Hakizumwami w’imyaka 14 azakora igeragezwa ry’ukwezi mu Ishuri Mpuzamahanga rya Tennis muri Kenya

Yanditswe na Eric Tony Ukurikiyimfura
Kuya 3 Nzeri 2019 saa 12:59
Yasuwe :
0 0

Umwe mu bakinnyi bakiri bato bari kuzamuka muri Tennis mu Rwanda, Hakizumwami Junior, agiye kumara ukwezi kumwe akora igeragezwa mu Ishuri Mpuzamahanga rya Tennis rya Nairobi muri Kenya.

Hakizumwami w’imyaka 14 ni umwe mu bana basaga 200 bafashwe n’Ishyirahamwe ry’Umukino wa Tennis mu Rwanda, muri gahunda yaryo ya ‘Junior Tennis Initiative’ yo gushaka abakiri bato bafite impano no kubateza imbere.

Iyi gahunda iri mu rwego rwo gushaka abakurikira bakuru babo baherutse gukora amateka yo kuzamuka mu cyiciro cya gatatu ubwo bitwaraga neza mu mikino ya Afurika ya Tennis yitwa “2019 Davis Cup Africa Zone Group IV” yabereye muri Congo Brazzaville mu mezi abiri ashize.

Hakizumwami yatoranyijwe mu bana bo ku Mugabane wa Afurika bazajya gukora igeragezwa mu Ishuri mpuzamahanga rya Tennis “International Tennis Federation Centre’ ry’i Nairobi muri Kenya.

Uretse iri shuri, Umugabane wa Afurika ufite kandi andi abiri yo ku rwego rwisumbuye, muri Afurika y’Epfo no muri Maroc, aho azamura impano z’abakinnyi b’intoranywa kuri uyu mugabane.

Uyu mwana uzakora igeragezwa mu gihe cy’ukwezi, kuri ubu ni nimero ya mbere mu karere kagizwe n’ibihugu 13 (u Rwanda, u Burundi, Tanzania, Kenya, Uganda, Sudani y’Epfo, Ethiopia, Seychelles, Comoros, Eritrea, Somalia, Djibouti na Centrafrique) mu gihe muri Afurika yose ari uwa 23 mu batarengeje imyaka 14.

Hakizumwami abaye kandi Umunyarwanda wa kane ugiye mu Ishuri mpuzamahanga rya Tennis nyuma ya Hagenimana Eric waciye mu ryo muri Afurika y’Epfo aho kuri ubu ari umutoza w’uyu mukino muri Leta Zunze Ubumwe za Amerika.

Hari kandi Habiyambere Ernest na we wanyuze muri iri shuri ry’i Nairobi mbere yo gukomereza mu ryisumbuyeho muri Maroc akavamo umukinnyi uri mu baheruka kwitwara neza muri Congo Brazzaville.

Tuyishimire Fabrice ni we uheruka muri iri shuri rya Tennis ryo muri Kenya, aho kuri ubu aserukira igihugu ndetse akaba yiga muri IPRC.

Hakizumwami yerekeje muri Kenya ku Cyumweru ndetse Ubuyobozi bw’Ishyirahamwe ry’Umukino wa Tennis mu Rwanda buvuga ko bwizeye ko azatsinda iri geragezwa agakomeza gufashwa kuzamura impano ye ku rwego rwisumbuye.

Uyu mukinnyi ari mu bana bafashije u Rwanda kubona itike y’Igikombe cya Afurika cyabereye muri Maroc mu mwaka ushize.

Hakizumwami Junior w'imyaka 14, agiye kumara ukwezi kumwe akora igeragezwa mu Ishuri Mpuzamahanga rya Tennis riri i Nairobi
Hakizumwami yatanze icyifuzo ko abakiri bato barushaho guhabwa imyitozo n'amarushanwa menshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza