Uruhare rwa SKOL mu mikoranire yayo na Rayon Sports

Yanditswe na Eric Tony Ukurikiyimfura
Kuya 18 Gashyantare 2020 saa 12:54
Yasuwe :
0 0

Kuva muri Gicurasi 2014, Uruganda rwenga ibinyobwa bisembuye n’ibidasembuye rwa SKOL, ni umufatanyabikorwa wa mbere wa Rayon Sports ikina mu cyiciro cya mbere cy’umupira w’amaguru mu Rwanda.

Mbere y’uko impande zombi zitangira gukorana, Rayon Sports yarimo ibibazo bitandukanye by’amikoro ndetse hari nyuma y’uko iyi kipe yari yaravuye mu Mujyi wa Kigali ikajya kuba i Nyanza.

Rayon Sports yamamaza SKOL binyuze ku myambaro yambara no mu bindi bikorwa byayo mu gihe uru ruganda rufasha iyi kipe mu bikorwa bitandukanye.

Umuvugizi w’iyi kipe, Nkurunziza Jean Paul yabwiye IGIHE ko bishimira uko bakorana n’uyu mufatanyabikorwa wabo mukuru ndetse bizeye ko bazakomeza gukorana nubwo hari ibishobora kuvugurwa mu masezerano.

Ati "SKOL ni umufatanyabikorwa wacu mukuru tumaranye igihe. Kugeza kuri uyu munota twebwe ibyo iduha ibikora neza. Amasezerano yacu avuga ko dushobora kuyavugurura kandi twizera ko ibiganiro bizagenda neza tugakomeza gukorana."

Ku ruhande rwa SKOL, Ubuyobozi bwayo buvuga ko bwishimira gukorana na Rayon Sports, aho kuva batangiye ubufatanye n’iyi kipe umubare w’abagura ibinyobwa byayo wiyongereye ndetse akaba ari na byo binyobwa gusa mu bikorwa bihuza abafana ba Rayon Sports.

Imiterere y’amasezerano ya Rayon Sports na SKOL

Tariki ya 15 Gicurasi 2014 nibwo Rayon Sports yasinyanye amasezerano y’imyaka itatu na SKOL yemeye kujya itanga miliyoni 47 Frw buri mwaka muri iyi kipe.

Mu 2017, nibwo hasinywe amasezerano mashya ya miliyoni 66 Frw buri mwaka mu gihe cy’imyaka itanu.

SKOL itanga miliyoni 1 Frw ku kwezi y’ikirango cyayo kiri ku modoka ya Rayon Sports ndetse n’ibikoresho Rayon Sports yifashisha ku kibuga haba ku mikino cyangwa mu myitozo.

Rayon Sports ishobora kandi kuguza amafaranga muri SKOL mu gihe iyakeneye mu bikorwa bitandukanye byihutirwa, ikagira uburyo iyishyuramo binyuze mu masezerano ifitanye n’uyu muterankunga wayo.

Uru ruganda rwemereye Rayon Sports miliyoni 6 Frw mu gihe cyose yegukanye Igikombe cy’Amahoro, rutanga kandi miliyoni 20 Frw zo kugura imyambaro y’ikipe buri mwaka w’imikino.

Amafaranga uru ruganda rw’ibinyobwa rwatanze kuva mu 2014 kugeza mu 2017 ubwo havugurwaga amasezerano asaga miliyoni 141 Frw.

Mu myaka ibiri yakurikiyeho, hari ibyiyongereyemo bitandukanye birimo kuba Rayon Sports yaratwaye Igikombe cy’Amahoro mu 2016, igahabwa miliyoni 6 Frw no kuba yaraguze imodoka igendamo guhera mu mwaka ushize ikaba ihabwa miliyoni 1 Frw buri kwezi, aho kuri ubu imaze guhabwa asaga miliyoni 12 Frw.

Ugereranyije ayatanzwe muri iyi myaka ibiri iheruka, agera muri miliyoni 145 Frw mu gihe hari n’agera kuri miliyoni hafi 100 Frw yatanzwe mu kwambika Rayon Sports kuva itangiye gukorana na SKOL, ukongeraho n’ayo uru ruganda rwagurije ikipe mu mwaka ushize, ariko ataratangajwe.

Ufashe aya mafaranga akubiye mu masezerano y’impande zombi, usanga kuva mu 2014, SKOL yarahaye Rayon Sports asaga miliyoni 390 Frw kugeza mu mwaka ushize mu gihe imibare yemewe yatangajwe na SKOL, igaragaza ko imaze guha Rayon Sports asaga miliyoni 500 Frw kongeraho n’ubundi bufasha butabarirwa mu mafaranga burimo ikibuga n’amacumbi by’abakinnyi.

SKOL yubakiye Rayon Sports ikibuga, amacumbi n’akabari

Tariki ya 29 Nzeri 2017, nibwo SKOL yatashye ikibuga y’ubwatsi bwiza bw’ubuterano cyubatse mu Nzove kuri uru ruganda, cyuzuye gitwaye hafi miliyoni 100 Frw ndetse igishyikiriza Rayon Sports.

Iyi kipe yari imaze iminsi nta kibuga cyihariye igira cyo gukoreraho imyitozo ndetse yakodeshaga kenshi ibibuga byo gukoreraho, aho nka Stade Mumena yakodeshwaga ibihumbi 200 Frw ku kwezi.

Kuri iki kibuga, SKOL yahubatse kandi akabari ka “Rayon SKOL BAR”, aho amafaranga gacuruza binyuze mu bafana bitabira imyitozo y’ikipe muri aka gace cyangwa abahaturiye, yose ajya muri iyi kipe.

Tariki ya 14 Nyakanga mu mwaka ushize, SKOL yashyikirije kandi Rayon Sports amacumbi afite ubushobozi bwo kwakira abakinnyi 40.

Aya macumbi ari mu nzu ebyiri zigerekeranye yubatse mu Nzove hafi y’ikibuga. Inzu yo hasi ifite imiryango itatu, aho harimo umuryango wa mbere ugizwe n’igitanda kimwe gishobora kuryamamo abantu babiri, cyagenewe umutoza, undi muryango urimo ibitanda by’abakinnyi ndetse n’umuryango ukorerwamo inama y’ikipe iri kwitegura umukino.

Hari kandi aho abakinnyi bogera bavuye mu myitozo mbere y’uko bahindura imyenda, ivuriro rito ndetse n’igikoni gitunganyirizwamo ibyo abakinnyi barya mu gihe bari mu Nzove.

Hejuru y’ibi, Skol igira kandi uruhare no mu bikorwa by’abafana ba Rayon Sports birimo igihembo cy’umukinnyi w’ukwezi wa Rayon Sports, cyatangijwe n’itsinda ry’abafana “March’ Generation”.

Ubwo Rayon Sports yasohokeraga u Rwanda muri CAF Champions League muri Kanama 2019, muri Sudani, SKOL yashyizeho itike y’indege ku mufana wahize abandi mu mwaka ushize w’imikino.

Hari kandi abafana 29 baguriwe amatike yo kurebera imikino Rayon Sports yakiriye mu manya y’icyubahiro muri uyu mwaka w’imikino wa 2019/20 bitewe n’uko mu mwaka ushize w’imikino barebye imikino yose iyi kipe yakinnye muri Shampiyona.

SKOL imaze imyaka itandatu ikorana na Rayon Sports
Abafana ba Rayon Sports bishyuriwe na SKOL amatike yo kureba imikino yayo
SKOL yakiriye abakinnyi ba Rayon Sports ubwo batsindiraga kugera mu matsinda ya CAF Confederation Cup mu 2018
Umuyobozi w’uruganda rwenga ibinyobya ‘Skol Brewery Ltd Rwanda’, Ivan Wullfaert ashimira abakinnyi ba Rayon Sports muri Mata 2018
Mu 2017 nibwo SKOL yahaye Rayon Sports akabari n'icyokezo
Rayon Skol Bar yegeranye n'ikibuga ikipe ikoreraho imyitozo mu Nzove
Umuyobozi w’uruganda rwenga ibinyobya ‘Skol Brewery Ltd Rwanda’, Ivan Wullfaert, ashyikiriza urufunguzo rw'amacumbi Muvunyi Paul wayoboraga Rayon Sports
SKOL yubakiye abakinnyi ba Rayon Sports amacumbi bashobora kwifashisha mu gihe bakoze imyitozo kabiri ku munsi mu Nzove
Uwari Umuyobozi wa Rayon Sports, Muvunyi Paul, ashyikiriza umuyobozi wa Skol igikombe cya Shampiyona iyi kipe yegukanye mu mwaka ushize w'imikino
SKOL igira uruhare mu bikorwa bitandukanye bya Rayon Sports birimo n'ibitegurwa n'abafana nk'igikorwa cyo guhemba umukinnyi w'ukwezi cyatangijwe na March' Generation

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .