Impunzi zaturutse muri Libya zatahuweho guhimba ko zahohotewe kugira ngo kuzimurira ahandi byihutishwe

Yanditswe na Rabbi Malo Umucunguzi
Kuya 28 Mata 2020 saa 11:06
Yasuwe :
0 0

Iperereza ryakozwe n’Urwego rw’Ubugenzacyaha, RIB, ryagaragaje ko impunzi eshanu zaturutse muri Libya zicumbikiwe mu Nkambi ya Gashora, ziri inyuma y’ibirego byakwirakwijwe ko hari umwana mugenzi wabo wahohotewe n’umupolisi mu minsi ishize, bishingiye ku mubiri no ku gitsina.

Minisiteri ishinzwe Ibikorwa by’Ubutabazi, Minema, yatangaje ko Urwego rw’Ubugenzacyaha, RIB, “rwakoze iperereza, rukaza gusanga ibyo birego nta shingiro bifite.”

Iyi Nkambi ya Gashora icumbikiye impunzi zavanwe muri Libya, zageze muri icyo gihugu zishaka kujya i Burayi ariko zibura uko zirenga Méditerranée, zisanga zitangiye gukorerwa icuruzwa ry’abantu no gutotezwa n’imitwe yitwara gisirikare.

Nubwo u Rwanda rwemeye kuzakira by’igihe gito, benshi muri bo barushimiye umutima mwiza bagaragarijwe bagafatwa neza, ariko bashimangira ko indoto zabo ari ukujya i Burayi ndetse hari ababonye ibihugu bibakira, abandi barategereje.

Amakuru avuga ihohoterwa ry’impunzi yagiye hanze binyuze kuri Twitter, ubwo uwitwa Andrea Gagne, yavugaga ko “impunzi zavanywe muri Libya zicumbikiwe mu Nkambi ya Gashora mu Rwanda zifite ububabare bushya bukomeye, nyuma y’uko umupolisi ahohoteye umuhungu w’imyaka 16 wo muri Eritrea.”

Yavuze ko ku wa 13 Mata ahagana saa kumi n’ebyiri n’igice z’umugoroba, impunzi enye zagarutse mu nkambi zihita zishyirwa mu nyubako ya polisi mu gihe cy’amasaha ane, kugeza umupolisi uhayobora agarutse, yasinze. Ngo yategetse umwe mu bana kuvanamo imyenda, yanze gukuramo ikabutura y’imbere amukubita inkoni, anavanamo imbunda arayimukangisha.

Yakomeje avuga ko uyu “mwana w’imyaka 16 yashoboye gutoroka ndetse icyo gikorwa kimenyeshwa UNHCR n’abayobozi b’inzego z’ibanze.”

Yavugaga ko bababajwe no kuba uwo mupolisi atarahise akurwa aho, ntihagire n’ikindi gikorwa.

Ni amakuru polisi yaje kwamagana, ivuga ko bitewe n’ingamba zashyizweho zo kuguma mu rugo mu gukumira icyorezo cya COVID-19, ubuyobozi bw’Inkambi y’agateganyo ya Gashora, UNHCR na American Refugee Committee, bemeje ko buri munsi hatangwa uruhushya rw’amasaha abiri ngo abari mu nkambi bajye guhaha.

Gusa ngo ku wa 14 Mata, batatu bavuye mu nkambi saa munani z’amanywa, batinda hanze bagaruka saa kumi n’ebyiri n’igice z’umugoroba. Ngo bashyizwe ahantu habugenewe hafi y’umuryango w’inkambi, biza kugaragara ko basinze.

Polisi yavuze ko ibyavuye mu iperereza ry’ibanze bigaragaza ko uwatanze ikirego yashatse guhunga kuba yahanirwa kurenga ku masaha yo kuba bari mu nkambi.

Iperereza ryerekanye ko nta hohoterwa ryabayeho

Minema yakomeje iti "Raporo ya muganga yemeje ko nta hohoterwa yakorewe ku mubiri, ndetse ubuhamya bw’ababyiboneye (harimo abantu babiri bari kumwe n’uwareze) bugaragaza ko nta hohoterwa rishingiye ku gitsina ryigeze ribaho. Nta na rimwe uwatanze ikirego yigeze atandukanywa na bagenzi be mu gihe kivugwa.”

“Iperereza kandi ryemeje ko impunzi eshanu zagize uruhare mu guhatira uyu mwana gutanga amakuru atari yo, baza no kuyatanga mu binyamakuru bagamije kwihutisha gahunda yo kubimurira ahandi. Bitewe n’ibyabaye, iyi mpunzi y’umwana ntabwo izakurikiranwaho gutanga amakuru atariyo kuri polisi.”

Kwakira izi mpunzi z’Abanyafurika ni icyemezo Perezida Kagame yafashe nyuma y’uko mu 2017 hagaragaye uburyo zateshwaga agaciro muri Libya bamwe bagacuruzwa nk’abacakara abandi bagakorerwa iyicarubozo.

Ku wa 10 Nzeri 2019 nibwo amasezerano yo kwakira impunzi 500 yashyizweho umukono ku Cyicaro cy’Umuryango wa Afurika yunze Ubumwe (AU) i Addis Ababa hagati ya Guverinoma y’u Rwanda, AU n’Ishami ry’Umuryango w’Abibumbye ryita ku mpunzi, UNHCR.

Minema yavuze ko Guverinoma y’u Rwanda izakomeza gukorana na UNHCR n’abandi bafatanyabikorwa mu kurinda umutekano n’impunzi zose ziri mu gihugu.

Inkuru wasoma: Polisi yasobanuye iby’ihohoterwa ryavuzwe mu nkambi y’impunzi zavuye muri Libya iri i Gashora

Impunzi zicumbikiwe mu nkambi ya Gashora nyinshi zituruka mu ihembe rya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .