavutse mu gihe cy’amahoro n’umudendezo ahubwo yavutse mu gihe igihugu cyari mu bihe bigoye nyuma y’uko u Rwanda rwari rwarasenyutse haba mu mibereho yarwo ndetse n’iy’Abanyarwanda muri rusange. Iri torero ryavutse ubwo twari tukigerageza kwiyubaka nk’igihugu.”

Yasobanuye ko muri icyo gihe, u Rwanda rwari rufite ibibazo byinshi byasabaga ibisubizo, birimo no kongera kubaka icyizere n’ubumwe hagati y’Abanyarwanda bari baranyuze mu buzima butandukanye.

Yagaragaje ko Africa New Life Ministries yahisemo kwibanda kuri bimwe mu bibazo byari bikomeye muri icyo gihe.

Ati “U Rwanda tuvuga ubu ni igihugu kigizwe n’umubare munini w’abantu babaye mu buhunzi, dufate umwanya dutekereze kuri ibyo n’icyo bivuze ku gihugu. Bivuze ko u Rwanda rw’icyo gihe rwari igihugu cy’abantu baciriwe ishyanga cyangwa nabo ubwabo bagahitamo guhunga ngo bakize ubuzima bwabo, bakemera kujya kwita abanyamahanga mu bihugu by’abandi.”

“Igihe cyarageze abo Banyarwanda barataha, bataha bavuga indimi zitandukanye bitewe n’ibihugu bahungiyemo […] ndetse basanga n’abatarigeze bahunga bafite ihungabana batewe n’ayo mateka. N’ubwo twari Abanyarwanda ariko hagati yacu twari nk’abanyamahanga.”

Madamu Jeannette Kagame yashimiye Africa New Life Ministries ku ruhare yagize mu gufasha Abanyarwanda kongera kwiyumva nk’umuryango umwe, mu gihe igihugu cyari mu rugendo rwo kwiyubaka.

Yagaragaje ko iri torero ritagarukiye ku ivugabutumwa gusa, ahubwo ryagize uruhare mu gufasha abaturage kubona ibyo bakeneye mu mibereho yabo, no guhumuriza abari barakomerekejwe n’amateka.

Ati “Igihe mwumvaga muri gutangiza itorero gusa mwasubije ikibazo twibazaga turi benshi, Iwacu ni he, mu rugo ni he? Mwabihaye igisubizo cyiza kandi gisobanutse ubwo mwiyemezaga ko itorero ariryo rizaba mu rugo ha benshi.”

Yakomeje agira ati “Igihe igihugu cyari gikeneye kwisubiza agaciro no gukemura urwo rusobe rw’ibibazo mwafashije benshi kongera kwiyumva nk’abantu batari impunzi ko ahubwo ari umuryango umwe mugari w’Imana. Mwabahaye ibitunga roho muhumuriza imitima yari ikomeretse ariko mubamenyera n’ibitunga umubiri”

“Turabashimira ko mwabereye ababyeyi abana batari buzamenye papa cyangwa mama kuko bagizwe imfubyi n’amateka. Turabashimira ko mwaduhamirije ko ubutumwa bwiza si ububwiriza abantu ko hari ijuru gusa ahubwo ari ubwubaka umuryango w’Imana muri ubu buzima dufite ku Isi.”

Umuyobozi Mukuru wa Africa New Life Ministries, Rev. Dr. Charles Buregeya Mugisha, yavuze ko igitekerezo cyo gushinga iri torero cyatangiye kumuzamo mu 1995, ubwo we n’umugore we, Florence Mugisha, basuraga u Rwanda.

Yasobanuye ko muri urwo ruzinduko babonye abana benshi bari bafite ibibazo bikomeye by’imibereho, bituma batekereza ku buryo babafasha.

Nk’abantu bari baranyuze mu buhunzi, bari basobanukiwe ingaruka zabwo ku mibereho y’abantu, bityo biyemeza gutangira ibikorwa byo gufasha abatishoboye, bahereye ku bana.

Rev. Dr. Mugisha yavuze ko mu gihe yari akiri mu masomo, yatangiye gutegura gahunda y’ivugabutumwa yari kuzafasha gushyira mu bikorwa icyo cyerekezo.

Ati “Mu masomo yanjye, nibwo natangiye gutegura gahunda y’umurimo w’ivugabutumwa twifuzaga gutangiza. Igihe twahamaze cyaraduteguye kandi kiduhuza n’inshuti nyinshi, nk’uko mubibona, zaje kuba igice cy’ingenzi cy’inkuru ya Afurika New Life Ministries.”

Yasobanuye ko ubwo basubiraga mu Rwanda mu 2001, basanze ibibazo by’imibereho y’abaturage, by’umwihariko iby’abana, bikeneweho ubufasha bwihuse, bituma bafata icyemezo cyo gutangira ibikorwa batagitegereje.

Ati “Ubwo twasubiraga mu Rwanda mu mpeshyi yo mu 2001 kugira ngo tuhasure, ibyo twabonye ko bikenewe byatumye tubona ko tutagishobora gukomeza gutegereza, nibwo twahisemo gutangiza amafaranga twari twarabitse yo kubaka inzu yacu. Muri Nzeri 2001, African Youth yatangiye.”

{{Abana basaga ibihumbi 21 bafashijwe kwiga}}

Mu myaka 25 ishize, Africa New Life Ministries yagiye yagura ibikorwa byayo, by’umwihariko mu burezi, ubuzima no guteza imbere imibereho myiza y’abaturage.

Kugeza ubu, iri torero rifite amashami 12 hirya no hino mu gihugu, rikaba rimaze gufasha abana barenga 21.900 kubona uburezi.

Rimaze kandi gufasha abagore 1.914 kwiteza imbere binyuze mu bikorwa bitandukanye bigamije kuzamura imibereho yabo.

Mu gufasha abana kubona indyo yuzuye no gukomeza kwiga neza, Africa New Life Ministries imaze gutanga amafunguro arenga miliyoni 5,7 mu bigo by’amashuri.

Mu bijyanye n’ubuzima, abantu barenga ibihumbi 500 bamaze guhabwa serivisi z’ubuvuzi mu ivuriro ry’iri torero rizwi nka Dream Medical Center.

Ibi bikorwa biri mu byo Africa New Life Ministries yishimira kuba yaragezeho mu myaka 25 imaze ikorera mu Rwanda, aho yagiye ihuza ivugabutumwa n’ibikorwa bigamije guteza imbere imibereho y’abaturage.

Madamu Jeannette Kagame ubwo yakirwaga muri BK Arena ahabereye ibi birori

Madamu Jeannette Kagame yagaragaje ko iri torero ryavutse mu gihe u Rwanda rwari rukigerageza kwiyubaka nyuma y’amateka akomeye rwari rwaranyuzemo

Madamu Jeannette Kagame yagaragaje ko ubutumwa bwiza butagomba kugarukira ku kubwiriza abantu iby’ijuru gusa, ahubwo bukwiye no kugira uruhare mu kubaka umuryango

Umuyobozi Mukuru wa Africa New Life Ministries, Rev. Dr. Charles Buregeya Mugisha, yavuze ko igitekerezo cyo gushinga iri torero cyatangiye kumuzamo mu 1995, ubwo we n’umugore we, Florence Mugisha, basuraga u Rwanda

Guverineri w’Intara y’Iburasirazuba, Pudence Rubingisa, yari mu bitabiriye ibi birori

Meya w'Umujyi wa Kigali,Dusengiyumva Samuel, ni umwe mu bayobozi bitabiriye ibi birori

Wari umwanya mwiza wo gushima Imana ku myaka 25 iri torero rimaze rivutse

Abakirisitu n'inshuti za Africa New Life Ministries bari bateraniye muri BK Arena ari benshi

Abana bato nabo bahawe umwanya wo gushima Imana binyuze mu ndirimbo

1cb:T9395,

Uyu mujyi uherereye rwagati muri Espagne, ukaba ufite amateka akomeye agaragarira mu nyubako zawo za kera, imihanda migari n’ahantu nyaburanga hakurura ba mukerarugendo baturutse hirya no hino ku Isi.

Uretse kuba igicumbi cy’ubukerarugendo n’umuco, Madrid ifite n’umwanya wihariye mu mubano w’u Rwanda na Espagne, cyane ko ari ho u Rwanda ruherutse gufungura Ambasade yarwo ya mbere muri iki gihugu.

Iyi Ambasade ifatwa nk’intambwe ikomeye mu gushimangira umubano w’ibihugu byombi, by’umwihariko mu bya dipolomasi, ubucuruzi, ishoramari, ubukerarugendo n’umuco.

Mu minsi itanu namaze muri Madrid, nagize amahirwe yo kuzenguruka ibice bitandukanye by’uyu mujyi, nsura ahantu nyaburanga hazwi cyane, inyubako zifite amateka yihariye n’imihanda igaragaza imibereho ya buri munsi y’abawutuye.

Nifashishije camera yanjye, nagerageje kugaragaza ubwiza bwa Madrid, amateka yayo n’ibiyigira umwe mu mijyi ikomeye y’u Burayi.

Kimwe mu bintu bitangaje umuntu usuye Madrid ni uburyo uyu mujyi wahuje inyubako za kera n’iza kijyambere, ku buryo amateka yawo agaragarira mu miterere y’inyubako n’imihanda.

Mu bice byinshi by’uyu mujyi, usanga inyubako zifite amateka y’imyaka myinshi ziri iruhande rw’izubatswe mu buryo bugezweho, bigaragaza uburyo Madrid yakomeje gutera imbere idatakaje umwihariko wayo.

Imihanda migari, inyubako zifite imitako yihariye n’ibibuga rusange byakira abantu benshi biri mu bituma Madrid igira isura idasanzwe.

Utembereye muri uyu mujyi abona uburyo abaturage bawutuye babaho, aho usanga bamwe bihutira kujya mu mirimo yabo, abandi bicaye ku mabaraza bita terrasse za café baganira na ba mukerarugendo baba basura ahantu nyaburanga hatandukanye.

{{Puerta del Sol na Plaza Mayor, ahantu hafite amateka yihariye}}

Mu hantu hazwi cyane muri Madrid harimo Puerta del Sol, imwe mu mbuga zikomeye z’uyu mujyi, ikaba ahantu abantu benshi bahurira.
Iyi mbuga ikurura abaturage n’abakerarugendo kubera umwanya gifite mu mateka no mu mibereho y’Umurwa Mukuru wa Espagne.

Hafi yayo hari Plaza Mayor, indi mbuga izwi cyane kubera ubwiza bw’inyubako ziyizengurutse n’amateka yayo.

Plaza Mayor ni hamwe mu hantu hagaragaza imiterere y’ubwubatsi bwa kera muri Espagne, hakaba hakurura abantu benshi baza kwirebera ubwiza bwaho no kuruhukira muri za restaurants n’ahandi hantu ho kwidagadurira.

Undi mutungo ukomeye wa Madrid ni Ingoro y’Umwami wa Espagne, izwi nka Royal Palace of Madrid, imwe mu nyubako zigaragaza amateka y’ubwami bw’iki gihugu.

Iyi ngoro igaragaza ubwubatsi buhambaye, ikaba mu hantu hakurura ba mukerarugendo bashaka gusobanukirwa amateka ya Espagne.

{{Ibigo ndangamurage n’ahantu ho kuruhukira}}

Madrid ni n’umujyi ukungahaye ku muco n’ubugeni, aho ufite ibigo ndangamurage bikomeye bizwi ku rwego mpuzamahanga.

Muri byo harimo Prado Museum, ibitse ibihangano by’ubugeni bifite amateka akomeye, ndetse na Reina Sofía Museum, izwiho kubika ibihangano by’ubugeni bugezweho.

Ibi bigo biri mu bituma Madrid ikomeza kugira umwanya ukomeye ku rwego mpuzamahanga mu bijyanye n’umuco n’ubugeni.

Uyu mujyi ufite kandi ahantu henshi hagenewe kuruhukira no kwidagadura, harimo Pariki ya Retiro, izwiho ubusitani bwiza, ibiti byinshi n’ikiyaga abantu bashobora gutemberamo bakoresheje ubwato buto.

Ni hamwe mu hantu abaturage ba Madrid n’abayisura bajya kuruhukira, gutembera no kwishimira ibidukikije, kure y’urusaku rwo mu mihanda migari.

{{Imibereho y’abaturage n’umuco wo gusangira}}

Mu byo umuntu abona atembera muri Madrid harimo uburyo restaurants, amasoko n’ahantu ho kunywera ikawa bigira uruhare rukomeye mu mibereho y’abaturage.

Mu mihanda itandukanye usanga abantu biyicariye hanze ahari café na restaurant, baganira cyangwa basangira amafunguro asanzwe mu muco wa Espagne.

Uretse ibi, Madrid inaberamo ibitaramo, imurikabikorwa, inama mpuzamahanga n’ibindi bikorwa bituma abantu baturutse mu bihugu bitandukanye bahahurira.

Ibi byose bigira uruhare mu gutuma Madrid iba umujyi uhuza abantu bafite imico itandukanye, haba mu rwego rw’ubukerarugendo, ubucuruzi cyangwa ibindi bikorwa by’imibereho.

{{Ambasade nshya y’u Rwanda, indi ntambwe mu mubano w’ibihugu byombi}}

Uretse ubwiza n’amateka ya Madrid, uyu mujyi ufite umwanya wihariye mu mubano w’u Rwanda na Espagne, nyuma y’uko u Rwanda rufunguye Ambasade yarwo ya mbere muri iki gihugu.

Iyi ntambwe igaragaza ubushake bwo kurushaho guteza imbere umubano w’ibihugu byombi, cyane cyane mu by’ubucuruzi, ishoramari, ubukerarugendo n’umuco.

Kugira Ambasade muri Madrid bizafasha u Rwanda kurushaho kumenyekanisha amahirwe y’ishoramari rufite, ibicuruzwa byarwo ndetse n’ahantu nyaburanga hakurura ba mukerarugendo.

Biteganyijwe kandi ko iyi Ambasade izagira uruhare mu koroshya imikoranire hagati y’abikorera bo mu Rwanda n’abo muri Espagne, ndetse no guteza imbere ubufatanye mu nzego zitandukanye.

Umubano w’ibihugu ntushingira gusa ku biganiro by’abayobozi, ahubwo unubakwa binyuze mu gusangira ubumenyi, kumenyana no guteza imbere imikoranire hagati y’abaturage babyo.

Mu minsi itanu namaze muri Madrid, nashoboye kwibonera umujyi wahuje amateka, umuco n’iterambere, kandi ukomeje kugira uruhare rukomeye mu guhuza abantu baturutse hirya no hino ku Isi.

Ni muri urwo rwego, binyuze muri aya mafoto, IGIHE igiye kubagezaho bimwe mu biranga isura ya Madrid mu buryo bwihariye, igaragaza ubwiza bw’uyu mujyi, amateka yawo n’umwanya ufite mu gushimangira umubano hagati y’u Rwanda na Espagne.

Ingoro y’Umwami wa Espagne (Palacio Real de Madrid) ni imwe mu nyubako zikomeye kandi zifite amateka akomeye mu murwa mukuru wa Espagne

Carlos III International School ni kimwe mu bigo by’amashuri biri muri Madrid, umujyi ufite ibikorwa remezo bitandukanye birimo amashuri n’ibigo by’ubushakashatsi

Inyubako z’amagorofa zituwe n’abaturage mu Mujyi wa Madrid, aho mu magorofa yo hasi hari n’ibikorwa bitandukanye by’ubucuruzi

Imihanda itandukanye yo muri Madrid itatswe n’ibiti bituma uyu mujyi ugira ubwiza bwihariye, bikanafasha abaturage kuba ahantu hatuje

Plaza Nueva ni kimwe mu bigo by’ubucuruzi byo muri Madrid, kikaba kirimo amaduka n’ibindi bikorwa bigamije korohereza abaguzi

Ibi birango bifite amabara atandukanye bishushanyije ku buryo bwihariye, biri mu bihangano by’ubugeni bishyirwa mu bice rusange byo muri Madrid

Ibihangano by’ubugeni biri ku masangano y’imihanda ni bimwe mu biranga ubwiza n’imiterere y’Umujyi wa Madrid

Ibinyabiziga binyura mu mihanda minini ya Madrid, aho ibyapa biyobora abashoferi bibafasha kugera mu byerekezo bitandukanye, birimo Córdoba na Toledo

Imihanda imwe yo muri Madrid ikikijwe n’ibiti bitanga igicucu, bigafasha uyu mujyi kugira isura nziza no kubungabunga ibidukikije

Inyubako z’amagorofa zikikije imihanda migari ya Madrid zigaragaza uburyo uyu mujyi wahuje ibikorwa by’ubwubatsi, ubucuruzi n’imiturire

Madrid ifite inyubako nyinshi z’amagorofa zituwe n’abaturage, zubatse ku mihanda igaragaramo ibinyabiziga bitandukanye

Umuhanda unyura munsi y’ubutaka uzwi nka Túnel de Carlos V, uri mu bikorwa remezo byorohereza urujya n’uruza rw’ibinyabiziga mu Mujyi wa Madrid

Gare ya gari ya moshi ya Madrid Puerta de Atocha–Almudena Grandes ni imwe mu zikomeye muri Espagne, ikaba ihuza Umurwa Mukuru Madrid n’indi mijyi y’iki gihugu

Madrid Puerta de Atocha–Almudena Grandes ni imwe muri gare za gari ya moshi zikomeye z’Umujyi wa Madrid, zifasha abagenzi kugera mu bice bitandukanye bya Espagne

Imihanda ya Madrid ihuza ibice bitandukanye by’umujyi, ikaba ifite ibyapa byerekana inzira zigana mu duce turimo Zaragoza na Calle Alcalá

Ibyapa byo ku mihanda yo muri Madrid biyobora abagenzi berekeza ku kibuga cy’indege, bikabafasha kumenya aho banyura bagana ku bice bitandukanye byacyo

Inyubako ndende zigezweho ziri mu bigaragaza iterambere ry’Umujyi wa Madrid, aho ubwubatsi bwa kijyambere buhuzwa n’inyubako zifite amateka

Madrid ifite imihanda migari n’ibiraro by’abanyamaguru, bigamije koroshya ingendo no guteza imbere umutekano w’abakoresha umuhanda

Ibyapa byo ku mihanda ya Madrid bigaragaza ibyerekezo bitandukanye, bigafasha abagenzi kumenya aho berekeza

Mu mihanda yo muri Madrid hashyizweho ibyapa biyobora abashoferi, bibereka ibyerekezo n’imihanda bashobora kunyuramo

Imihanda migari ya Madrid yorohereza urujya n’uruza rw’ibinyabiziga, ikanahuza ibice bitandukanye by’Umurwa Mukuru wa Espagne

Madrid ifite amaduka menshi acuruza impano n’ibikoresho by’urwibutso, birimo imyambaro n’ibindi biranga Espagne n’amakipe yayo y’umupira w’amaguru

Taxi-voiture ni bimwe mu binyabiziga byifashishwa mu gutwara abagenzi mu Mujyi wa Madrid, aho hari uburyo butandukanye bw’ingendo rusange

Imihanda yo muri Madrid ikikijwe n’inyubako zifite imiterere yihariye, zimwe muri zo zikaba zimaze imyaka myinshi zubatswe

Inyubako zifite amateka n’imiterere yihariye ziri mu biranga Madrid, Umurwa Mukuru wa Espagne, ukurura ba mukerarugendo baturutse hirya no hino ku Isi

Amaduka yo muri Madrid acuruza imyambaro y’abagabo n’ibindi bikoresho by’imirimbo, birimo karuvati, imikandara n’amashati

Mu maduka acuruza imyambaro muri Madrid, ibicuruzwa bishyirwa ahagaragara ku buryo abahisi n’abagenzi bashobora kubireba no kumenya ibiciro byabyo

Utumodoka duto tw’amapine atatu turi mu binyabiziga bikoreshwa mu gutembereza ba mukerarugendo basura ibice bitandukanye by’Umujyi wa Madrid

Madrid ifite amaduka acuruza imyambaro itandukanye, irimo amakote y’abagabo, agaragaza uruhare rw’ubucuruzi mu bukungu bw’uyu mujyi

Isoko rya ‘San Miguel’ riri i Madrid ni hamwe mu hantu hazwi cyane ku bashaka kumenya umuco. Rihuza abantu b’ingeri zitandukanye, bakabona aho basogongerera ibinyobwa n’ibiribwa gakondo

I Madrid uhasanga abanyabugeni ku mihanda bashushanya, nk’umwuga ubatunze kandi wubashywe cyane

Plaza Mayor hakorerwa n’ibitaramo rusange

Plaza Mayor ni ahantu hazwi cyane i Madrid, hahurira abakerarugendo cyangwa abandi basuye uyu mujyi

Uyu Mujyi urangwamo amaduka yihagazeho y’imikufi

Uyu Mujyi urangwamo amaduka yihagazeho y’imikufi

Ku mugoroba abantu baba batangiye kuganira basangira kamwe

Aho bagurira ibicuruzwa by'urwibutso, cyane cyane ku bakunda Football bakunze gusura iki gihugu

Mu gace kitaruye umujyi uko abahatuye habaho bitandukanye no mu mujyi cyane kuko haba hatuje

Hakizimana Gédéon ni Umunyarwanda utuye i Madrid. Yabwiye IGIHE ko ari ahantu heza mu kwiga cyangwa gukorera ubucuruzi

{{Karirima@igihe.com}}