MINISPORTS yavuze igihe Stade Amahoro izavugururirwa ikajya yakira abantu ibihumbi 45

Yanditswe na Eric Tony Ukurikiyimfura
Kuya 18 Nzeri 2020 saa 07:36
Yasuwe :
0 0

Minisitiri wa Siporo, Munyangaju Aurore Mimosa, yavuze ko imirimo yo kuvugurura Stade Amahoro izatangira mu mpera z’Ukuboza uyu mwaka, aho izagurwa ikajya yakira abantu ibihumbi 45 ivuye ku bihumbi 25.

Mu ntangiriro z’uyu mwaka nibwo Minisiteri y’Ibikorwa remezo yatangaje ko hari umushinga wo kubaka ibikorwa remezo bya siporo zitandukanye i Remera, hakagurwa Stade Amahoro na Petit Stade ziyongera kuri Kigali Arena yubatswe mu 2019.

Byari biteganyijwe ko uyu mushinga mugari uzatangirana no kwagura Stade Amahoro muri uyu mwaka, ikava ku bushobozi bwo kwakira abantu ibihumbi 25 bakagera ku bihumbi 45 bicaye neza. Hari kandi no kuvugurura Petit Stade ikajya ku rwego rwo kwakira imikino mpuzamahanga, yakira abantu 5000.

Igitekerezo cyo kuvugurura Stade y’Igihugu cyatangajwe bwa mbere n’Ikigo cy’Igihugu cy’Imiturire (RHA) mu 2018 ndetse muri Nzeri 2019, amashyirahamwe y’imikino ayikoreramo, yari yasabwe gushaka ahandi ajya gukorera mu gihe kitarenze iminsi 30.

Kwagura Stade Amahoro byagombaga kujyana kandi no kuvugurura Petit Stade yakira imikino y’amaboko no kubaka ibibuga bikorerwaho izindi siporo zitandukanye mu gace ka Remera, kazagirwa igicumbi cy’imikino.

Mu kiganiro n’abanyamakuru cyabaye kuri uyu wa Gatanu, tariki ya 18 Nzeri 2020, Minisitiri wa Siporo, Munyangaju Aurore Mimosa, yavuze ko imirimo yo kuvugurura Stade Amahoro izatangira mu Ukuboza, igakorerwa hamwe n’iyo kuvugurura Petit Stade.

Ati “Muri gahunda zacu, dufite gahunda yo kwagura Stade Amahoro mbere y’impera z’Ukuboza. Turateganya ko byose byakorwa bitarenze mu mwaka utaha, mu ntangiriro zawo. Ni Stade Amahoro, Petit Stade n’iya Paralympique, ni umushinga umwe. Ntabwo tuzatangira na Stade Amahoro gusa, byose bizakorerwa hamwe.”

Abajijwe ingengo y’imari ishobora kuzakoreshwa muri uyu mushinga, Minisitiri Munyangaju yagize ati “Ntabwo twakubwira ingengo y’imari bizatwara, tuzayimenya nibirangira.”

Stade Amahoro yatangiye kubakwa mu 1983 igatahwa mu 1987, yanenzwe kuba ibangamira itangazamakuru bitewe n’inkingi ziyirimo, camera zifata amashusho y’umukino ntizibashe gufata ibibera mu kibuga byose.

Amakuru IGIHE ifite ni uko muri gahunda za leta ari uko imirimo yo kuvugurura iyi stade yaba yarangiye mu gihe cy’imyaka ibiri nubwo kugeza ubu hataremezwa sosiyete izayubaka, bishoboka ko yaba Summa cyangwa se indi yatoranywa.

Ku bijyanye n’aho amashyirahamwe y’imikino akorera muri Stade Amahoro azimukira mu gihe izaba iri kuvugururwa, Umunyamabanga Uhoraho muri Minisiteri ya Siporo, Shema Maboko Didier, yavuze ko bazagerageza kuyafasha bakayashakira aho akorera.

Ati “Iki ngiki nka Minisports mu mikoranire dufitanye nazo, turi kureba igihe Stade Amahoro izaba igiye kubakwa, ko twazayashakira aho yakorera.”

Muri Mutarama, Minisitiri w’Ibikorwa remezo, Gatete Claver, yatangaje ko muri uyu mushinga mugari wo kubaka igicumbi cy’imikino i Remera, hari ibikorwa byinshi bizavaho kugira ngo haboneke ubutaka bungana na hegitari 35 buzubakwaho icyo gicumbi.

Ati “RBC buriya igiye kwimuka kibe igice cya stade, noneho tukagera kuri Stade Amahoro, Petit Stade, kuri Paralympique, kuri Polisi buriya nayo izavaho, ivuriro, aho bidagadurira hari utubari, ahari MTN, ahari ishuri kugeza haruguru aharimo kubakwa hoteli ya Ferwafa.’’

Ibi bivuze ko guhera ku Kigo cy’Igihugu cy’Ubuzima (RBC), icyicaro cya Polisi i Remera, Centre de Santé ya Remera n’ibikorwa biyikikije, ahari icyicaro cya MTN-Remera, ubutaka buri imbere y’ahazwi nko kwa Rwahama, ishuri rya Remera Catholique byose bizavaho.

Igishushanyo mbonera cy’ibikorwa bizashyirwa kuri ubu butaka cyararangiye, kikaba cyarakozwe hatekerejwe imikino itandukanye Abanyarwanda n’abasura u Rwanda bakenera gukina.

I Remera hazashyirwa ibibuga birindwi bya Tennis, utuyira tw’amagare n’indi mikino guhera ku y’abana n’abakuru. Buri mukino kandi uzaba ufite aho kwitoreza n’aho kwakirira amarushanwa.

Stade Amahoro na yo nimara kuzamurwa hazabamo ibindi byumba byakoreshwa mu yindi mikino ndetse n’ibiro. Hoteli ya Ferwafa izahaguma hajye n’ibiro.

Igishushanyo mbonera giteganya ko ahari RBC, hazashakwa umushoramari akahashyira iguriro rinini ririmo n’ibintu byose bifite aho bihuriye n’imikino.

Stade Amahoro izavugururwa mu mpera z'uyu mwaka, izajye yakira abantu ibihumbi 45
Igice kinini cya Stade Amahoro kizaba gitwikiriye nimara kuvugururwa
Uko Stade Amahoro yubatse ubu
Minisitiri wa Siporo, Munyangaju Aurore Mimosa, yavuze ko imirimo yo kuvugurura Stade Amahoro izatangira mu Ukuboza, igakorerwa hamwe n’iyo kuvugurura Petit Stade
Umunyamabanga Uhoraho muri Minisiteri ya Siporo, Shema Maboko Didier, yavuze ko federasiyo zikorera muri Stade Amahoro zizafashwa kubona aho zikorera mu gihe izaba iri kuvugururwa
Hazavugururwa Petit Stade na Stade y'abafite ubumuga na zo ziri i Remera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .