Umuco ube ubuzima bw’Abanyarwanda mu gihugu no mu mahanga

Yanditswe na Mutangana Steven
Kuya 3 Mutarama 2020 saa 10:29
Yasuwe :
0 0

Ni ngombwa kuzirikana impanuro Nyakubahwa Perezida wa Repubulika y’u Rwanda Paul Kagame atugezaho mu bihe bitandukanye, ku muco w’u Rwanda n’indangagaciro zawo.

Kuzigenderaho niko kugira umuco ubuzima, guhera mu muryango, ku banyarwanda baba mu gihugu n’ababa mu mahanga. Twifashishije ubutumwa Perezida wa Repubulika yatanze mu bihe bitandukanye, ubutumwa buri kuri Twitter y’Ibiro bya Nyakubahwa Perezida wa Repubulika, kuri Youtube no mu bitabo.

Nk’uko bigaragara mu ijambo ry’ibanze ry’igitabo “Rwanda: Umurage ndangamuco kuva kera kugeza magingo aya”, Nyakubahwa Perezida wa Repubulika y’u Rwanda, Paul Kagame, asaba ko umuco ukomera ku busugire bwawo. Iki gitabo yashyizemo ijambo ry’ibanze, cyanditswe na Prof Kanimba Misago Célestin (wayoboraga Ingoro z’Umurage z’u Rwanda) na Lode Van Pee, cyasohotse mu 2008.

Muri iri jambo ry’ibanze, Umukuru w’Igihugu yasabye kwirinda ibyangiza umuco w’u Rwanda, ati “Ni ngombwa rwose kwirinda ko uruvange rw’imico y’u Rwanda n’iy’amahanga rutuma abantu bitwara nk’ibihindugembe. Umuco wose aho uva ukagera ugomba gukomera ku busugire bwawo.”

Mu ijambo yagejeje ku bitabiriye Inama y’Igihugu y’Umushyikirano mu 2007, Nyakubahwa Perezida wa Repubulika yavuze ko umuco uduhuza ukanadufasha gukemura ibibazo ubu n’igihe kizaza.

Ati “Hari imbaraga twavana mu muco wacu, uduhuza, ukatugira umwe, ukaduha byinshi dusangiye. Uyu muco kandi uba ukwiye kutuyobora, ukatwereka uko dukwiye kwifata n’uko dukwiye guhangana n’ibibazo biriho n’ibizaza.”

Ubwo yagezaga ijambo ku banyarwanda baba mu Bwongereza kuwa 7 Werurwe 2017, Nyakubahwa Perezida wa Repubulika yababwiye ko u Rwanda rwiyubaka rushingiye ku muco.

Yagize ati “Aho muri hano mu burayi cyangwa mu Bwongereza, muhari nk’Abanyarwanda (…) Turubaka igihugu gifite umuco, kigendera ku muco, …” Ibi bikagaragarira mu mibereho n’imibanire ndetse n’iterambere ry’ubukungu.

“Igihugu kitagira indangagaciro ntikigira ejo hazaza”, Perezida Paul Kagame

Nk’uko Umukuru w’Igihugu abyemeza, Igihugu kitagira indangagaciro, ntikigira ejo hazaza. Ibi yabivuze mu nama y’Igihugu y’Umushyikirano mu 2015. Nk’uko tubisoma ku rubuga rwa Twitter rw’Ibiro by’Umukuru w’Igihugu, ubutumwa bugira buti “Umuntu utagira igihugu, ntagira agaciro. Igihugu kitagira indangagaciro, ntikigira ejo hazaza”.

Avuga ku bigomba kuranga Abanyarwanda, Nyakubahwa Perezida wa Repubulika Paul Kagame, mu Nama y’Igihugu y’Umushyikirano mu 2018, yasobanuye ko tugomba kugira umuco ushingiye ku bumwe.

Ati “Abanyarwanda tubane neza, tugire umuco ushingiye ku bumwe, dukorere hamwe, dusenyere umugozi umwe, dushakishe icyagera kuri buri wese kandi kikagirira igihugu cyose akamaro. Buri wese akiyumvamo undi, tugakorana”.

Indangagaciro y’ubumwe, ni imwe muri enye zatoranyijwe zikemezwa ku rwego r’Igihugu mu 2018. Izo ndangagaciro remezo ni Ubumwe, Gukunda Igihugu, Umurimo, Ubupfura, nk’uko tuzisanga mu gitabo cyashyizwe ahagaragara na Minisiteri ifite umuco mu nshingano (Minisiteri ya Siporo n’Umuco, Indangagaciro z’umuco w’u Rwanda, igitabo nyobozi, 2018).

Ubwo bari mu mwiherero mu 2018, Abayobozi mu nzego zitandukanye z’Igihugu bagejejweho ubutumwa bubafasha kumva agaciro k’umuco mu kubaka iterambere ry’Igihugu no kwimakaza indangagaciro. Nyakubahwa Perezida wa Repubulika yagize ati “Ikintu gifasha cyane mu kugera ku mpinduka ni umuco. Iyo urebye ibihugu byateye imbere usanga ibyinshi byarabigezeho kubera umuco wo kwicisha bugufi, kwiyoroshya, no gukora cyane.”

Umuco uba ubuzima bihereye mu muryango. Muri iki gihe, ababyeyi bashishikarizwa guharira umwanya uhagije abana, bakabaganiriza mu muryango, kuko ariho uburere bwiza buhera.

Bamwe mu babyeyi ariko bavuga ko batabona umwanya kuko bafite imirimo myinshi. Nyamara ntawavuga ko agira imirimo iruta iy’Umukuru w’Igihugu. We arawubona.

Mu 2018, yavuze ko aganiriza abana ku muco n’indangagaciro yagize ati “Hamwe na Madamu duhora tubaganiriza ku ndangagaciro, umuco na politiki. Mu mikurire yabo, ibyo tubigisha bigamije kubashyiramo uwo muco wo gusobanukirwa ibyo babona bikorwa. Ariko ibi ntibigomba kubangamira ko bakura nk’abandi bana”.

Ababyeyi bakwiye rero kugendera kuri uru rugero rwiza aduha, bakagira umwanya wo kuganiriza abana ku muco w’u Rwanda n’indangagaciro zawo. Niko umuco uzahinduka ubuzima bw’Abanyarwanda mu gihugu no mu mahanga.

Ubwo yagezaga ijambo ku rubyiruko rw’Abanyarwanda biga mu mahanga, mu itorero ry’Indangamirwa, mu 2015, Nyakubahwa Perezida wa Repubulika yabasabye gukomera ku muco w’u Rwanda. Ati “Iyo utaye umuco ndetse n’indangagaciro zo kumenya ikibi n’icyiza, uba ubuze byose. Mukomere ku muco wacu.”

N’ubwo hari abibwira ko kujyana n’ibyitwa “ibigezweho” bivuze guta iby’iwayu ugasanga iby’iw’abandi, impanuro yahaye urubyiruko mu ihuriro rya YouthConnekt mu 2017, zigaragaza ko tugomba kwimakaza indangagaciro z’umuco w’u Rwanda mu byo dukora byose.

Icyo gihe yagize ati“Indangagaciro zo mu muco wacu ntabwo zihinduka. Zigomba kuranga ibyo mukora byose. Inzira zacu zishobora gutandukana ariko intego yacu ni imwe n’indangagaciro zacu ntizihinduka.”

Ibi bigashimangirwa n’ubutumwa dusanga kuri Twitter y’Ibiro bya Nyakubahwa Perezida wa Repubulika, bugaragaza ko Abanyarwanda bagerageje kujyana n’igihe ariko bataretse gushingira ku muco wabo. Ubu butumwa bwatanzwe ubwo twizihizaga isabukuru y’imyaka 20 yo kwibohora.

Perezida Kagame akunze kugaragara ateze amatwi abaturage yumva ibitekerezo byabo

Umuco dusangiye uraturanga

Mutangana Steven
Umusomyi wa IGIHE.COM


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .