Iyi Shampiyona igizwe n’amakipe 10 yatangiriye ku bibuga bitandukanye birimo ADEGI, Kigoma na Musanze, aho umunsi wa mbere waranzwe n’imikino itandatu yakinwe uko yari iteganyijwe.

Mu mikino yabereye kuri ADEGI, GS Tabagwe yatangiye neza itsinda ADEGI ibitego 28-15, mbere yo kongera kubona intsinzi y’ibitego 31-29 imbere ya Mutenderi TSS mu mukino wari ukomeye.

Mutenderi TSS na yo yahise yiyunga n’abafana bayo itsinda ADEGI ibitego 36-29.

Ku kibuga cya Kigoma, Police HC na yo yatangiye Shampiyona iri ku rwego rwo hejuru, itsinda ESEKI ibitego 48-26 mbere yo kunyagira Nyakabanda HC ibitego 40-5.

ESEKI yasoje imikino yayo y’umunsi wa mbere ibona amanota nyuma yo gutsinda Nyakabanda HC ibitego 42-21.

I Musanze, gahunda y’umunsi ntiyagenze uko yari yateganyijwe kubera imvura yatumye imikino ibiri itabasha gukinwa.

Musanze HC yabanje gutsindwa na Gicumbi HC ibitego 30-29 mu mukino wari urimo guhangana gukomeye, ariko uwagombaga guhuza Gicumbi HC na PEVIC ndetse n’uwa PEVIC na Musanze HC isubikwa kubera imvura.

Ishyirahamwe ry’Umukino wa Handball mu Rwanda, FERWAHAND, ntiriratangaza igihe iyi mikino y’ibirarane izakinirwa.

Shampiyona ya 2026/27 yatangiranye n’impinduka zitandukanye mu mategeko ayigenga, zirimo kuba buri kipe igomba kugira nibura abakinnyi batatu batarengeje imyaka 20 ku rupapuro rw’umukino. Nyuma y’imikino isanzwe, amakipe ane ya mbere azakina kamarampaka guhera muri ½.

APR HC ifite igikombe cya Shampiyona giheruka, ntiyagaragaye ku munsi wa mbere kuko iri muri Angola mu mikino Nyafurika y’amakipe yabaye aya mbere iwayo. Biteganyijwe ko izatangira urugendo rwayo muri Shampiyona ku munsi wa kabiri.