Hategekimana agiye gusohora igitabo kivuga ku gihango Abanyarwanda bafitanye n’Inkotanyi

Yanditswe na Ferdinand Maniraguha
Kuya 23 Nzeri 2020 saa 03:57
Yasuwe :
0 0

Umwanditsi Hategekimana Richard agiye gusohora igitabo kivuga ku gihango Abanyarwanda bafitanye na FPR Inkotanyi, mu rugendo yanyuzemo rwo kubohora u Rwanda igahagarika na Jenoside yakorerwaga Abatutsi.

Iki gitabo cya Hategekimana cyiswe “Igihango n’Inkotanyi" kijya mu mizi y’amahame n’indangagaciro zaranze FPR Inkotanyi kuva yashingwa ari nabyo byayigejeje ku kubohora u Rwanda.

Hategekimana yabwiye IGIHE ko kumenya amahame ya FPR Inkotanyi no kuyagenderaho mu buzima bw’Abanyarwanda ari ingenzi cyane.

Yagize ati “Abanyarwanda kumenya amahame ya FPR-Inkotanyi bibafasha kwirinda kwibagirwa aho u Rwanda rwavuye, afasha Abanyarwanda kwirinda gutatira igihango cyo kubaka u Rwanda, guhora ku isooko ryo kubaka u Rwanda kandi yongera ishyaka mu Banyarwanda.”

Yavuze kandi ko kumenya ayo mahame, birinda abanyarwanda kuba hari uwabameneramo ngo ababibemo amacakubiri cyangwa ngo bagambanire igihugu.

Hategekimana yavuze ko by’umwihariko, igihango Abanyarwanda bafitanye na FPR Inkotanyi gifite igisobanuro ku rubyiruko.

Ati “Amahame ya FPR Inkotanyi abatoza gukunda igihugu, kurangwa n’ibikorwa by’ubutwari, gukora cyane, kwirinda kuzarira, kurangwa n’imikorere Mpinduramatwara, guhora bashaka ibisubizo, kwirinda inda nini, ubusambo n’umururumba.”

Yavuze ko nko kuri ubu igihugu gihanganye n’ubushomeri mu rubyiruko, kumenya indangagaciro n’amahame byaranze FPR Inkotanyi byafasha urubyiruko kuvana amaboko mu mufuka rugakora rukiteza imbere.

Ati “Uzasoma iki gitabo, ndifuza ko asubira ku isooko akamenya igihango gikomeye Abanyarwanda dufitanye n’Inkotanyi zabohoye u Rwanda, akamenya ko u Rwanda twubakiwe umusingi ukomeye n’Umuryango FPR Inkotanyi kandi ko uwo musingi dukwiye kuwusigasira, tukawurinda, tukawubakaho ibikorwa byiza kandi byinshi bituma u Rwanda rukomeza kuba igihugu cyiza cyifuzwa na bose.”

Hategekimana yavuze ko iki gitabo kizajya hanze mu minsi mike iri imbere.

Hategekimana Richard avuga ko kumenya amahame n'indangagaciro za FPR Inkotanyi ari ingenzi ku Munyarwanda ukunda igihugu kandi ushaka ko gitera imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .