Arsenal yasinyishije Umunyarwanda George Lewis, asezeranya abafana ibirori mu kibuga

Yanditswe na Eric Tony Ukurikiyimfura
Kuya 18 Kanama 2020 saa 07:26
Yasuwe :
0 0

Arsenal yo mu Cyiciro cya Mbere mu Bwongereza yatangaje ko yasinyishije Umunyarwanda George Lewis ugiye gukina mu ikipe yayo y’abatarengeje imyaka 23.

George Lewis Igaba-Ishimwe Maniraguha w’imyaka 20, yavukiye i Kigali, yerekeza muri Norvège akiri muto aho yakuriye mu ikipe y’abato ya Tromso IL.

Nyuma yo kuva muri Tromso, Lewis ukina ku mpande asatira izamu, yerekeje muri Tromsdalen na Fram Larvik yakinnyemo kugeza ku mpera z’umwaka ushize w’imikino.

Nyuma yo guhabwa amasezerano y’imyaka ibiri n’igice nk’uwabigize umwuga, uyu mukinnyi yavuze ko yishimiye kwisanga muri iyi kipe yo mu Bwongereza.

Ati “Oya, mu kuri biragoye kubyiyumvishira. Ni ibyo kwishimira muri aka kanya.”

George Lewis yijeje abafana ba Arsenal ibyishimo bigendanye n’imikinire ye yuje amacenga menshi.

Ati “Uburyo bw’imikinire yanjye burihuse. Nkunda gucenga cyane, nkunda kwigaragaza mu kibuga, ku bw’ibyo rero banyitegeho ibirori.”

“Umuryango wanjye wose ukunda Arsenal. Ubwo nakuraga, narebaga abakinnyi nka Adebayor, yari icyitegererezo kuri njye kimwe na Thierry Henry.”

“Icyo nshaka kugeraho birumvikana ko ari ugukinira ikipe ya mbere ya Arsenal nkabona imikino myinshi, ibitego nkanatanga imipira kuri bagenzi banjye.”

George Lewis yavuze ko yatangiye gukina afite imyaka itanu mu ikipe ya Stakkevollan IF kugeza ubwo yagiraga imyaka 12 we n’umuvandimwe we bakajya muri Tromso yari mu cyiciro cya mbere icyo gihe.

Arsenal yasinyishije George Lewis Igaba-Ishimwe Maniraguha
George Lewis w'imyaka 20, yasezeranyije ibyishimo abafana ba Arsenal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .