Ibyavuye mu biganiro byahuje Umuyobozi wa SKOL n’abahagarariye Rayon Sports

Yanditswe na Eric Tony Ukurikiyimfura
Kuya 17 Gicurasi 2020 saa 12:03
Yasuwe :
0 0

Kuwa Gatandatu tariki ya 16 Gicurasi nibwo habaye ibindi biganiro byahuje Umuyobozi w’uruganda rwa SKOL, Ivan Wulffaert n’abahagariye Rayon Sports, Dr Rwagacondo Emile Claude na Muvunyi Paul.

Ibi biganiro bigamije kugarura umwuka mwiza hagati y’impande zombi nyuma y’uko mu minsi ishize ubuyobozi bwa Rayon Sports bwavugaga ko bushobora gutandukana n’umuterankunga wayo mukuru, SKOL.

Akanama ngishwanama k’abantu barindwi barimo Muvunyi Paul na Dr Rwagacondo Emile Claude, kahawe ububasha bwo gukora ibifitiye ikipe akamaro, gatafanyije na Komite Nyobozi yayo, ku isonga kasabwe gukemura ikibazo cya Rayon Sports na SKOL.

Ku wa Gatandatu, Muvunyi na Rwagacondo bagiranye ibiganiro na Ivan Wulffaert uyobora SKOL ndetse uru ruganda rubinyujije ku rubuga rwa Twitter, rwatangaje ruti“Twishimiye gutangaza ko ibiganiro hamwe na Rayon Sports biri kugenda neza.”

Ubusanzwe, impande zombi zifitanye amasezerano avuga ko Rayon Sports ihabwa miliyoni 66 Frw ku mwaka. Gusa hari amafaranga iyi kipe yagurijwe n’umuterankunga wayo mbere y’uko uyu mwaka w’imikino utangira, arimo miliyoni 30 Frw zo ku wa 25 Nyakanga zaje zisanga miliyoni 3.8 Frw zo mu mwaka w’imikino wa 2018/19.

Amakuru IGIHE yamenye ni uko impande zombi zemeranyijwe ko SKOL iha Rayon Sports amafaranga yari yasigaye muri uyu mwaka w’imikino wa 2019/20 asaga miliyoni 32 Frw.

Umuyobozi wa SKOL yemeye ko ayo mafaranga yasigaye azatangwa bitarenze mu minsi ibanza y’icyumweru gitaha ku buryo Rayon Sports izahemba abakinnyi bayo baheruka umushahara muri Mutarama ndetse bakaba barahagarikiwe amasezerano uhereye mu kwezi gushize.

Impande zombi zemeranyijwe ko kandi Rayon Sports ikomeza kuba ikipe yambara imyenda ihenze mu gihugu, agaciro k’imyambaro ihabwa na SKOL kakava kuri miliyoni 20 Frw, ikajya ihabwa iya miliyoni 25 Frw buri mwaka w’imikino.

Haganiriwe kandi ku bijyanye no gusinya amasezerano, hakagira ibihindurwa mu masezerano y’imyaka itanu yasinywe mu 2017, yagombaga kurangira mu 2022.

Rayon Sports yifuza ko SKOL yajya iyiha miliyoni 150 Frw zivuye kuri miliyoni 66 Frw, ndetse igakomeza kuyigenera ubundi bufasha isanzwe iyiha.

Kuri iyi ngingo, IGIHE yamenye ko nta bwumvikane burabaho ndetse hateganyijwe ibindi biganiro bizahuza impande zombi hagati yo kuwa Mbere no ku wa Kabiri, aho byitezwe ko aribwo hazafatwa umwanzuro.

Indi nkuru wasoma: Uruhare rwa SKOL mu mikoranire yayo na Rayon Sports

Uhereye ibumoso ni Dr Emile Claude Rwagacondo, Ivan Wulffaert uyobora SKOL na Muvunyi Paul- nyuma y'ibiganiro byabahuje ku wa Gatandatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .