Rayon Sports yakiriye Ourega wavuye muri TP Mazembe

Yanditswe na Eric Tony Ukurikiyimfura
Kuya 14 Ukwakira 2020 saa 11:17
Yasuwe :
0 0

Umukinnyi mushya wa Rayon Sports, Umunya-Côte d’Ivoire Jean Vital Ourega ukina mu kibuga hagati, yageze mu Rwanda ku wa Kabiri.

Jean Vital Ourega w’imyaka 24 ni umwe mu bakinnyi babiri Tout Puissant Mazembe yo muri Repubulika Iharanira Demokarasi ya Congo yatije Rayon Sports mu gihe cy’umwaka umwe.

Uyu mukinnyi wageze i Kigali ku wa Kabiri, yahise ajyanwa mu kato muri The Mirror Hotel, aho byitezwe ko akavamo kuri uyu wa Gatatu.

Mugenzi we bazazana muri Rayon Sports, Umunye-Congo Robert Mbelu w’imyaka 24, na we ategerejwe mu Rwanda mu mpera z’iki cyumweru nyuma y’uko hari ibyangombwa agishaka.

Umuyobozi w’inzibacyuho wa Rayon Sports, Murenzi Abdallah, aherutse kuvuga ko andi mazina ategerejwe muri iyi kipe harimo rutahizamu w’Umunya-Mali, Moussa Camara, wigeze gukinira iyi kipe hagati ya 2016 na 2017, aho kuri ubu akina muri Oman ndetse na rutahizamu w’Umunya-Rwanda Biramahire Abeddy kuri ubu ukinira Buildcon FC yo muri Zambia.

Murenzi yavuze ko nubwo Fiston Abdoulrazaq ahakana ibyo kwerekeza muri Rayon Sports, hari ibiganiro byabayeho hagati y’impande zombi, ariko mu gihe Moussa Camara yagera muri iyi kipe, uyu Murundi ntazaba agikenewe.

Kuva hashyizweho Komite y’Inzibacyuho muri Rayon Sports, hamaze kugurwa abakinnyi babiri bashya, myugariro wo hagati Niyigena Clément wari intizanyo ya APR FC muri Marines FC ndetse n’umunyezamu Bashunga Abouba wari warasinyiye Mukura Victory Sports, ariko akazahabwa ibyangombwa na Buildcon FC yo muri Zambia, yakiniraga mu mwaka ushize w’imikino.

Aba bombi biyongera kuri rutahizamu Sugira Ernest wongeye gutirwa muri APR FC mu gihe cy’umwaka umwe.

Jean Vital Ourega yageze i Kigali ku wa Kabiri, aho aje gukinira Rayon Sports nyuma yo gutizwa na TP Mazembe
Robert Mbelu na we ategerejwe i Kigali mu mpera z'iki cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .