CAN 2019: Abatoza batandatu bamaze kwirukanwa nyuma yo gusezererwa mu Gikombe cya Afurika

Yanditswe na Eric Tony Ukurikiyimfura
Kuya 17 Nyakanga 2019 saa 10:38
Yasuwe :
0 0

Kutabasha kugera ku ntego bihaye n’ibyo basabwe ubwo bahabwaga amakipe batozaga birimo kwitwara neza cyangwa kwegukana Igikombe cya Afurika biri mu bitumye kugeza ubu abatoza batandatu bamaze gutandukana n’ibihugu batozaga mu Gikombe cya Afurika kiri kubera mu Misiri.

Umutoza wa Cameroun, Clarence Clyde Seedorf n’umwugiriza we Patrick Stephan Kluivert baraye birukanwe n’Ishyirahamwe ry’Umupira w’Amaguru muri iki gihugu, FECAFOOT, nyuma yo kwicarana na Minisiteri ya Siporo bagasesa amasezerano y’aba Baholandi bari bamaze amezi 11 kuri aka kazi.

Cameroun yatwaye igikombe cya Afurika mu 2017, ntiyahiriwe mu Misiri, aho yasezerewe itarenze 1/8 nyuma yo gutsindwa na Nigeria ibitego 3-2 bituma aba batoza bahawe akazi muri Kanama 2018 basezererwa.

Guinée na yo yirukanye umutoza

Ku wa Mbere w’iki Cyumweru, Guinée yatandukanye n’umutoza Paul Put nyuma yo gusezererwa ataranze 1/8 cy’iri rushanwa riri kubera mu Misiri.

Paul Put yari amaze amezi 16 gusa ahawe iyi kipe ya Syli National.

Namibia yatandukanye na Ricardo Mannetti

Namibia yari mu itsinda rimwe na Maroc, Afurika y’Epfo na Côte d’Ivoire igatsindwa imikino yose, na yo yatandukanye n’umutoza Ricardo Mannetti w’imyaka 44 ndetse yahise asimbuzwa Bobby Samaria.

Tanzania yatandukanye na Amunike

Tanzania na yo yasezerewe mu gikombe cya Afurika nta mukino n’umwe itsinze, aho yatakaje iyo yahuyemo na Algérie, Sénégal na Kenya, yamaze gutandukana n’umutoza w’umunya-Nigeria Emmaneul Amunike.

Umurundi Ndayiragije Étienne kuri ubu uri gutoza Azam FC muri CECAFA Kagame Cup ni we wahawe gusigarana Taifa Stars by’agateganyo.

Misiri yabimburiye ibindi bihugu kwirukana umutoza

Tariki ya 7 Nyakanga, Misiri yabaye igihugu cya mbere cyirukanye umutoza mu byakinnye Igikombe cya Afurika uyu mwaka, nyuma y’uko ikipe yari mu rugo isezerewe itarenze 1/8.

Umutoza wayo Javier Aguirre yahise asezerwa ndetse na Perezida w’ishyirahamwe ry’umupira w’Amaguru mu Misiri, Hani Abou Rida yegura ku mirimo ye.

Uganda yatandukanye n’umutoza wayifashije kugira ibihe byiza

Uganda yavuye mu gikombe cya Afurika isezerewe na Sénégal muri 1/8, yatandukanye na Sebastien Desabre ku bwumvikane bw’impande zombi zemeye gusesa amasezerano zari zifitanye.

Uganda yari yabashije gusoza ari iya kabiri mu itsinda yarimo hamwe na Misiri, Repubulika Iharanira Demokarasi ya Congo na Zimbabwe,

Desabre wari warahawe akazi na Uganda guhera mu Ukuboza 2017, nyuma y’uko atoje amakipe atandukanye yo muri Côte d’Ivoire, Cameroun, Tunisie, Leta Zunze Ubumwe z’Abarabu, Algérie, Maroc na Misiri, yahise agirwa umutoza mushya wa Pyramids Football Club yo mu Misiri.

Hervé Renard ashobora kwisanga hanze

Ahazaza h’umutoza Hervé Renard ufite agahigo ko kuba ari we mutoza wabashije gutwara igikombe cya Afurika ari mu bihugu bibiri bitandukanye ntabwo karamenyekana.

Uyu mutoza wa Maroc ashobora gusezererwa nyuma y’uko iki gihugu gisezerewe mu gikombe cya Afurika gitsinzwe na Bénin muri 1/8 kuri penaliti.

Renard w’imyaka 50, yatwaye Igikombe cya Afurika mu 2012 ari umutoza wa Zambia, yongera kugitwara mu 2015 ari umutoza wa Côte d’Ivoire.

Clarence Clyde Seedorf n’umwugiriza we Patrick Stephan Kluivert baraye birukanwe na Cameroun
Javier Aguirre ntiyabashije kugeza kure Misiri, ahita asezererwa
Paul Put yirukanywe na Guinée ku wa Mbere w'iki cyumweru
Sebastien Desabre yasheshe amasezerano yari afitanye na Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza