Ishyirahamwe rya Cricket mu Rwanda ryahembye ababaye indashyikirwa mu 2019

Yanditswe na Eric Tony Ukurikiyimfura
Kuya 8 Werurwe 2020 saa 04:36
Yasuwe :
0 0

Pankaj Vekaria ukinira Kutchi Tigers CC mu bagabo na Ishimwe Henriette ukinira Indatwa Hampshire CC mu bagore, nibo bahembwe nk’abakinnyi bahize abandi muri Cricket mu mwaka w’imikino wa 2019.

Ibirori byo gutanga ibi bihembo byabereye muri Serena Hotel i Kigali ku wa Gatanu w’iki cyumweru.

Umwaka w’imikino wa 2019 muri Cricket, wasojwe mu Ugushyingo, aho Challengers CC yegukanye Igikombe cy’Icyiciro cya Mbere mu Bagabo, Spartans CC itwara iyo mu cyiciro cya kabiri.

Mu bagore, Shampiyona y’icyiciro cya mbere yatwawe na Charity Cricket Club mu gihe Queens of Victory Cricket Club ari yo yabaye iya mbere mu cyiciro cya kabiri.

Igikorwa cyo guhemba ababaye indashyikirwa muri uwo mwaka w’imikino, cyasize hashimiwe abakinnyi bitwaye neza, abatoza beza n’abandi bagize uruhare mu iterambere ry’uyu mukino.

Mu cyiciro cy’umukinnyi mwiza w’umwaka mu bagabo, mu Cyiciro cya Mbere “Player of the year Division 1” hahembwe Pankaj Vekaria ukinira Kutchi Tigers CC naho Mihir Bhat ukinira Indorwa CC aba umukinnyi mwiza mu Cyiciro cya Kabiri.

Mu bagore, umukinnyi witwaye neza mu Cyiciro cya Mbere yabaye Ishimwe Henriette ukinira Indatwa Hampshire CC, mu Cyiciro cya Kabiri aba Tuyizere Cynthia ukinira Ikipe ya Ndera Girls CC.

Umukinnyi ukizamuka mu bahungu yabaye Hakizimana Jean Baptitse wa Zonic Tigers CC mu gihe mu bakobwa, iki gihembo cyegukanywe na Ishimwe Gisèle ukinira Indatwa Hampshire CC.

Ikipe yitwaye neza mu bagabo mu Cyiciro cya Mbere yabaye Challengers CC, mu bagore iba Charity CC.

Mu cyiciro cy’ikipe yitwaye neza mu Cyiciro cya Kabiri mu bagabo yabaye Spartans CC naho mu bagore iba Queens of Victory. Izi akaba ari nazo zatwaye ibikombe bya shampiyona iterwa inkunga na Unimoni.

Umutoza w’umwaka yabaye Tuyizere Bosco wa Zonic Tigers CC, umusifuzi w’umwaka “Umpire of the year” yabaye Dusabemungu Hirwa Eric, umukorerabushake “Volunteer of the year” yabaye Gilies Opie naho Umunyamamakuru w’umwaka yabaye Bugingo Fidèle ukorera Imvaho Nshya.

Umuyobozi w’Ishyirahamwe rya Cricket mu Rwanda, Mugarura Eddy Baraba, yavuze ko iki gikorwa cyo gushimira abitwaye neza cyagenze neza ndetse baboneyeho gusangiza abanyamuryango b’iri shyirahamwe gahunda bafite muri uyu mwaka wa 2020.

Ati “Twashimiye abitwaye neza mu mwaka wa 2019 tunabasangiza gahunda dufite muri uyu mwaka wa 2020, kuko ni umwaka w’ingenzi muri Cricket y’u Rwanda, ni umwaka wa 20 uyu mukino ugeze mu gihugu.”

Ubuyobozi bw’Ishyirahamwe ry’Umukino wa Cricket mu Rwanda bwishimira ko ukomeje kugera ku Banyarwanda benshi, aho kuri ubu mu Ntara zose hari abawukina.

Kuri ubu, Cricket ikinwa mu mashuri agera kuri 106 mu turere twose two mu Rwanda mu gihe umwaka ushize w’imikino witabiriwe n’amakipe 24 haba mu cyiciro cya mbere n’icya kabiri mu bagabo n’abagore.

Umuyobozi ushinzwe Ibikorwa muri RCA, Byiringiro Emmanuel, mu muhango wo gutanga ibihembo by'abitwaye neza
Ibihembo byahawe ababaye indashyikirwa
Amakipe yitwaye neza mu mwaka ushize yarashimiwe
Bugingo Fidèle wabaye umunyamakuru w'umwaka
Umuyobozi w’Ishyirahamwe rya Cricket mu Rwanda, Mugarura Eddy Baraba
Ambasaderi w'u Buhinde mu Rwanda, Oscar Kerketta, ashyikiriza igihembo Ishimwe Henriette wabaye umukinnyi w'umwaka mu bagore bakina mu cyiciro cya mbere
Pankaj Vekaria wa Kutchi Tigers CC ni we wabaye umukinnyi w'umwaka mu bagabo

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .