00:00:00 IGIHE NETWORK KN KINYARWANDA EN ENGLISH FR FRANCAIS

HEC yavuye imuzi iby’igabanyuka rikabije rya Kaminuza mu Rwanda

Yanditswe na Ferdinand Maniraguha
Kuya 25 May 2022 saa 11:44
Yasuwe :

Inama y’amashuri makuru na za Kaminuza mu Rwanda (HEC) yatanze umucyo ku igabanyuka rikabije rya Kaminuza mu Rwanda, zavuye kuri 54 mu mwaka wa 2017 zikagera kuri 38 mu mwaka wa 2022.

Iyi mibare yagaragajwe muri raporo y’uyu mwaka yakozwe na Minisiteri y’Uburezi izwi nka Education Statistical Yearbook.

Inkuru IGIHE iherutse gutangaza kuri iryo gabanyuka, inzobere mu burezi zagaragaje ko uko kugabanyuka guteye impungenge mu gihe igihugu cyashyize imbere ubukungu bushingiye ku bumenyi bitarenze umwaka wa 2050.

HEC yatanze umucyo kuri iki kibazo, igaragaza ko kuba Kaminuza zaravuye kuri 54 zigasigara ari 38, bitavuze ko 16 zose zafunzwe, ahubwo hari zimwe zahurijwe hamwe.

Muri Kaminuza 11 zigisha ubumenyi rusange zafunzwe kubera ibibazo by’ireme ry’uburezi ritari ku rwego rwifuzwa harimo Jomo Kenyatta University of Agriculture and Technology (JKUAT), Singhad Technical Education Society (STES), Rusizi International University (RIU), Nile Source Polytechnic of Applied Arts (NSPA) na Institue of Agriculture, Technology and Education of Kibungo (INATEK).

Hafunzwe kandi Indangaburezi College of Education (ICE), Christian University of Rwanda (CHUR), Mahatma Gandhi University , Open University of Tanzania, Premier ECDE Teachers College na Kigali Institute of Management (KIM).

HEC yatangaje ko nubwo hari izafunzwe kubera ireme ry’uburezi ridahagije, muri izo hari n’izafunze imiryango kubera amikoro make nka KIM, Premier ECDE Teachers College na Mahatma Gandhi University.

Dr Mukankomeye yabwiye IGIHE ko abashora imari mu burezi bakwiriye kwita cyane ku ireme n’ibyo bigisha, mbere yo gushyira imbere inyungu z’amafaranga kugira ngo abasohotse muri ayo mashuri babe ari abafitiye igihugu akamaro.

Ati “Mu burezi ntihari hakwiye gushyirwa imbere ishoramari rigamije inyungu z’amafaranga ahubwo hakwiye kwita ku bushobozi bwo gutanga uburezi bufite ireme aribwo butanga umusaruro unoze aho abarangije kwiga baba bashobora gusubiza ibibazo byo ku isoko ry’umurimo mu gihugu, mu karere cyangwa bakaba banapiganwa no ku rwego mpuzamahanga.”

“ HEC isuzuma neza ubushobozi mu gihe cyo gutangira amashuri ahubwo byagera hagati ba nyiri ishuri bakadohoka."

Raporo ya Minisiteri y’Uburezi igaragaza ko nk’amashuri y’imyuga n’ubumenyingiro mu 2016/2017 yari 17 ariko mu 2020/2021 yari asigaye ari umunani.

HEC yatangaje ko yose atafunzwe kuko ayafunzwe ari abiri arimo Peace Integrated Polytechnic na Community Integrated Polytechnic. Ukundi kugabanyuka kw’aya mashuri kwatewe no kwihuza kw’ayahoze ari IPRC umunani akavamo ishuri rimwe ryitwa Rwanda Polytechnic.

Umuyobozi Mukuru wa HEC, Dr Mukankomeje Rose yavuze ko nubwo hari amashuri makuru na Kaminuza yafunze imiryango, muri iyi myaka itandatu ishize hari andi ane yavutse.

Ayo ni Africa College of Theology, Rwanda Institute for Conservation Agriculture, East African Christian College na African Leadership University.

Bamwe mu nararibonye mu burezi, basabye HEC kujya isuzuma neza abagiye gutangiza amashuri mbere yo kubemerera, kugira ngo hirindwe ifungwa rya hato na hato kuko bigira ingaruka ku bashoramari, abanyeshuri n’igihugu muri rusange.

Dr Mukankomeje yavuze ko HEC ikora igenzura rihoraho, amashuri akagirwa inama utabyubahirije akaba ari we ufungirwa.

Ati “Igenzura rikorwa ku buryo buhoraho n’igihe cyose bibaye ngombwa, hakabaho kugirwa inama zafasha kunoza ibyagaragaye ko bitagenda neza. Gufunga ni icyemezo gifatwa ari uko inzira zose zo gukosora ibitameze neza zananiranye hagamijwe inyungu z’abanyeshuri n’ireme ry’uburezi muri rusange”

Ibarura rusange rya kane ryakozwe mu mwaka wa 2012, ryagaragaje ko 2 % bya miliyoni 12 z’abari batuye u Rwanda icyo gihe aribo bageze mu mashuri makuru na za Kaminuza.

Banki y’Isi igaragaza ko mu guteza imbere ubukungu, ibihugu bikeneye kongera umubare w’abantu bize amashuri makuru na za Kaminuza.

Umuntu wageze muri Kaminuza yungukira igihugu 17 % ugereranyije n’ibiba byaramutanzweho, bitandukanye na 10 % uwasoje ayisumbuye yunguka na 7 % yungukwa ku wasoje amashuri abanza gusa.

Mu bihugu byo munsi y’ubutayu bwa Sahara ho inyungu igihugu cyunguka ku muntu wageze muri Kaminuza ni 21 % ugereranyije n’ibyamutakajweho yiga.

Dr Mukankomeje yavuze ko abashoramari bakwiriye kwita ku ireme ry'uburezi mbere yo kureba inyungu z'amafaranga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .