Aba bakinnyi bombi barahura kuri uyu wa Kabiri, tariki ya 6 Ukwakira 2026, ku bibuga bya Kicukiro Ecology Tennis Club, aho umwe muri bo ahita abona itike yo gukomeza mu ijonjora rya kabiri, ari na ryo rya 1/8.

Ni amateka mashya kuri Tennis y’u Rwanda kuko kuva Rwanda Open M25 itangiye gukinwa mu 2023, nta Munyarwanda wari warigeze arenga ijonjora rya mbere mu cyiciro cy’abagabo bakina ari umwe.

Ishimwe Claude w’imyaka 19 na Niyigena Etienne w’imyaka 31, bombi bahawe ubutumire bubemerera guhita bajya mu bakinnyi 32 bakina icyiciro nyamukuru cy’iri rushanwa rihuza abakinnyi bagize umwuga. Kuba baratomboranye bisobanuye ko uko byagenda kose, u Rwanda rugomba kugira umukinnyi muri 1/8.

Ishimwe amaze igihe agaragara muri Rwanda Open M25, ariko inshuro zose yagiye asezererwa mu ijonjora rya mbere.

Mu 2024, yatsinzwe na Denis Constantin Spiridon amaseti 2-0 (6-0, 6-0), mbere yo kongera gutsindwa n’Umunyamerika Noah Schachter amaseti 2-0 (6-2, 6-1) mu irushanwa rya kabiri rya M25 Kigali ryabaye muri uwo mwaka.

Mu 2025, Ishimwe yongeye kubura amahirwe yo kurenga ijonjora rya mbere ubwo yatsindwaga n’Umudage Marlon Vankan amaseti 2-0 (6-0, 6-0).

Niyigena na we ntiyahiriwe n’inshuro ziheruka muri Rwanda Open M25 yitabiriye kuva igiye ku rwego rwa gatatu rw’amarushanwa akomeye ku Isi. Mu irushanwa ryabaye muri Nzeri 2024, yasezerewe n’Umunyamerika Preston Brown wamutsinze amaseti 2-0 (7-5, 6-2).

Mu rindi rushanwa ryakurikiyeho mu Ukwakira 2024, Niyigena yatsinzwe na Brandon Perez amaseti 2-1 (6-4, 6-7 [5], 6-2), nyuma y’umukino wari ukomeye byasabye ko hitabazwa iseti ya gatatu.

Ishimwe na Niyigena basanzwe banakinana mu cyiciro cy’abakina ari babiri, nubwo na ho batarabasha kurenga ijonjora rya mbere rya Rwanda Open M25 bari kumwe.

Mu 2024, aba bombi batsinzwe na Juan Jose Bianchi na Brandon Perez amaseti 2-0 (6-3, 6-0).

Icyumweru cya kabiri cya Rwanda Open M25 2026 kiri kubera ku bibuga by’ibumba bya Kicukiro Ecology Tennis Club kuva tariki ya 6 kugeza ku ya 11 Ukwakira, aho cyitabiriwe n’abakinnyi 32 mu cyiciro cy’abagabo bakina ari umwe.

Mu cyumweru cya mbere cy’iri rushanwa cyasojwe ku wa 4 Ukwakira 2026, Umufaransa Calvin Hemery ni we wegukanye igikombe mu bakina ari umwe, nyuma yo gutsinda Umunya-Zimbabwe Benjamin Lock amaseti 2-0 (6-3, 6-3).

Niyigena yari yasezerewe n'Umufaransa Corentin Denolly wamutsinze amaseti 2-0 (6-1, 6-2) naho Ishimwe Claude asezererwa n'Umunyamerika Preston Brown wamutsinze 6-3, 6-2.

Gukina 1/16 cya Rwanda Open M25 mu bakina ari umwe, bihesha buri mukinnyi Amadolari 319 (ibihumbi 470 Frw) mu gihe kugera muri 1/8 ari Amadolari 495 (hafi ibihumbi 730 Frw).

Mu bijyanye n'amanota, umukinnyi ugeze muri 1/8 abona inota rimwe, uwakinnye 1/4 akabona atatu, uwageze muri 1/2 akabona arindwi, uwatsindiwe ku mukino wa nyuma akabona 14 mu gihe uwegukanye irushanwa abona amanota 25 ndetse agahabwa n'ibahasha y'Amadolari 4.612 (agera kuri miliyoni 6,8 Frw).