00:00:00 IGIHE NETWORK KN KINYARWANDA EN ENGLISH FR FRANCAIS

Uko ubwanditsi bwafashije Uwayezu Nadege gukira agahinda k’uburyo sosiyete yamufataga

Yanditswe na Ferdinand Maniraguha
Kuya 18 Werurwe 2021 saa 04:06
Yasuwe :
0 0

Sandra Nadege Uwayezu yanditse igitabo cye cya mbere yise First Creation, kirimo imivugo itandukanye ivuga ko kwikunda, urukundo rusanzwe n’agaciro Abanyafurika bakwiriye guha umugabane wabo mbere yo kwirukira iby’ahandi.

Iki gitabo Uwayezu avuga ko yatangiye kucyandika guhera mu 2019 ubwo yigaga mu mashuri yisumbuye.

First Creation ni indorerwamo y’ibitekerezo bye ku bintu bitandukanye abantu babamo birimo kwigirira icyizere mbere ya byose, ibibazo by’urukundo rw’ingimbi n’abangavu, imivugo ikundisha abantu umugabane wa Afurika n’ibindi.

Uyu mukobwa avuga ko yatangiye kwinjira mu bwanditsi nk’uburyo bwo gutanga ibitekerezo bye nyuma y’akato akenshi yagiye ahabwa n’urungano mu mikurire ye.

Uwayeze yavutse ameze nk’ufite ubumuga bw’uruhu icyakora uko yagiye akura byagiye bishira.

Avuga ko byari ibintu bitamworohereye cyane cyane ku mashuri aho yagiye yiga, kuko byatumaga abandi bana bamwibazaho.

Aganira na IGIHE yagize ati "Icyatumye ntangira kwandika cyane ni ubuzima nari mbayemo, kubera kuba umuntu atandukanye n’abandi , uko umuntu agaragara, umusatsi iki. Hari ukuntu sosiyete iba itakubona kimwe n’abandi bana, ugasanga ibitekerezo ufite kubitanga biragoye."

Yakomeje agira ati "Nta mateka maremare arimo gusa nuko nkiri umwana uko nsa byari nk’inzitizi idatuma sosiyete inyibonamo [...] Icyo gihe byari bigoye, nibwo natangiye kwandika. Ntabwo abantu benshi bakunze kubivugaho ariko ni ikintu gihari kandi kigaragara. Abenshi bafatwa nk’aho batandukanye ariko mu busanzwe nta tandukaniro ririmo."

Nubwo yakuze muri ubwo buryo, Uwayezu avuga ko kwandika byamufashije, bikamubera urubuga rwo gutangiramo ibitekerezo bye ntacyo yishisha.

Ati “Nkunda kwandika ku buzima busangwe ndetse n’ahantu ntuye. Imivugo ya mbere nanditse ni kuri Afurika, twari tumaze igihe twiga ku mateka ya Afurika, nkavuga ngo ibitekerezo nagize ku bintu nigishijwe, reka mbitange.”

Yakomeje agira ati “Igitabo nacyise First Creation kuko numvaga ari cyo kintu nkwiye kubanza gusohora. Iyo mivugo nayanditse nta bantu bakora ubusizi benshi turamenyana, ariko nyuma naje gusanga narabikoraga neza. Nubwo nzavamo umwanditsi ukomeye, nzahora nibuka ko iki aricyo gitabo cya mbere nahereyeho.”

Yavuze ko kandi kwandika yabitewe n’uburyo abona inyandiko zivuga kuri Afurika zikunze kwandikwa n’abanyamahanga batazibayemo cyangwa se n’abanyafurika bagerageje kwandika, ugasanga imbaraga barazishyira ku kwandika nk’abanyamahanga, nta mwimerere.

Ati “Ibitabo by’abanyafurika ni bike kandi ni gake usanga uri gusoma igitabo cy’umuntu muziranye. Iyo ndi gusoma igitabo cy’umuntu nzi, bitandukanye n’uko wasoma inkuru zo hanze. Hari ukuntu umuntu agenda akandika, inkuru ye akayivugira ahandi kandi ari kuvuga iwabo.”

“Hari abantu nzi inkuru bandika, ugasanga ari mu Rwanda ntiyigeze akandagira hanze ariko akahandikaho cyane. Ugasanga tuzi byinshi kubo hanze ariko ntituzi byinshi bantu b’iwacu, nta nubwo turi kubyandika ngo uwo hanze nabibona abone ati ibi ni ibyo mu Rwanda.”

Uwayezu yavuze ko mu bwanditsi bwe ashaka gukuraho iyo myumvire ku buryo uzajya abona inyandiko ze, azajya ahita amenya ko ari umwanditsi nyafurika.

Ku kuba yarinjiye mu bwanditsi kandi ari umukobwa, yavuze ko n’abakobwa bashoboye kuko ubwanditsi butahariwe abagabo gusa.

Yatangaje ko afite ibindi bitabo ari gutegura azashyira hanze mu minsi ya vuba, byose bigaragaza umwimerere wa kinyafurika.

Sandra Nadege Uwamwiza yavuze ko 'First Creation' ari igitabo gikubiyemo ibitekerezo bye ku ngingo zitandukanye zirimo no gukunda Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .