Musanze FC yirukanye umutoza Niyongabo wayisezeranyije igikombe

Yanditswe na Eric Tony Ukurikiyimfura
Kuya 28 Ugushyingo 2019 saa 08:54
Yasuwe :
0 0

Ubuyobozi bwa Musanze bwafashe icyemezo cyo gusezerera burundu umutoza wayo, Umurundi Niyongabo Amars ndetse n’uwari umwungirije, Ndikumana Pablo kubera umusaruro muke.

Musanze FC iri ku mwanya wa 12 n’amanota icyenda gusa mu mikino 10 imaze gukina.

Nyuma yo gutsindwa na Heroes FC ibitego 3-2 ku wa Kabiri, Ubuyobozi bwafashe icyemezo cyo gusezerera abari abatoza bayo nk’uko iyi kipe yabyemeje ibinyujije ku rubuga rwa Twitter.

Mu mpera z’ukwezi gushize, Ubuyobozi bwa Musanze Fc bwari bwasabye umutoza gushaka amanota arindwi mu mikino itatu yari afite imbere , atayabona hagafatwa izindi ngamba.

Iyi mikino Musanze FC yahuyemo na Espoir FC (1-2), Sunrise FC (1-1) na Rayon Sports (1-1) yabonetsemo amanota abiri gusa, ariko akomeza kwihanganirwa nyuma yo gutsinda Gicumbi FC.

Gutsindwa na Heroes FC ni yo yabaye imbarutso nyamukuru yo gutuma abatoza bombi bakomoka mu Burundi, basezererwa aho bivugwa ko Seninga Innocent ari mu bashobora gusubira muri iyi kipe yo mu Majyaruguru.

Mbere y’uko umwaka w’imikino utangira, ubwo herekanwaga abakinnyi, Niyongabo yari yijeje Musanze FC ko azayihesha kimwe mu bikombe bikinirwa mu Rwanda, igaserukira igihugu mu mwaka utaha w’imikino, ariko birangiye yirukanwe nyuma y’amezi ane gusa.

Niyongabo Amars yabaye umutoza wa gatanu utandukanye n’ikipe yatozaga kuva Shampiyona y’uyu mwaka w’imikino itangiye, aho akurikiye Mathurin Olivier Ovambe watandukanye na Mukura Victory Sports, Nduwantare Jean Marie Vianney wirukanwe na Gicumbi Fc, Bisengimana Justin watandukanye na Bugesera Fc ndetse na Seninga Innocent uherutse gusezera muri Etincelles FC.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza