Umutoza wa Rayon Sports yasabye kugurirwa abakinnyi batatu bo muri RDC

Yanditswe na Eric Tony Ukurikiyimfura
Kuya 26 Nzeri 2020 saa 11:48
Yasuwe :
0 0

Umutoza wa Rayon Sports; Umunye-Congo Guy Bukasa, yasabye ubuyobozi kumugurira abandi bakinnyi batatu bashya bo muri Repubulika Iharanira Demokarasi ya Congo barimo Déo Kanda wakiniraga Simba SC.

Ku wa Kane nibwo hakozwe ihererekanyabubasha hagati ya Komite ya Rayon Sports yari iyobowe na Munyakazi Sadate n’iya Murenzi Abdallah yashyizweho n’Urwego rw’Igihugu rw’Imiyoborere (RGB) kugira ngo ifashe uyu muryango gushyira ku murongo ibijyanye n’amategeko n’ikoreshwa ry’umutungu mu nzibacyuho y’iminsi 30.

Nk’uko bigaragara muri raporo yatanzwe na Komite ya Munyakazi Sadate, umutoza wa Rayon Sports; Umunye-Congo Guy Bakasa, yari yarasabye ko agurirwa abakinnyi batatu bakomoka muri Repubulika Iharanira Demokarasi ya Congo.

Iyi raporo igira iti “Hari abakinnyi bifujwe n’umutoza tugirana ibiganiro, ariko twari tutarabasinyisha mwazabikurikirana. Ni Kambale Musafiri (AS Nyuki/RDC), Déo Kanda (Simba SC/ Tanzanie) na Vital Ourega (TP Mazembe/ RDC).”

Komite ya Munyakazi Sadate yagaragaje ko mu bakozi 55 ba Rayon Sports, kuri ubu abakinnyi bafitanye amasezerano nayo ari 43 barimo 10 bakiri bato ndetse n’abandi icyenda bagize intebe y’abatoza n’abandi bakorana bya hafi nk’abaganga.

Hari amakuru avugwa ko kuri ubu abahoze mu buyobozi bwa Rayon Sports bakusanyije miliyoni 200 Frw bashaka kuyiguriramo abakinnyi bakomeye cyane abakina inyuma ku mpande.

Mu mazina avugwa, harimo kugarura uwari kapiteni w’iyi kipe, Rutanga Eric wasinyiye Police FC no kugura myugariro Rusheshangoga Michel uheruka kongera amasezerano muri AS Kigali.

Bivugwa ko kandi Rayon Sports iri mu biganiro n’abandi bakinnyi nka Babuwa Samson, ikaba yakwishyura miliyoni 10 Frw kuri uyu mukinnyi waguzwe na Kiyovu Sports kuri miliyoni 7 Frw muri Gicurasi.

Nsabimana Eric ukina mu kibuga hagati muri AS Kigali, akaba agifite amasezerano y’umwaka umwe, ni irindi zina rivugwa muri iyi kipe yambara ubururu n’umweru ndetse n’umunyezamu Bwanakweli Emmanuel uheruka gusezererwa na Kiyovu Sports.

Déo Kanda wakiniraga Simba SC ni umwe mu bakinnyi bifuzwa muri Rayon Sports
Umutoza wa Rayon Sports, Guy Bukasa, yasabye kugurirwa abandi bakinnyi bava muri RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .