Umunsi Mukuru wahariwe kuzirikana no kurata ibigwi byaranze Intwari z’Igihugu wizihijwe kuri uyu wa 1 Gashyantare 2023, ku nsanganyamatsiko igira iti ‘Ubutwari mu Banyarwanda, Agaciro kacu’.

Ku rwego rw’Igihugu, umuhango wo kwizihiza Intwari z’u Rwanda wabereye i Remera ku Gicumbi cy’Intwari mu gihe hirya no hino mu gihugu habereye ibikorwa bitandukanye byo kwizihiza uyu munsi.

Perezida Kagame yavuze ko “Uyu munsi, turizihiza ubutwari no gukunda igihugu by’Abanyarwanda badusigiye umusingi wo kubakiraho u Rwanda rufite abaturage biyemeje kwigenera ejo hazaza hababereye.”

Hirya no hino mu gihugu habaye ibikorwa bitandukanye mu rwego rwo kwizihiza uyu munsi birimo kuremera abagaragaje ibikorwa by’ubutwari ndetse n’ubutumwa butandukanye bwahawe abiganjemo urubyiruko.

Ku rwego rw’Intara y’Amajyaruguru, ibirori byabereye mu Murenge wa Kaniga mu Karere ka Gicumbi, ahazwi nko ku Mulindi w’Intwari, hatangiriye urugamba rwo kubohora igihugu.

Byitabiriwe na Guverineri Nyirarugero Dancille, uhagarariye Inkeragutabara, Maj Gen Eric Murokore, Umuyobozi w'Akarere ka Gicumbi, Nzabonimpa Emanuel na Depite Ndoriyobijya Emmanuel n’abandi.

Guverineri Nyirarugero yagize ati “Kuri uyu munsi turashima Intwari z'u Rwanda haba mu bikorwa bitandukanye byo guhanga u Rwanda, kurwagura, ndetse no kururwanirira mu bihe bitandukanye.”

Yakomeje agira ati “By'umwihariko turasaba urubyiruko gutera ikirenge mu cya bakuru banyu, mugire ubutwari mu gutsinda mu ishuri, ndetse mukomeze gusigasira ibyagezweho.”

Mu Ntara y’Amajyepfo, uyu munsi waranzwe no gutanga ubutumwa bugaruka ku mpamvu hizihizwa Umunsi w’Intwari, kugaruka ku bikorwa byaranze intwari. Muri iyi ntara kandi habayeho ibikorwa byo kuremera abagaragaje ibikorwa by’ubutwari.

Guverineri w’Intara y’Amajyepfo, Kayitesi Alice yasabye abaturage by’umwihariko urubyiruko kwigira ku ntwari igihugu kizihiza uyu munsi kugira ngo nabo barangwe n’ibikorwa nk’ibyo bakoze.

Ati “Turabasaba gukomeza kurangwa n’ibikorwa by’ubutwari, kumenya icyo uyu munsi usobanuye ariko nabo basabwa kwigira kuri ibyo bikorwa nabo bakagira ibikorwa by’’ubutwari bakora cyane cyane ko bafite abo bareberaho.”

Ku rwego rw'Intara y'Iburengerazuba, ibirori byo kwizihiza Intwari z'Igihugu byabereye mu karere ka Rubavu, byitabirwa na Guverineri Habitegeko François, inzego z'umutekano n’abandi.

Guverineri Habitegeko yagaragaje ko ibikorwa bitandukanye byaranze Intwari z'Igihugu ari urugero rw'ibishoboka. Ibi ngo bigaragaza gukunda igihugu, ubwitange no kwigomwa inyungu zawe bwite.

Yasabye by'umwihariko urubyiruko gukomeza guharanira gutera ikirenge mu cy'Intwari z'Igihugu,kwirinda ibibagusha mu mutego w'ubugwari, amacakubiri n'ubunebwe.

Ku rwego rw’Intara y’Iburasirazuba, ibirori byabereye mu Karere ka Gatsibo , aho Guverineri Emmanuel Gasana yari kumwe n’abandi bayobozi barimo Abadepite n’abagize inzego z’umutekano.

Mu Burasirazuba kandi uyu munsi wasojwe n’imikino ya nyuma y’irushanwa rya ‘Umurenge Kagame Cup’, aho muri buri Karere amakipe yageze ku mukino wanyuma mu bahungu n’abakobwa aribo bakinnye.

Uko umunsi w’Intwari wageze mu mafoto