Ubworozi bw’inka, umurage wasigasiwe kuva kera mu Rwanda

Yanditswe na Mutangana Steven
Kuya 11 Nzeri 2020 saa 10:32
Yasuwe :
0 0

Mu gitabo “La communication pour la valorisation du patrimoine culturel du Rwanda, Editions Universitaires Européennes” (ihanamakuru mu guteza guhesha agaciro umurage ndangamuco), cyanditswe na Mutangana Boshya Steven, yagaragaje ko u Rwanda rufite umurage ndangamuco ukungahaye kandi ukwiye kumenyekanishwa mu gihugu no mu mahanga.

Bimwe mu bigize uyu murage tubisanga mu byaranze imibereho y’abakurambere birimo ubworozi bw’inka.

Iyo usomye igitabo “Amateka y’u Rwanda kuva mu ntangiriro kugeza mu mpera z’ikinyejana cya 20” cyatangajwe na Komisiyo y’Igihugu y’Ubumwe n’Ubwiyunge mu 2016, usanga hari ibimenyetso bigaragaza ko mu Rwanda ubuhinzi n’ubworozi byakorwaga mu kinyejana cya gatatu nyuma y’ivuka rya Yezu.

Muri ibyo bimenyetso, hari ibyabonetse mu bushakashatsi biri muri iki gitabo. Mu majyepfo y’u Rwanda habonetse amenyo y’inka yaba yarabayeho ahagana mu mwaka wa 220 nyuma y’ivuka rya Yezu. Ayo matariki akaba ari ayo mu gihe kimwe n’ayerekeye amagufa y’inka n’intama yabonetse i Tongo mu majyaruguru ya Goma muri Repubulika Iharanira Demokarasi ya Kongo.

Inkomoko ya Girinka

Ibi bishimangirwa mu gitabo “Inka mu Rwanda n’ikirari cy’inyambo” cyanditswe na Maïtre Rutinywa Rugeyo na Lode Van Pee. Mu ijambo ry’ibanze riri muri iki gitabo, Nyakubahwa Perezida wa Repubulika y’u Rwanda Paul Kagame asobanura ko u Rwanda rufite ibiranga umuco wacyo harimo inka, by’umwihariko Inyambo.

Akomeza agira ati“Abahanga n’abashakashatsi batandukanye basesenguye amateka y’u Rwanda, bavuga ko inka zageze muri aka karere u Rwanda ruherereyemo mu kinyejana cya gatatu (umwaka wa 220) nyuma y’ivuka rya Yezu Kirisitu. Kuva icyo gihe rero, ndetse no kugeza ubu, inka zari zifite umwanya ukomeye mu bukungu, mu mibanire y’Abanyarwanda, mu mitegekere y’Igihugu ndetse no mu ngabo z’u Rwanda rwo hambere. Gutandukanya inka n’ubuzima bw’Umunyarwanda biragoye, ari na yo mpamvu muri iki gihe twashyizeho gahunda ya Girinka Munyarwanda.”

Raporo Ikigo cy’Igihugu cy’Imiyoborere (RGB) cyatangaje mu 2018, igaragaza ibyiza Girinka yagejeje ku Banyarwanda kuva 2006 ubwo Inama y’Igihugu y’Umushyikirano yayishyiraga mu zindi gahunda u Rwanda rushingiraho mu kwishakira ibisubizo ruvoma mu muco warwo. Koko rero, nk’uko iyi raporo ibyibutsa, iyi gahunda igera no ku guha amata umwana w’u Rwanda ifite amateka, aho Umwami Mibambwe Gisanura (+1660) yategetse ko nta mwana wo mu Rwanda wagombaga kubura amata ya buri munsi mu gihe abandi bari bafite menshi.

Perezida Kagame avuga kuri iyi gahunda, nk’uko tubisoma muri iyi raporo ya RGB, yagaragaje ko mu ngendo yagiriye hirya no hino mu Gihugu, yiboneye ubwe uko Girinka yahinduye ubuzima bw’abakene bukaba bwiza.

Mu gitabo “Inka mu Rwanda n’ikirari cy’inyambo” cyanditse mu ndimi eshatu (Ikinyarwanda, Icyongereza n’Igifaransa), Perezida Paul Kagame asaba Abanyarwanda bose, abagenderera u Rwanda, abashinzwe uburezi n’umuco, kwifashisha iki gitabo kugira ngo bamenye uwo murage ndangamuco.

Ati “Ndakangurira Abanyarwanda b’ingeri zose, abato ndetse n’abakuru, abashinzwe uburezi kimwe n’umuco, ndetse n’abasura Igihugu cyacu, kwifashisha iki gitabo bakarushaho kumenya neza amateka y’inka mu Rwanda n’akamaro kazo mu buzima bw’Igihugu cyacu.”

Mu ndamukanyo ya kinyarwanda, tugira tuti : “Gira inka”, uyifurijwe agasubiza ati: “amashyo n’amagana”.

Inka ikomeze kuba ishingiro ry’umuco wacu n’ubumwe bw’abanyarwanda n’iterambere nkuko yamye kuva kera.

Kuva kera mu Rwanda, inka yari ishingiro ry'ubumwe n'iterambere by'abanyarwanda

Mutangana Steven,
Umusomyi wa IGIHE.COM


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .