00:00:00 IGIHE NETWORK KN KINYARWANDA EN ENGLISH FR FRANCAIS

Rayon Sports yongeye gutira Sugira Ernest muri APR FC

Yanditswe na Eric Tony Ukurikiyimfura
Kuya 10 July 2020 saa 08:25
Yasuwe :

Ubuyobozi bwa Rayon Sports bwongeye kwandikira APR FC buyisaba kongera gutizwa rutahizamu Ernest Sugira wasoje amasezerano y’amezi atandatu nk’intizanyo.

Mu mpera z’Ukuboza 2019 nibwo APR FC yatije Sugira Ernest muri Rayon Sports mu gihe cy’amezi atandatu.

Mbere y’uko uyu mukinnyi arekurwa n’ikipe y’Ingabo z’Igihugu, yari yabanje gusinya undi mwaka umwe kuko amasezerano yari afite yari kurangirana n’umwaka w’imikino wa 2019/20.

Mu mezi abiri n’igice yakiniyemo Rayon Sports mbere y’uko imikino ihagarikwa kubera icyorezo cya Coronavirus, Sugira Ernest yatsindiye Rayon Sports ibitego bitatu muri shampiyona na bibiri mu Gikombe cy’Amahoro.

Amakuru IGIHE yamenye ni uko Ubuyobozi bwa APR FC bwabwiye Sugira Ernest ko atazayigarukamo ahubwo yashaka indi kipe akinira mu mwaka utaha w’imikino, ndetse yagerageje kuvugana n’Ubuyobozi bwa Rayon Sports mu gihe ategereje no kureba ko kwerekeza hanze bishoboka.

IGIHE yamenye kandi ko ku wa Kane tariki ya 9 Nyakanga, Rayon Sports yongeye kwandikira APR FC isaba kongera gutizwa Sugira Ernest.

Mu kiganiro uyu mukinnyi aheruka kugirana na IGIHE muri Werurwe, yavuze ko yishimiye uko yakiriwe muri Rayon Sports.

Ati "Banyakiriye neza, ni ibintu byanejeje cyane."

"Ikintu nishimira muri Rayon Sports ni uburyo mbanye neza na bagenzi banjye ndetse n’izindi nzego zose zikubiyemo abayobozi, abafana n’abandi. Ndetse ukongeraho n’uko iyo wabanditsindiye badahwema kukwereka urukundo n’ibyishimo bibarimo."

Sugira yamenyekanye cyane mu 2012 akinira AS Muhanga mbere y’uko ajya muri APR FC hagati ya 2013 na 2014.

Yakiniye AS Kigali hagati ya 2015 na 2016 ndetse na AS Vita Club yo muri Repubulika Iharanira Demokarasi ya Congo.

Muri Nyakanga 2017 nibwo Sugira Ernest yasubiye muri APR FC ariko avunikira mu Ikipe y’Igihugu ‘Amavubi’ nyuma y’ukwezi kumwe. Yamaze hafi umwaka wose adakina, agaruka mu kibuga neza hagati mu mwaka w’imikino wa 2018/19 .

Kutumvikana n’umutoza Adil Mohamed Erradi biri mu byatumye Sugira Ernest atizwa Rayon Sports mu Ukuboza 2019, nyuma yo kumara amezi abiri yaroherejwe gukorera imyitozo mu ikipe y’abato, Intare FC.

Rayon Sports yongeye kwandikira APR FC itira rutahizamu Sugira Ernest
Sugira yishimiye uko yakiriwe muri Rayon Sports ubwo yatangiraga kuyikinira muri Mutarama uyu mwaka
Sugira Ernest yatsindiye Rayon Sports ibitego bitanu mu mikino 10 yayikiniye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .