Minisitiri w’Umutekano w’Imbere mu Ntara ya Equateur, Crispin Mputu, yabwiye Reuters ko impanuka yabereye hafi y’umujyi wa Ngombe, muri teritwari ya Lukolela, mu burengerazuba bw’iyo ntara.

Impanuka yabaye ku wa Gatandatu, ahagana saa munani z’ijoro ku isaha yo muri ako gace.

Mputu yavuze ko ubwato bwagonganye ari ubw’ubucuruzi bwakoraga ingendo hagati ya Kinshasa na Mbandaka, n’ubundi bwari butwaye abagenzi buva mu Ntara ya Mongala bwerekeza i Kinshasa.

Kugongana k’ubwo bwato kwatumye ubwato bwari butwaye abagenzi burohama. Umwe mu bakozi b’inzego z’umutekano yabwiye Reuters ko bwari burimo abagenzi 163.

Mputu yatangaje ko imirambo y’abantu 22 yabonetse igashyingurwa, naho abantu 59 bakarokorwa. Yongeyeho ko hari abandi bishwe n’iyo mpanuka bashobora kuba barashyinguwe ahandi.

Ubwato bwarohamye bwari bukiri mu mazi, mu bujyakuzimu bwa metero 12. Mputu yavuze ko ibikorwa byo gushakisha no gukura mu mazi abaguye muri iyo mpanuka byari bigikomeje ku mugoroba wo ku wa Mbere.

Mu bice byinshi byo mu burengerazuba bwa Congo, ingendo zo mu mazi ni zo zikoreshwa cyane mu gutwara abantu no mu bucuruzi, kuko imijyi n’uduce dutuyemo abantu biherereye ku nkengero z’uruzi rwa Congo.