00:00:00 IGIHE NETWORK KN KINYARWANDA EN ENGLISH FR FRANCAIS

Impungenge kuri Kaminuza 11 zafunze imiryango mu Rwanda mu myaka itandatu ishize

Yanditswe na Ferdinand Maniraguha
Kuya 21 May 2022 saa 07:24
Yasuwe :

Minisiteri y’Uburezi iherutse gushyira hanze imibare rusange y’uburezi bw’u Rwanda, igaragaza ko mu myaka itandatu ishize, hari Kaminuza n’amashuri makuru 16 u Rwanda rwari rufite bitagihari.

Iyi raporo ngarukamwaka izwi nka Education Statistical Yearbook 2021, igaragaza ko mu mwaka wa 2016/2017 mu Rwanda habarizwaga amashuri makuru na Kaminuza 54 ariko hasigaye 38 gusa.

Ni imibare iteye impungenge ku Rwanda nk’igihugu cyifuza kubaka ubukungu bushingiye ku bumenyi, buzatuma kiba mu bikize bitarenze mu 2050.

Raporo nshya igaragaza ko mu mashuri makuru na Kaminuza ari ho ubu harimo aya Leta atatu n’ayigenga 35. Muri ayo yose, amashuri makuru na Kaminuza atanga ubumenyi rusange (General Higher education Institutions) ni 30 mu gihe ayigisha imyuga n’ubumenyingiro ari 8.

Nk’amashuri y’imyuga n’ubumenyingiro mu 2016/2017 yari 17 ariko mu 2020/2021 yari asigaye ari 8 naho amashuri makuru na Kaminuza byigisha ubumenyi rusange yari 37 ariko asigaye ni 30.

Umuyobozi Mukuru w’Inama Nkuru y’Amashuri Makuru na za Kaminuza (HEC), Dr Mukankomeje Rose yabwiye IGIHE ko amashuri makuru y’imyuga n’ubumenyingiro, igabanyuka ryayo ryatewe n’uko hari umunani yahurije hamwe akavamo Rwanda Polytechnic.

Kuri Kaminuza zigisha amasomo rusange zagabanyutseho zirindwi, Dr Mukankomeje yavuze ko hari zimwe zagiye zifungwa kubera kutuzuza ibyo zasabwaga, icyakora yongeraho ko hari n’izafunguwe.

Ati “Kuba zaragabanyutse nabyo birasobanutse kuko hari izafunzwe nubwo zitafungiwe igihe kimwe. Byo nta gitangaza ariko muri icyo gihe hari n’izindi zavutse.”

Mu myaka itanu ishize u Rwanda rwongereye imbaraga mu igenzura ry’amashuri makuru na za kaminuza aho izagiye zigaragaza ko zitujuje ibisabwa, zafunzwe.

Mu zafunzwe harimo nka Christian University of Rwanda, amashami amwe ya Institut Supérieur Pédagogique de Gitwe, Institute of Agriculture Technology and Education of Kibungo, Kigali Institute of Management, Indangaburezi College of Education, Nile Source Polytechnic of Applied Sciences (NSPA), Rusizi International University na STES (Singhad ) na Mahatma Ghandi University.

Muri icyo gihe hari izindi nshya zafunguwe nka East African Christian College, University of Global Health Equity (UGHE), Rwanda Institute for Conservation Agriculture , RICA n’izindi.

Byica ishoramari mu burezi …

Ibarura rusange rya kane ryakozwe mu mwaka wa 2012, ryagaragaje ko 2 % bya miliyoni 12 z’abari batuye u Rwanda icyo gihe aribo bageze mu mashuri makuru na za Kaminuza.

Banki y’Isi igaragaza ko mu rwego rwo guteza imbere ubukungu, ibihugu bikeneye kongera umubare w’abantu bize amashuri makuru na za Kaminuza.

Iyo banki igaragaza ko uko abantu barushaho kwiga no kugira ubumenyi buhanitse, biha igihugu amahirwe y’abakozi bashoboye ku bumenyi kandi batanga umusaruro, binjiza kandi bagafasha igihugu mu mishinga ikomeye y’iterambere.

Umuntu wageze muri Kaminuza yungukira igihugu 17 % ugereranyije n’ibiba byaramutanzweho, bitandukanye na 10 % uwasoje ayisumbuye yunguka na 7 % yungukwa ku wasoje amashuri abanza gusa.

Mu bihugu byo munsi y’ubutayu bwa Sahara ho inyungu igihugu cyunguka ku muntu wageze muri Kaminuza ni 21 % ugereranyije n’ibyamutakajweho yiga.

Umuyobozi Mukuru wa ULK, Dr Rusibana Claude yabwiye IGIHE ko mu kwirinda ko Kaminuza zigenga zikomeza gufungwa, hakenewe amagenzura adasanzwe mbere y’uko amashuri yemererwa gutangira.

Ati “Leta yifuza ireme ry’uburezi ntabwo yifuza uburezi bucumbagira kuko ishaka guhanga imirimo n’umuturage ushoboye, kaminuza itagenda muri icyo cyerekezo yabangamira iterambere ry’igihugu.”

Icyakora Dr Rusibana yavuze ko gufunga Kaminuza zaramaze gufungura imiryango, bigira ingaruka ku banyeshuri bazigamo ndetse n’abazishoyemo imari, bigahombya igihugu.

Ati “Byica ishoramari mu burezi, hakagombye amabwiriza akakaye na HEC igatangira kureba ireme ry’uburezi ikigo kigitangira, ntibajye babikora hashize imyaka itatu cyangwa itandatu, bikajya bihoraho kandi bigashingira ku gutanga inama aho gushingira ku gufunga amashuri. Byatuma ireme riboneka n’abashoramari bagashoramo imari badatinya.”

Yongeyeho ati “Iyo ukoze ikintu utinze bigira ingaruka kubo ugikorera n’abagitangiye. Niba abana baravuye mu ishuri kubera amashuri bayafunze, ntabwo umwana yakwishimira serivisi yahawe n’iryo shuri kandi uwarifunze ari Leta.”

Dr Mukankomeje yavuze ko mu igenzura bakora, ntako baba batagize ngo hatangwe igihe cyo kwikosora.

Ati “Dukora igenzura tukaganira bagakosora, ugera aho ufunga ari uko byananiranye.”

Kuri ubu mu mashuri makuru na za Kaminuza mu Rwanda hari abanyeshuri 88,448, bivuze ko nibura mu baturage 100 000 harimo abantu 683 biga Kaminuza.

Abanyeshuri 37,177 biga mu mashuri ya Leta naho 51,271 biga mu mashuri yigenga. Abiga mu bumenyi rusange ni 75,276 mu gihe abiga mu mashuri makuru y’imyuga n’ubumenyingiro ari 13,172.

U Rwanda rurajwe ishinga no kongera umubare w'abiga Kaminuza bashoboye, bazarufasha kugera ku bukungu bushingiye ku bumenyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .