Rutsiro mu turere dutatu tuzabanza kubakirwa ibibuga mu 2021

Yanditswe na Eric Tony Ukurikiyimfura
Kuya 4 Mutarama 2021 saa 09:29
Yasuwe :
0 0

Uturere dutatu turimo aka Rutsiro, Gicumbi na Rusizi tuzubakirwa ibibuga bigezweho muri uyu mwaka wa 2021 binyuze mu mushinga w’Ishyirahamwe ry’Umupira w’Amaguru mu Rwanda (FERWAFA).

FERWAFA irateganya kubaka ibibuga biri hagati ya bine n’umunani by’ubwatsi bw’ubukorano (tapis synthètique) cyangwa bifite ubwatsi bugezweho mu mushinga uzatwara hafi miliyari 2 Frw.

Mu nama y’Inteko Rusange idasanzwe yahuje abanyamuryango b’iri Shyirahamwe ku Cyumweru tariki ya 3 Mutarama muri Lemigo Hotel, babwiwe ko uturere dutatu aritwo tuzubakirwa ibibuga mu 2021.

Umunyamabanga Mukuru wa FERWAFA, Uwayezu François Régis yagize ati “Twagombaga kubona ishusho y’ikibuga kizubakwa, tukamenya amafaranga kizatwara kugira ngo tumenye uko umushinga nyir’izina uzaba uteye. Mu minsi mike igishushanyombonera kizaba cyabonetse kuko gutanga amasoko byararangiye.”

“Hari abayobozi b’amakipe ya Rutsiro FC, Gicumbi FC na Espoir FC bandikiwe, ni hamwe ubuyobozi bwa FERWAFA bwabonye ko haherwa mu kubaka ibibuga, basabwaga kugaragaza uruhare buzagira kugira ngo ibyo bibuga byubakwe.”

Yakomeje avuga ko “Ikigamijee ni ukuzubaka ibibuga byinshi hadakoreshejwe amafaranga yavuye muri FIFA gusa ahubwo n’ingengo y’imari izaturuka mu bafatanyabikorwa b’aya makipe. Ibiganiro bimeze neza. Igihe muri FIFA tuzaba tuboherereje umushinga wuzuye, amafaranga biteguye kuzahita bayatanga.”

Inama y’Inteko Rusange ya FERWAFA yabaye ku wa 5 Gicurasi 2019 i Musanze ni yo yafatiwemo umwanzuro uvuga ko mu bice bitandukanye by’u Rwanda hazubakwa ibibuga 10 bizatwara miliyari 2 Frw.

Aya mafaranga FERWAFA yayashoye muri uyu mushinga mu rwego rwo gushyira mu bikorwa gahunda ya FIFA Forward 2.0 igamije guteza imbere umupira w’amaguru, aho inkunga y’agera kuri miliyoni 2$ (agera hafi kuri miliyari 2 Frw) atangwa n’Ishyirahamwe ry’Umupira w’Amaguru ku Isi, azakoreshwa mu kubaka ibibuga.

Icyo gihe, abanyamuryango ba FERWAFA bari bemeranyijwe ko miliyoni imwe y’amadolari izifashishwa mu kubaka ikibuga kiri ku rwego mpuzamahanga kizajya mu kibanza cyubakwahao hoteli y’iri Shyirahamwe rya ruhago mu gihe itari gukomeza kubakwa.

Iki kibuga cyari kuzajya gikoreshwa n’abana bigira umupira w’amaguru mu Isonga ndetse n’abandi bahabwa amahugurwa atandukanye.

Indi miliyoni imwe y’amadolari ya Amerika yari kwifashishwa mu kubaka ibindi bibuga icyenda bisanzwe (aho biri bigatunganywa bitsindagirwa) mu turere dutandukanye tw’igihugu, ahabarizwa ibigo by’icyitegererezo mu mupira w’amaguru.

Inama y’Inteko Rusange yabaye mu Ukuboza 2019, yafashe umwanzuro uvuga ko ibibuga bigirwa bine bigezweho cyangwa bikaba byaba umunani mu gihe haboneka abandi bafatanyabikorwa babigiramo uruhare, bigashyirwa ahasanzwe hari amakipe ashobora no guteza imbere umupira w’abakiri bato.

Mu ngengo y’imari ya 2021, FERWAFA yateganyije ko amafaranga azubakwamo ibibuga angana na miliyari 1.96 Frw.

Iri Shyirahamwe ryifuza ko mu mafaranga ikibuga kimwe cyatwara, byibuze 40% yaba uruhare rw’umufatanyabikorwa w’ikipe yacyubakiwe (uturere amakipe abarizwamo).

Ikibuga cya Gicumbi FC kiri mu bizubakwa muri uyu mwaka
Ikibuga gikinirwaho na Espoir FC na cyo kizakorwa mu buryo bugezweho
Stade Mukebera yatashywe mu 2014, ikibuga cyayo kizubakwa bundi bushya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .