Se wa Bukuru Christophe ukinira APR FC yitabye Imana

Yanditswe na Eric Tony Ukurikiyimfura
Kuya 13 Nzeri 2020 saa 06:19
Yasuwe :
0 0

Se wa Bukuru Christophe ukinira APR FC mu kibuga hagati, yitabye Imana kuri iki Cyumweru azize uburwayi.

Rwabarinda Omar ubyara Bukuru, yari atuye i Nyamirambo.

Nk’uko byatangajwe na APR FC ibinyujije ku rubuga rwayo rwa internet, inkuru y’urupfu rwa se wa Bukuru Christophe yemenyekanye mu gitondo cyo kuri iki Cyumweru tariki 13 Nzeri.

APR FC yakomeje igira iti “Uyu mubyeyi Rwabarinda Omar atabarutse afite imyaka 77 akaba yari amaze iminsi arwaye.”

“Ubuyobozi bw’ikipe ya APR FC bukaba bwihanganishije Bukuru Christophe nyuma yo kubura umubyeyi we. “

Rwabarinda Omar wavukiye mu Rwanda muri 1943, yahungiye mu Burundi muri 1960, anahashakira umugore w’Umurundikazi, babyaranye abana batandatu barimo Bukuru Christophe ufite impanga bavukana.

Ubwo uyu mubyeyi yaganiraga na IGIHE muri Gashyantare, yavuze ko umuhungu we yari umwana wirirwaga akinira mu gace bari batuyemo akanga kwiga ndetse yemeza ko ari we wamubujije gukinira u Burundi ahubwo amugira inama ko azakina nibagera mu Rwanda.

Ati “Naramubwiye nti reka umupira uzakine tugeze mu Rwanda nta kibazo hano ntacyo bizagufasha. Nanjye nakinnye umupira ndabizi ko gukinira ibihugu bibiri bihanirwa. Ntabwo nahemukira igihugu rwose. Nahise muzana mu Rwanda akinira Kicukiro.”

“Umugabo natanga ni Kanyankore [Gilbert Yaoundé] byose arabizi kuko ni we wari umutoza we. Twamubwiye ko kuba ari Umunyarwanda agakinira igihugu cy’abandi byaba ari ukuvunikira ubusa.”

Bukuru Christophe uri mu bakinnyi bitwaye neza mu mwaka ushize wa Shampiyona, APR FC yatwayemo igikombe, yahamagawe mu Amavubi yari gukina na Cameroun na Congo Brazzaville muri Gashyantare nubwo atigeze ajyana na bagenzi be.

Uyu mukinnyi wakiniye amakipe ya LLB, Rwamagana City, Mukura Victory Sports na Rayon Sports, yari amaze iminsi mu bihano yafatiwe na APR FC, aho ubuyobozi bwatangaje ko byatewe no kutubahiriza gahunda y’imyitozo abakinnyi bahawe ngo bakorere mu rugo muri ibi bihe bya Coronavirus.

Bukuru Christophe n'umubyeyi we Rwabarinda Omar ubwo bari iwabo mu rugo i Nyamirambo muri Gashyantare uyu mwaka
Rwabarinda Omar yitabye Imana afite imyaka 77

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .