Algérie yatsinze Sénégal yegukana igikombe cya Afurika ku nshuro ya kabiri (Amafoto)

Yanditswe na Eric Tony Ukurikiyimfura
Kuya 20 Nyakanga 2019 saa 12:27
Yasuwe :
0 0

Igitego kimwe rukumbi cyo mu minota ya mbere y’umukino cyahesheje Algérie igikombe cya CAN 2019, itsinda Sénégal 1-0 ku mukino wa nyuma wabereye kuri Stade Mpuzamahanga ya Cairo kuri uyu wa Gatanu.

Uyu mukino wabimburiwe n’ibirori byo gusoza irushanwa ryari rimaze ibyumweru bine, aho harashwe ibishashi mu kirere cyo mu Mujyi wa Cairo.

Abasaga ibihumbi 60 bari muri Stade Mpuzamahanga ya Cairo basusurukijwe kandi n’abahanzi barimo umunya-Ghana Fuse ODG n’umunyamisirikazi Donia Samir Ghanem baririmbye mu gihe cy’iminota 15.

Umukino watangiye saa 21:00, uhuza Algérie yari ifite igikombe kimwe cy’iri rushanwa yatwaye mu 1990 na Sénégal itaragitwara na rimwe ndetse yatsindiwe ku mukino wa nyuma na Cameroun mu 2002 ubwo Aliou Cissé uyitoza yari akiri umukinnyi.

Algérie yafunguye amazamu ku munota wa gatatu w’umukino ku ishoti rikomeye ryatewe na Baghdad Bounedjah, umupira ukorwaho na myugariro Salif Sané uhindura icyerekezo maze uruhukira mu izamu kuko Alfred Gomis yari yigiye imbere.

M’Baye Niang yahushije uburyo bubiri bw’ingenzi Sénégal yabonye, aho yateye ishoti rikomeye mu minota ya nyuma y’igice cya mbere, umupira uca hejuru gato y’izamu ryarimo Raid M’bolhi.

Sénégal yasatiriye cyane muri uyu mukino ishaka kwishyura, yahawe penaliti mu gice cya kabiri, ariko nyuma yo kwifashisha ikoranabuhanga ry’amashusho rya VAR, iyi penaliti ntiyatangwa.

Umusifuzi w’umunya-Cameroun Alioum Néant yari yemeje ko ari penaliti nyuma y’uko Adlène Guédioura yakoze umupira wari uhinduwe na Ismaila Sarr mu rubuga rw’amahina.

Algérie yakinaga umukino wa nyuma ku nshuro ya gatatu, nyuma yo gutsindwa na Nigeria 3-0 mu 1980 na yo ikayishyura mu 1990 iyitsinda igitego 1-0, yihagazeho mu minota yari isigaye, ibasha gutsinda uyu mukino ndetse yegukana irushanwa ku nshuro ya kabiri.

Umutoza wayo Djamel Belmadi yabaye umutoza wa 12 w’umwenegihugu ufashije igihugu cye kwegukana iri rushanwa rihuza ibihugu bya Afurika, mu gihe wari umukino wa gatanu wa nyuma uhuje amakipe atozwa n’abenegihugu mu mateka y’iri rushanwa ryabaga ku nshuro ya 32.

Nigeria ni yo yegukanye umwanya wa gatatu itsinze Tunisie igitego 1-0 mu mukino wabaye ku wa Gatatu.

Umukino ukirangira abakinnyi ba Algerie basimbukiye hejuru bishimira igikombe cya kabiri begukanye
Umutoza Djamel Belmadi yazamuwe mu bicu
Abakinnyi ba Algerie basenga ubwo bari bamaze kwegukana igikombe
Abakinnyi ba Algerie basazwe n'ibyishimo nyuma yo kwambikwa imidali y'umwanya wa mbere
Algerie yegukanye igikombe cya Afurika ku nshuro ya kabiri
Umukino wa nyuma wabanjirijwe n'ibirori byo gusoza irushanwa
Abafotozi bafata amafoto y'ibishashi byarashwe mu kirere cya Cairo
Umuhanzikazi wo mu Misiri Donia Samir Ghanem aririmba mu birori byo gusoza irushanwa
Hari ababyinnyi batandukanye muri ibi birori
Umuhanzi w'umunya-Ghana Fuse ODG na we yaririmbye muri ibi birori
Abafana ba Algerie bari babukereye bafite icyizere cyo kwegukana igikombe
Abanya-Senegal na bo bari baje gushyigikira ikipe yabo
Abafana ba Algerie bari biganje muri Stade Mpuzamahanga ya Cairo
Umunyabigwi Samuel Eto'o ni we wazanye igikombe mbere y'umukino
Baghdad Bounedjah yatsindiye Algerie hakiri kare cyane
Abakinnyi ba Algerie bishimira igitego kimwe rukumbi babonye muri uyu mukino
Baghdad Bounedjah na Youcef Belaili bishimira igitego
Perezida wa FIFA Gianni Infantino, uwa CAF Ahmad Ahmad, Perezida w'Inzubacyuho muri Algerie Abdelkader Bensalah na Minisitiri w'Intebe wa Misiri Moustafa Madbouly barebye uyu mukino wa nyuma
Sadio Mane na Aissa Mandi bahanganiye umupira
Lamine Gassama ahanganiye umupira na Youcef Belaili wa Algerie
Djamel Belmadi utoza Algerie yiyongereye ku bandi batoza 11 b'abenegihugu bahesheje ibihugu byabo Igikombe cya Afurika
Umutoza wa Senegal Aliou Cissé yari umukinnyi w'ikipe yatsinzwe na Cameroun ku mukino wa nyuma mu 2002
M'Baye Niang yahushije uburyo bubiri bwari guhesha Senegal kubona igitego muri uyu mukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza