Perezida wa Rayon Sports yasabwe gutumiza inama y’Inteko Rusange mu gihe kitarenze iminsi itanu

Yanditswe na Eric Tony Ukurikiyimfura
Kuya 8 Kanama 2020 saa 12:15
Yasuwe :
0 0

Umuyobozi wa Rayon Sports, Munyakazi Sadate, yasabwe n’abanyamuryango bayo gutumiza inama y’Inteko Rusange mu gihe kitarenze iminsi itanu kugira ngo higwe uburyo hakemurwa ibibazo bivugwa mu ikipe.

Nk’uko bigaragara mu ibaruwa yanditswe mu izina ry’abanyamuryango ba Rayon Sports ku wa 8 Kanama, basabye Perezida wayo gutumiza inama y’Inteko Rusange kugira ngo ibibazo byagarutsweho mu itangazamakuru bishakirwe umuti.

Bati “Nyuma yo kubona ko nta kigeze gikorwa mu gukemura ibyo bibazo ahubwo hakagaragara ibibazo biri mu muryango wa Rayon Sports birimo gutakaza abakinnyi bari bafitiye akamaro ikipe, gucamo ibice abanyamuryango no guheza zimwe muri za Fan Club.”

“Tubandikiye tubasaba gutumiza inama y’Inteko Rusange idasanzwe mu gihe kitarenze iminsi itanu kuva mubonye iyi baruwa kugira ngo hasuzumwe ibibazo biri mu muryago wa Rayon Sports, binafatirwe umwanzuro.”

Muri iyi nama izaba igamije “Kurebera hamwe ibibazo biri mu muryango wa Rayon Sports n’uburyo bwo kubikemura”, abanyamuryango basabye ko hatumirwamo abashinze umuryango ari nabo basinye ku mategeko shingiro yawo, abawinjiyemo bikurikije amategeko n’abanyamuryango b’icyubahiro.

Amakuru IGIHE yamenye ni uko ku wa Gatanu habaye inama yayobowe n’abarimo Paul Muvunyi na Muhirwa Freddy, akaba ari nayo yafatiwemo icyemezo cyo kwandikira Munyakazi Sadate.

Hemejwe ko handikwa ibaruwa isaba gutumiza inama y’Inteko Rusange, Munyakazi Sadate akayishyikirizwa binyuze ku muhesha w’inkiko.

IGIHE yashatse kumenya icyo ubuyobozi bwa Rayon Sports buvuga kuri iyi baruwa, busubiza ko ntayo burabona ariko niba ihari buzagira icyo buyivugaho bitewe n’ibikubiyemo.

Munyakazi Sadate uyobora Rayon Sports, yasabwe gutumiza inama y’Inteko Rusange mu gihe kitarenze iminsi itanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .