Byagarutsweho mu kiganiro Minisitiri w’Intege Dr. Justin Nsengiyumva yagejeje ku Nteko Ishinga Amategeko imitwe yombi ku wa 2 Ukwakira 2026, kigaruka ku bikorwa bya guverinoma bijyanye no guteza imbere urwego rw'imari.

Kuva mu 2017 kugeza mu 2025, amabanki yaragabanyutse ava kuri 15 agera kuri 11, mu gihe ibigo by’imari iciriritse byavuye kuri 473 bigera kuri 70.

Uku kugabanyuka kwatewe n’ivugururwa n’ihuzwa ry’ibigo bijyanye no kunoza imiterere y’urwego kugira ngo rurusheho kugira ubushobozi n’uburyo butandukanye bwo gutanga serivisi z’imari.

Ku bigo by’imari iciriritse byatewe ahanini n’ihuzwa ry’Imirenge SACCO 416, yavuyemo SACCO z’uturere 30.

Muri iyo myaka kandi ibigo by’ubwishingizi byavuye kuri 16 bigera kuri 18, ibigo by’ubwiteganyirize bw’izabukuru biva kuri kimwe cya RSSB bigera kuri 12, naho abahuza ku isoko ry’imari n’imigabane bava kuri 21 bagera kuri 35.

Ibindi bigo by’imari bitari amabanki byageze kuri 448 mu 2025, ibigo by’ikoranabuhanga mu by’imari (FinTech) byo byageze kuri 36, mu gihe byari bitatu mu 2017.

Dr. Nsengiyumva ati “Ibi bigaragaza kwaguka no kwiyongera ku buryo abaturage n’ibigo bashobora kubona serivisi z’imari.”

Yasobanuye ko izi mpinduka z’imiterere zaherekejwe n’izamuka rikomeye ry’ubushobozi bw’urwego rw’imari.

Umutungo w’urwego rw’imari wavuye kuri miliyari 4000 Frw mu 2017 ugera kuri miliyari ibihumbi 16 mu 2025.

Ati “Muri icyo gihe, uyu mutungo wavuye ku rugero rungana na 53% by’Umusaruro Mbumbe w’Igihugu ugera kuri 68%.”

Amabanki y’ubucuruzi ni yo afite uruhare runini, rugera hafi kuri 67% by’umutungo wose w’uru rwego, mu gihe usigaye ungana na 33% usangiwe n’ibindi bigo by’imari birimo iby’imari iciriritse, iby’ubwishingizi, pansiyo n’ibindi.

Inyungu z’ibigo by’imari zariyongereye…

Dr. Nsengiyumva yavuze ko ukwaguka k’urwego rw’imari kandi kwajyanye no gushyiraho ingamba zo kurinda no gukomeza umutekano n’ubudahangarwa bw’urwego rw’imari.

Yatanze urugero ku gipimo cy’ubushobozi bwo kwihanganira igihombo (Capital Adequacy Ratio) kitagomba kujya munsi ya 15%, ariko amabanki yakomeje kuba hejuru yacyo, aho mu 2025 yari kuri 21,9%.

Ati “Inyungu ku mutungo w’amabanki yavuye kuri 2,2% mu mwaka wa 2017 igera kuri 4,8%, naho inyungu ku mari shingiro y’abashoramari yo yavuye kuri 6,8% mu mwaka wa 2017 igera kuri 19,1% mu 2025.”

Igipimo cy’inguzanyo zitishyurwa neza mu mabanki cyavuye kuri 7,6% mu 2017 kigera kuri 2,5% mu 2025.

Ababonye inguzanyo bo bakomeje kwiyongera bava ku basaga ibihumbi 243 mu mwaka wa 2017 bagera ku basaga miliyoni imwe mu 2025.