Urugo rw’amasaziro y’abagizwe incike na Jenoside yakorewe Abatutsi mu 1994 rwiswe Impinganzima rugizwe n'inzu nziza zubatswe mu Mudugudu w'Intwari mu Kagari ka Kacyangugu ho mu Murenge wa Kamembe i Rusizi.

Abarutujwemo baruhaye izina ry'Urugo rwa Paul Kagame kuko imiyoborere ye ariyo yatumye bahindurirwa ubuzima.

Mu mezi asaga abiri ashize nibwo abakecuru n'abasaza biganjemo abafite ubumuga n’abarokotse Jenoside batujwe mu Mpinganzima mu rwego rwo kubahuriza hamwe ngo bamarane irungu ariko banitabweho n'ubuyobozi badatatanye.

Mu buhamya bwabo bavuga ko nyuma ya Jenoside yakorewe Abatutsi bari babayeho nabi kubera ko basigaye bonyine.

Bavugamenshi waturutse mu Karere ka Rubavu yagize ati “Jenoside yantwaye abana batandatu n'umugabo wanjye ku buryo nabayeho mu buzima bugoranye cyane kuko nta n'umwe nari nsigaranye wo kumbeshaho. Mu buzima bwo kubaho njyenyine sinari nzi uko amata amera, sinari nzi ubuzima bwiza uko bumera .’’

Ubuzima bw'ingutu abuhuriyeho n’abandi batujwe hamwe bose bahuriza ku mibereho y’ubukene baterwaga no kutagira ubitaho.

Mukabutera Suzanne yagize ati “Aho tugereye aha imibereho yarahindutse ku buryo ibilo byacu byiyongereye. Mu gitondo tunywa amata, turarya, turambara, turyama neza mbega icyizere cy'ubuzima cyaragarutse ku buryo twumva dufite icyizere cyo kurama.’’

Ubuyobozi bw'Akarere ka Rusizi buvuga ko butazahwema kwita ku babyeyi batujwe mu rugo rw’Impinganzima.

Umuyobozi w'Akarere ka Rusizi wungirije ushinzwe Imibereho Myiza y'Abaturage, Nsigaye Emmanuel, yabwiye IGIHE ko biyemeje kuba hafi abasaza n’abakecuru batujwe muri urwo rugo.

Yagize ati “Tuzakomeza kubaba bugufi dore ko tunasanzwe tubasura umunsi ku munsi. Icyo tubizeza ni uko tuzakomeza gufatanya n'ubuyobozi bw'Impinganzima ku kibazo icyo aricyo cyose cyabaho kugira ngo biyumve ko bari mu muryango ubishimiye.”

Mu rugo rw’impinganzima ruri i Rusizi harimo abakecuru 32 n’abasaza umunani, bose bari hejuru y’imyaka 65 y’amavuko. Bagira amasibo aterana buri wa Kane bakaba ariho baganirira ibintu byose by’ubuzima bwa buri munsi.

Uretse kuba bafata umwanya bagatembera, ku wa Gatanu saa Cyenda abayoboke ba Kiliziya Gatolika barasenga, abo muri Methodiste bagasenga ku Cyumweru naho ku wa Gatandatu ni umunsi wo kwidagadura.

Kugeza ubu mu gihugu hamaze kubakwa inzu zitwa ‘‘Impinganzima’’ zigera kuri enye zirimo iya Rusizi, Huye, Nyanza na Bugesera.