Amadini yahinduye umuvuno mu misengere no kwakira amaturo y’abayoboke

Yanditswe na Hakizimana Jean Paul
Kuya 19 Werurwe 2020 saa 03:49
Yasuwe :
0 0

Kuva tariki ya 14 Werurwe Guverinoma y’u Rwanda, yafashe icyemezo cy’uko ibikorwa bihuriza hamwe abantu benshi byose bihagarikwa birimo no kujya mu nsengero, kugira ngo hakumirwe ikwirakwira ry’icyorezo cya COVID-19 giterwa na Coronavirus.

Kuva iki cyemezo cyafatwa amadini n’amatorero yasabye abakirisitu babo gusengera mu ngo, amwe yifashisha za radiyo, Televiziyo na YouTube mu gukomeza gufasha abakristu bayo kumva inyigisho z’ijambo ry’Imana.

Ibi bisobanuye ko amaturo yatangwaga mu gihe cya misa n’amateraniro atatanzwe ku cyumweru nk’ubwo byari bisanzwe bigenda.

IGIHE yamenye ko hari amwe mu madini yasabye abayoboke bayo kujya bakusanya ayo maturo bagashaka umunsi bakayohereza. Urugero ni ubutumwa bwa Paruwasi Gatolika ya Rwamagana, busaba abakirisitu kwegeranya ubushobozi bwabo bakajya babwohereza buri cyumweru.

Umwe mu bakirisitu Gatulika utashatse kuvuga amazina ye, yabwiye IGIHE ko kuba bakusanya amaturo bakayatanga nta kibazo bitwaye ngo ikibazo ni uko byaba itegeko, yavuze ko n’ubusanzwe umuntu aba afite ituro yageneye gutanga buri cyumweru bitewe n’icyo yaronse.

Bamwe mu bayobozi b’amadini n’amatorero babwiye IGIHE uburyo bari gukoresha mu kugeza ubutumwa bwiza ku bakristu babo ndetse n’uburyo bari kwifashisha mu kubona amaturo.

Umushumba wa Arikidiyosezi ya Kigali, Musenyeri Antoine Kambanda, yavuze ko kuri ubu bari kwifashisha za radiyo, televiziyo na YouTube mu kwegereza abakristu ijambo ry’Imana.

Ati “Inyigisho turi kwifashisha ziranyura kuri Radiyo Maria, buri munsi haba igitambo cy’Ukaristiya mu gitondo na saa 12h15 mu karuhuko, hanyuma ku cyumweru twifashishije radiyo na televiziyo by’igihugu, turi no gusaba ngo kuri iki cyumweru bazaduhe umwanya kuko inyigisho twatanze zafashije abantu. Nimugoroba twifashisha televiziyo ya Isango Star ari nako dutoza abakristu gusengera mu rugo bifashishije umukuru w’umuryango.”

Ku kijyanye n’uburyo abakristu batanga amaturo, Musenyeri Kambanda, yavuze ko bifashisha nimero z’abapadiri bakuru abakristu baba basanganwe bakoherezaho amaturo bakoresheje uburyo bwa Mobile Money.

Ati “Amaturo rero hari abakristu kugeza ubu babizirikana bakaba batwoherereza kuri Mobile Money, mu rwego rwo gushyigikira imirimo y’abasaseridoti ni iyo mirimo y’ubutumwa, kandi niyo hagize uzana ituro ry’abakene kuko buriya tuba tunazirikana n’abakene batugana bashonje, gusa ntabwo turashyiraho uburyo bufatika ubu bikorwa n’abakristu babizirikana.”

Yavuze ko abakirisitu akenshi baba bafite nimero za Padiri Mukuru “Uko n’ubundi bamuhamagara bamwiyambaza kuri serivisi zinyuranye umwe umwe, ni nako babikora gusa turi gutekereza uko twabinoza.”

Umushumba wa Diyosezi ya Gahini mu Itorero ry’Abangilikani, Dr Gahima Manasseh we yavuze ko kuva amateraniro yo mu ruhame ahagaritswe basabye abakristu kongera uburyo bwo gusenga nubwo bari iwabo mu rugo kandi birinda kujya mu ruhame.

Ku kijyane n’uburyo bakiramo amaturo yagize ati “Nta ngamba twagifatiye kuko siyo y’ingenzi, duhuzwa n’abakristu no kubabwira ijambo ry’Imana no kubakangurira iby’agakiza, iyo hagize ushaka kuyatanga akoresha Mobile Money kuko ababitsi b’amaparuwasi barazwi.”

Umuyobozi w’Itorero Foursquare Rwanda, Dr Bishop Fidèle Masengo, we yabwiye IGIHE bo bari gukoresha YouTube na Facebook y’Itorero mu kugeza ubutumwa bwiza ku bakristu.

Ku kijyanye n’uburyo bakira amaturo yagize ati “Dufite itangazo riba rinyura hasi ryereka abantu uburyo batangamo amaturo bifashishije Mobile Money na konti z’urusengero gusa ntabwo tubitindaho cyane kuko abantu batari kuza mu rusengero.”

Mu itangazo ryashyizwe hanze n’Itorero ry’Abadiventisiti b’Umunsi wa Karindwi ryashyizweho umukono na Pasiteri Habyarimana Jean François rivuga ko ku isabato buri muryango uzateranira mu rugo, kandi gahunda zose nk’uko zikorwa ku isabato zizakurikizwa (ishuri ryo ku isabato, indirimbo, gutanga icyacumi n’amaturo…)”

Rikomeza rigira riti “Buri muryango ni itorero ayo maraporo azashyikirizwe abayobozi b’igihande nabo bayageze ku mubitsi. Abatabona uko bahura n’umubitsi w’itorero ariko bakaba babona uburyo bagera kuri banki, turabaha numero za konti mwashyiraho ibyera by’Uwiteka mwakoresha n’ubundi buryo bw’ikoranabuhanga.”

Kugeza ubu Minisiteri y’Ubuzima imaze gutangaza ko mu Rwanda abantu 11 ari bo bamaze kugaragaza ibimenyetso by’uko banduye icyorezo cya COVID-19 giterwa Coronavirus.

Abaturarwanda bose bakaba basabwa gukomeza kwitwararika, bakurikiza amabwiriza y’inzego z’ubuzima hibandwa cyane cyane ku gukaraba intoki, kwirinda kujya ahantu hateraniye abantu benshi no kwirinda ingendo zitari ngombwa.

Mgr Kambanda avuga ko abakirisitu barimo gukoresha nimero z'abapadiri mu gutanga amaturo
Mgr Gahima wa Diyosezi ya Gahini yavuze ko harimo gukoreshwa Mobile Money akoherezwa ku babitsi ba za paruwasi
Umuyobozi w’Itorero Foursquare Rwanda, Dr Bishop Fidèle Masengo, avuga ko na bo bakoresha Mobile Money na Konti z'itorero
Amwe mu matorero atanga inyigisho yanashyizeho ahantu hoherezwa amaturo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .