CAN 2019: Nigeria yegukanye umwanya wa gatatu itsinze Tunisie

Yanditswe na Eric Tony Ukurikiyimfura
Kuya 18 Nyakanga 2019 saa 07:45
Yasuwe :
0 0

Igitego cya Odion Ighalo cyabonetse mu minota ya mbere y’umukino cyafashije Nigeria gutsinda Tunisie 1-0, ibona umwanya wa gatatu mu gikombe cya Afurika kiri kubera Misiri, aho uyu mukino wabereye kuri Al Salam Stadium iri mu Mujyi wa Cairo kuri uyu wa Gatatu.

Odion Ighalo watsinze igitego cye cya gatanu muri iri rushanwa, yiyongereye amahirwe yo kwegukana igihembo cy’uwatsinze ibitego byinshi kuko ubu arusha ibitego bibiri Sadio Mané na Adam Ounas bamukirikiye, bo bazakina kuri uyu wa Gatanu.

Iyi yari inshuro ya munani Nigeria yakiniraga umwanya wa gatatu, ndetse ikomeza agahigo ko kudatakaza uyu mwanya ukurikira umukino wa nyuma.

Iki gihugu kimaze kwegukana iri rushanwa inshuro eshatu, aho igikombe cya vuba cyatwaye ari icya 2013.

Ighalo utashoje umukino kubera imvune yagize ubwo yari akurikiye umupira akagira ikibazo cy’imitsi mbere y’uko igice cya mbere kirangira, yafunguye amazamu ku munota wa kabiri ubwo umunyezamu Moez Ben Cheirifia yari amaze gukuraho umupira ugasubizwa inyuma na myugariro we Yassine Meria ubwo wari umaze guhindurwa na Collins Jamilu wari mu ruhande rw’ibumoso.

Tunisie yayoboye uyu mukino ndetse yiharira umupira mu minota yakurikiye, iha akazi gakomeye ba myugariro ba Nigeria barimo Kenneth Omeruo byabaye ngombwa ko arwana ku ikipe ye ubwo yari yugarijwe na Taha Khenissi wari umaze guherezwa umupira na kapiteni Wahbi Khazri.

Ferjani Sassi yashoboraga gutsindira Tunisie ku munota wa 14, ariko umupira yateye nyuma yo gusimbuka ukuguru kwa Peter Etebo, uca ku ruhande rw’izamu.

Nigeria yakiniraga mu rubuga rwayo aho umukino wayoborwaga n’abakinnyi ba Tunisia barimo Sassi na Joris Skhiri.

Mu gice cya kabiri, Tunisie yongeye kugaruka isatira ndetse yashoboraga no gutsinda ku mupira Wahbi Khazri yahaye Firas Chaouat, ariko uyu mukinnyi winjiye asimbura awutera ku nshundura ntoya n’ubwo yari asigaranye n’umunyezamu Francis Uzoho.

Samuel Chukwueze na we yashoboraga gutsindira Nigeria igitego cya kabiri ku mupira yaherewe inyuma gato y’urubuga rw’amahina ahagana ku munota wa 80, awuteye ushyirwa muri koruneri na Ben Cherifia.

Samuel Kalu winjiye mu kibuga asimbuye bazine we ku ruhande rwa Nigeria mu minota ya nyuma y’umukino, yagerageje kugira byinshi ahindura, ikipe ye ibona imipira ibiri y’imiterekano na yo itagize icyo itanga kuko yakuwemo n’umunyezamu Cherifia.

Ghaylene Chaalali wa Tunisia na Wilfred Ndidi wa Nigeria bahanganiye umupira
Odion Ighalo yishimira igitego yatsinze mu minota ya mbere
Abakinnyi ba Nigeria bishimira igitego cyabahesheje kuyobora uyu mukino w'umwanya wa gatatu
Umutoza wa Tunisie Alain Giresse atanga amabwiriza ku bakinnyi be
Gernot Rohr utoza Nigeria
Mohamed Drager akura umupira kuri Alex Iwobi wa Nigeria uri mu bigaragaje muri uyu mukino
Abafana ba Nigeria bari baje kuyishyigikira kugira ngo ikomeze gukora amateka yo kudatsindirwa ku mwanya wa gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza