Urugendo rwa Maniraguha George Lewis kugera muri Arsenal; Visit Rwanda yaba yaragize uruhare mu igurwe rye?

Yanditswe na Eric Tony Ukurikiyimfura
Kuya 19 Kanama 2020 saa 09:34
Yasuwe :
0 0

Irushanwa ryo muri Norvège ryanyujijwe kuri televiziyo muri Mutarama n’ijisho ry’urambagiriza abakinnyi Arsenal, biri mu byafunguriye amarembo Umunyarwanda Maniraguha George Lewis uzakinira iyi kipe yo mu Premier League kugeza mu 2022.

Ku wa Kabiri nibwo Arsenal yemeje ko yasinyije George Lewis w’imyaka 20, ukina ku mpande asatira izamu.

Urugendo rwe rwatangiye ubwo yasubiraga mu Mujyi umuryango we utuyemo kugira ngo akore igeragezwa mu ikipe ya Fløya yari izamutse mu cyiciro cya gatatu muri Norvège muri uyu mwaka w’imikino.

George Lewis avuga ko Arsenal yatangiye kumwifuza nyuma yo kwigaragaza mu irushanwa rya iTromsø rikinwa buri kipe igizwe n’abakinnyi icyenda, hagakinwa iminota 25 ndetse rikaba ryarabaye ku nshuro ya mbere uyu mwaka hagati ya tariki ya 24 n’iya 26 Mutarama rihuje amakipe umunani ya mbere mu Majyaruguru ya Norvège.

Ati “Hari igihe amahirwe aza mu buryo utari witeguye, nyuma ya iTromsø Cup, nahise mbona ubutumwa ko Arsenal inshaka, Mu ntangiriro, ntabwo nabyizeye, nyuma y’igihe nibwo nabonye ko ari ukuri.”

“Umujyanama wanjye unshakira amakipe (Arfan Rehman) aba mu Bwongereza, rero yavuganaga n’amakipe menshi yo muri icyo gihugu. Nari mbizi ko Arsenal inyifuza nyuma yo kumbona mu irushanwa, dutangira kuvugana. Ntabwo byari byoroshye kubyizera.”

Uyu mukinnyi yakomeje avuga ko yungukiye mu kuba hari abakinnyi benshi baherukaga gusezererwa muri Académie ya Arsenal, byatumye n’abarambagiza abakinnyi bahinduka.

Ati “Uwahoze ashakira abakinnyi Arsenal yari yarabonye amashusho yanjye ubwo nakiniraga Tromsø we akorera Chelsea, rero aza kunyibuka nubwo hari imyaka mike yari ishize.”

“Yavuganye n’abarambagiriza Arsenal muri Scandinavia, baramubwira ngo “ntabwo ari we twifuza, nta mikino yakinnye”. Ku bw’amahirwe kuri njye, uwo muntu yari yankunze, yirengagiza ibyo bamubwiye aranzana. Imyitozo yanjye ya mbere n’abatarengeje imyaka 23 yagenze neza, ngenda nzamura urwego kugeza n’uyu munsi.”

Muri Gashyantare hagati, Lewis yafashe indege imujyana mu Bwongereza. Bwa mbere, yabanje gukora icyumweru kimwe mu ikipe y’abatarengeje imyaka 23 ya Ipswich nyuma yerekeza muri Arsenal.

Ati “Nagombaga kumarana icyumweru na Arsenal, ariko igihe kirongerwa kugeza ku minsi 14.”

“Nagize icyumweru cyiza nitozanya n’abatarengeje imyaka 23, bashakaga kumbona ku rwego rwisumbuye kandi nakoranye n’ikipe ya mbere imyitozo inshuro imwe ubwo nari hariya.”

George Lewis Igaba-Ishimwe Maniraguha nk’uko amazina ye yose ameze, yujuje imyaka 20 ku wa 16 Kamena. Avuga ko yashimishijwe no gukorana n’abarimo Pierre-Emerick Aubameyang, Mesut Özil, Nicolas Pépé, Alexander Lacazette n’abandi bakinnyi ba Arsenal.

Mu 2018, yasinye amasezerano ye ya mbere nk’uwabigize umwuga hamwe n’ikipe ya TUIL (Tromsdalen UIL), akina imikino itatu asimbuye mu cyiciro cya kabiri muri Norvège.

Muri Gicurasi 2019, yahisemo gusesa amasezerano na TUIL ndetse muri iyo mpeshyi yerekeje muri Fram Larvik yo mu cyiciro cya gatatu, aho yakinnye imikino ibiri nk’umusimbura.

Umukino we wa mbere yabanjemo ku rwego rwisumbuye ni uwo yakiniye mu ikipe ya kabiri ya Tromsdalen mu cyiciro cya gatanu cyo muri Norvège.

Ati “Bayarangoye kubona aho menera. Nari muri Tromsø (TIL) mu ntangiriro, mbona bitagenda neza ndahava njya muri Tromsdalen (TUIL) ariko naho ntabwo nabonye icyizere nashakaga mpitamo gusesa amasezerano.”

George Lewis avuga ko kwerekeza muri Arsenal ari inzozi zibaye impamo kuko we n’umuryango we bakunda iyi kipe.

Lewis azimukira mu nzu nshya iri hafi ya St.Alban i Boreham Wood, hatari kure cyane y’ikibuga cya London Colney, aho Arsenal ikorera imyitozo.

George Lewis yavukiye i Kigali mu Rwanda. Umuryango we werekeje muri Tanzania ubwo yari afite umwaka umwe mu gihe ubwo yari yujuje imyaka ine, aribwo umuryango werekeje i Tromsø.

Avuga ko ntacyo yibuka ku Rwanda ndetse ku bwe yiyumva nk’Umunya-Norvège.

Ati “Ikintu nibuka kuri iki gihugu ni ibyo ababyeyi banjye bambwiye. Mbere na mbere ndi umwana w’i Tromsø. Niho nakuriye kandi niho nabaye ubuzima bwanjye bwose.”

Visit Rwanda ni umwe mu bafatanyabikorwa b’imena ba Arsenal. Uyu mukinnyi avuga ko nta ruhare yabigizemo kugira ngo yerekeze muri iyi kipe yo mu Bwongereza.

Ati “Nabibonye mu itangazamakuru, hari abantu babyanditseho. Ntabwo njya mbitindaho. Bansinyishije kubera ubushobozi bwanjye nk’umukinnyi kandi ni ku bwanjye ho kwerekana ko nahawe umwanya nkwiye hano.”

Lewis yakomeje avuga ko afite icyizere cyinshi ndetse ashaka kwigira ku barimo Gabriel Martinelli na Nicolas Pépé.

Ati “Ndabizi ko abantu benshi banshidikanyaho, ariko reka dutegereza tuzareba. Igihe kizababwira.”

Uwari inshuti ye bakinannye muri Tromsø, Bryan Fiabema w’imyaka 17, yasinyiye Chelsea mu Ukuboza umwaka ushize mu gihe Isak Hansen-Aarøen bava mu gace kamwe, byitezwe ko azasinyira Manchester United muri uku kwezi.

George Lewis Igaba-Ishimwe Maniraguha yasinye imyaka ibiri n'igice muri Arsenal
George Lewis avuga ko ibyo azi ku Rwanda yabibwiwe n'ababyeyi be

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .