00:00:00 IGIHE NETWORK KN KINYARWANDA EN ENGLISH FR FRANCAIS

Rayon Sports yabuze amikoro yo kugarura Kwizera Olivier

Yanditswe na Bukuru JC
Kuya 25 Ukwakira 2021 saa 02:30
Yasuwe :
0 0

Umutoza Mukuru wa Rayon Sports, Masudi Djuma, yemeje ko kuba Kwizera Olivier ataragaruka mu kazi ari uko habuze amikoro yo kumugarura.

Kwizera bivugwa ko afite amasezerana ya Rayon Sports, ariko we atemera, aheruka mu izamu ryayo ubwo yanganyaga na Gasogi United igitego 1-1 mu mukino wabereye mu Bugesera muri Gicurasi 2021.

Kuva ubwo, uyu munyezamu ntiyigeze yongera kugaruka mu kazi ndetse muri Nyakanga, yatangaje ko yasezeye gukina umupira w’amaguru, ariko yisubiraho nyuma y’iminsi 21 ubwo yongeraga guhamagarwa mu Ikipe y’Igihugu ‘Amavubi‘.

Nubwo yaganirijwe kenshi, kugeza ubu Kwizera ntavuga icyo atekereza ku kugaruka mu kazi ka Rayon Sports ndetse ntiyigeze yitabira umuhango wo kwerekana abakinnyi bashya kuri “Rayon Sports Day 2021“ yabaye ku wa 24 Ukwakira 2021.

Masudi Djuma utoza iyi kipe, yahishuye ko kimwe mu byatumye Kwizera Olivier ataragaruka mu kazi ari amikoro.

Ati “Ikibazo cya Kwizera ngira ngo gifitwe n’abayobozi. Kuko ni ikibazo cy’amikoro gusa.“

Uyu mutoza yakomeje avuga ko azakoresha abakinnyi bahari kuko nta yandi mahitamo afite, yongeraho ko Kwizera ari umunyezamu mwiza kandi ufite impano idasanzwe.

Abanyezamu batatu Rayon Sports yerekanye ku Cyumweru ni Bashunga Abouba, Hategekimana Bonheur na Hakizimana Adolphe.

Masudi yavuze ko agifite ikibazo kuri rutahizamu ngenderwaho mu busatirizi, ariko yemeza ko azafatanya na bagenzi be gushakira igisubizo mu bakinnyi bahari.

Rayon Sports izatangira Shampiyona ya 2021/22, yakira Mukura Victory Sports mu mukino uzabera kuri Stade ya Kigali ku wa Gatandatu, tariki ya 30 Ukwakira 2021.

Kutagaruka mu kazi ka Rayon Sports kwa Kwizera Olivier byatewe n'amikoro make

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .