Iyi nkoranyamuga yamuritswe ku wa 27 Werurwe 2026. Yanditswe mu myaka itatu, kuva mu 2023/2024. Ikurikiye iyamuritswe mu bihe bishize ikubiyemo amagambo akoreshwa mu by’ubukungu n’imari.

Igizwe n’amuga 1.648 ari mu Kinyarwanda. Ni igitabo cya paji 274.

Mu kwandika iyi nkoranyamuga hitawe ku iterambere ry’ikoranabuhanga u Rwanda rugezeho mu ngeri zitandukanye zirimo itangazabumenyi koranabuhanga (ICT), ikoranabuhanga rya mudasobwa (computer), irya murandasi (internet), ubwenge buhangano, urusobe ntangamakuru (multimedia), ikoranabuhanga ngaragazabimenyetso, ikoranahuhanga ndangamuntu n’ikoranabuhanga ry’imari.

Mu magambo agaragara muri iyi nkoranyamuga harimo ‘mwandikisho’ bisobanuye ‘keyboard’ mu Cyongereza, ‘ishakiro’, ihuzanzira, igenzura, igishushanyo (graphique), ihuriro (hub), ikimenyetso, ikirango (tag), icyago (hazard), imbeba (mouse), icyambu (getaway) n’andi.

Mu magambo atari asanzwe harimo indangamudasobwa cyangwa indebero bisobanuye ‘screen’, mugabuzi cyangwa intima bisobanuye ‘processor’.

Hari kandi ‘télécommande’ yiswe inkoreshakure ndetse n’andi magambo azajya akoreshwa mu ikoranabuhanga mu rwego rwo kunoza imivugire y’Ikinyarwanda.

Intebe y’Inteko y’Umuco, Amb. Masozera Robert, yavuze ko kimwe mu bintu byatumye handikwa inkoranyamuga igaruka ku ikoranabuhanga, ari uko u Rwanda rukataje mu iterambere rikoresha ikoranabuhanga.

Ati “Imwe mu mpamvu Abanyarwanda batubwiraga badakoresha neza Ikinyarwanda, bavanga Ikinyarwanda, ni uko bakunda kubura amagambo y’Ikinyarwanda cyane cyane amagambo ajyanye n’iterambere, ibyo rero bakabigira urwitwazo.”

Yakomeje avuga ko kandi bigiye gufasha mu kwirinda kuvanga indimi byaterwaga n’ubuke bw’amagambo y’Ikinyarwanda cyane cyane akoreshwa mu ikoranabuhanga.

Umunyamabanga uhoraho muri Minisiteri y’Ikoranabuhanga na Inovasiyo, Eraste Rurangwa, yagaragaje ko ikibazo cy’amagambo ataboneye y’Ikinyarwanda akoreshwa hifashishijwe ubwenge buhangano nacyo kigiye gukemuka.

Ati “Ikindi ni uko igihe turimo cy’ubwenge buhangano, ni uko indimi zitandukanye harimo n’Ikinyarwanda iyo umuntu agerageje kubikoresha usanga buba butaboneye. Hamwe n’iyi nkoranyamuga rero ni uburyo bwiza bwo kujya tubona ibisubizo biboneye.”

Iyi nkoranyamuga biteganyijwe ko kubufatanye n’inzego zitandukanye izashyirwa kuri murandasi kugira ngo byorohere abayishaka.

Bamwe mu basubije neza ibibazo babajijwe bahawe iyi nkoranyamuga nshya y'ikoranabuhanga

Urubyiruko rwitabiriye iki gikorwa rwasobanuye ko iyi nkoranyamuga izabafasha gukemura imbogamizi bahuraga nazo mu bijyanye n'ururimi

Intebe y'Inteko y'Umuco, Amb. Masozera Robert, yatangaje ko iyi nkoranyamuga izakemura ikibazo cyo kuvanga indimi

Umunyamabanga Uhoraho muri MINICT, Rurangwa Eraste, yavuze ko iyi nkoranyamuga izashyirwa kuri murandasi