Ndayizeye w'imyaka 47, watoje Ikipe ya Espoir FC y'i Rusizi, Académie Tchité FC y'iwabo ndetse n'Ikipe y'Igihugu "Intamba mu Rugamba", arifuzwa na Gikundiro ngo abe yayifasha gutwara nibura kimwe ku bikombe bikinirwa mu Rwanda.

Amakuru IGIHE ikesha umwe mu nshuti za hafi za Ndayizeye yemeza ko koko yaganiriye na Gikundiro.

Yagize ati "Yego uyu munsi [ku Cyumweru] mu gitondo bamuhamagaye bagirana ikiganiro, bamusobanurira uburyo ikipe ihagaze ndetse n'uko bifuza gutandukana n'Umutoza [Wade] vuba bishoboka. Gusa nta mwanzuro wafashwe, bamubwiye ko bongera kuvugana."

Rayon Sports yahagaritse Umutoza Mohamed Wade gukoresha imyitozo yo ku Cyumweru nyuma yo gutakaza umukino w'Umunsi wa 16 wa Shampiyona. Umunya-Afurika y'Epfo, Lebitsa Ayabonga usanzwe ari Umutoza wongerera Imbaraga abakinnyi ni we wasigaranye inshingano.

Ku rutonde rwa Shampiyona y'u Burundi, Le Messager ya Ndayizieye Jimmy iri ku mwanya wa gatandatu n'amanota 26 mu mikino 15 aho izigamye ibitego bitandatu, mu gihe Vital'O ari iya mbere n'amanota 36.

Kugeza ubu, ku rutonde rwa Shampiyona, Murera ni iya kane n’amanota 27 irushwa na APR FC ya mbere amanota atandatu mu gihe Ikipe y’Ingabo itarakina umukino w’Umunsi wa 16 yari kwakiramo Marines FC ku wa 14 Mutarama 2024.