Harabura iminsi itandatu inzibacyuho muri Rayon Sports ikarangira; amatora azakorwa gute?

Yanditswe na Eric Tony Ukurikiyimfura
Kuya 19 Ukwakira 2020 saa 09:24
Yasuwe :
0 0

Mu gihe iminsi 30 yahawe Komite y’inzibacyuho muri Rayon Sports izarangira ku wa Gatandatu tariki ya 24 Ukwakira, Murenzi Abdallah uyobora iyi kipe, yavuze ko bakiri kuganira n’Urwego rw’Igihugu rw’Imiyoborere (RGB) kugira ngo barebere hamwe igihe hazabera amatora n’abagomba kuyitabira.

Murenzi Abdallah yabivuze ku wa Gatandatu ubwo yaganiraga n’itangazamakuru nyuma y’inama y’Inteko Rusange isanzwe yahuje abanyamuryango ba FERWAFA ku Gisozi.

Ati “Ku bufatanye na RGB turimo kureba, ese inteko itora yaba igizwe na bande? Yazaba ryari? Abatorwa bo baturuka mu nteko birumvikana, aka kanya ntiwavuga abakandika kuko bazaba bari mu matora, abo abanyamuryango bazashima mu nteko itora nibo bazahabwa icyo cyizere.”

Ubwo RGB yagaragazaga ibyavuye mu isesengura yakoze ku Muryango Rayon Sports mu kwezi gushize, yavuze ko yasanze harimo ikibazo ku kumenya umunyamuryango wemewe kuko “Hari abanyamuryango bagaragaye ko bemewe mu 2013, hari n’abandi bavuga ko ari abanyamuryango bari muri za Fan Club.”

Umukuru wa RGB, Dr Usta Kaitesi yagize ati “Twasanze harimo ikibazo cy’abanyamuryango.”

Mu nshingano zahawe Komite y’Inzibacyuho ya Rayon Sports, iyobowe na Murenzi Abdallah kuva ku wa 24 Nzeri, harimo kunoza amategeko y’Umuryango no kuyahuza n’itegeko rigenga imiryango itari iya Leta; gushyiraho inzego z’umuryango ziteganywa n’amategeko no gukurikirana umunsi ku wundi ibikorwa bya Rayon Sports FC.

Hari kandi gutegura imbonerahamwe ngengamikorere y’umuryango n’ibikorwa byawo; gushyiraho uburyo buboneye bwo gukurikirana imikoreshereze y’umutungo w’umuryango no gucunga umutungo w’umuryango mu gihe cy’inzibacyuho.

Hamaze gukorwa iki?

Murenzi Abdallah avuga ko ibyinshi mu byo basabwaga gukora byamaze kugerwaho ndetse n’ibisigaye bizakorwa muri iki cyumweru cya nyuma.

Ati “Ibyinshi bimaze gushyirwa mu bikorwa cyane ibijyanye n’imiyoborere, ibisigaye ni ibirebana n’abafatanyabikorwa by’umwihariko abafatanyabikorwa bacu ubona bakirimo guseta ibitenge.”

“Ikindi ni abakinnyi bamwe tugomba gusinyisha bataragera aha, ariko tukizera ko tuzajya gusoza tariki ya 24 Ukwakira byagezweho.”

“Ibirebana n’amategeko nabyo birimo biraganirwaho natwe nka Komite n’abandi bajyanama batandukanye mu by’amategeko ku buryo nabyo bizasoza muri iki cyumweru.”

Mu ntangiriro z’uku kwezi nibwo Rayon Sports yashyize hanze itangazo rigenewe abanyamakuru, rivuga ko yamaze kumvikana na SKOL ku masezerano mashya.

Icyo gihe hari amakuru y’uko aya masezerano yavuguruwe habura imyaka ibiri ngo arangire, yari gusinywa bitarenze iminsi itatu, ariko kugeza magingo aya ntibiragerwaho.

Komite y’inzibacyuho ya Rayon Sports yakoze inama n’abafana bibumbiye muri Fan Club zigera kuri 40 n’abahoze mu buyobozi bw’iyi kipe hagamijwe kongera guhuriza hamwe ndetse izi mpande zose zari ziyemeje gukusanya asaga miliyoni 33 Frw yo gushyigikira ikipe.

Ibi byiyongeraho kuba iyi kipe yaramaze kubona ibiro izajya ikoreramo ku Kimihurura mu Karere ka Gasabo ndetse ikaba ikomeje kugura abakinnyi bashya.

Murenzi Abdallah yavuze ko bari kuganira na RGB ku buryo amatora muri Rayon Sports azabamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .