Ivumburamatsiko: Munyakazi Sadate mu mwaka umwe ku buyobozi bwa Rayon Sports

Yanditswe na Eric Tony Ukurikiyimfura
Kuya 15 Nyakanga 2020 saa 11:04
Yasuwe :
0 0

Ku wa 14 Nyakanga 2019 nibwo Munyakazi Sadate yatorewe kuyobora Rayon Sports. Icyo gihe yari azwi na bake, ariko nyuma y’umwaka umwe gusa yamaze kuba ikimenyabose. Ese ni ibihe bimaze kuranga ubuyobozi bwe?

Mbere gato y’umukino wa Rayon Sports na APR FC warangiye ku gitego 1-0, nibwo Munyakazi yatangiye kugaragara mu bikorwa bimwe na bimwe bya Rayon Sports.

Mbere y’uwo mukino wabaye muri Mata 2019, Munyakazi yemereye abakinnyi kubaha agahimbazamusyi k’ibihumbi 100 Frw kuri buri umwe wari kugaragara ku mukino ndetse bivugwa ko byarangiye atanze miliyoni 2.35 Frw.

Ubwo yinjiraga muri Rayon Sports muri Werurwe, Munyakazi Sadate yahinjiranye umushinga wo kubaka Gikundiro Stadium binyuze mu kigo cye cya MK Sky Vision, aho abafana ba Rayon Sports basabwaga gukoresha ikarita y’iki kigo mu kwishyura ibyo bagura birimo lisansi, hakagira amafaranga yinjira mu ikipe.

Ubuyobozi bwa Rayon Sports bwari buyobowe na Muvunyi Paul wasozaga manda ye, bwamugiriye icyizere ndetse muri Kamena ashingwa kugura abakinnyi b’iyi kipe mu gihe ku wa 14 Nyakanga 2019 aribwo yatorewe kuba Perezida.

Bamwe mu bahoze mu buyobozi bwa Rayon Sports bashinje Muvunyi wayiyoboraga kuba yarakoze amakosa mu nama y’Inteko Rusange yatorewemo Munyakazi Sadate, hagatora abafana (Fan Club) nyamara batari mu banyamuryango bemewe b’ikipe.

Imvugo za Munyakazi mu minsi ye ya mbere nk’Umuyobozi wa Rayon Sports, zatangaga icyizere ndetse zitandukanye n’iz’abandi bose bayoboye iyi kipe kuko yabarushaga gutanga icyerekezo iyi kipe izagenderaho.

Bwari bwo bwa mbere Rayon Sports ikoze gahunda y’uburyo izinjiza amafaranga, kandi yasobanurirwa n’umuntu uwo ariwe wese bikagaragara neza ko bishoboka.

Kuba ari ikipe ifite abafana, Munyakazi yubatse uburyo buzatuma yinjiza amafaranga binyuze mu bakunzi bayo, aho guhora iteka ibategeye amaboko mu nkunga n’ibindi nkabyo.

Paul Muvunyi wayoboraga Rayon Sports amurikira abafana b'iyi kipe ibijyanye n'umushinga wa MK Card wazanywe na Munyakazi Sadate

Munyakazi Sadate ntiyari mushya mu bijyanye na siporo n’imyidagaduro

Munyakazi nubwo izina rye ryamenyekanye mu gihe gito gishize, ntabwo ari umuntu wari uzwi cyane mu buyobozi bw’amakipe kuko akenshi bugaragaramo abantu baba bazwi nk’abifite ku rwego rwo hejuru. Gusa na none uruganda rw’imikino n’imyidagaduro yari arurimo dore ko yigeze kuba mu buyobozi bwa APR Volleyball Club.

Abazi neza Munyakazi Sadate bavuga ko yatangiye gukurikirana cyane ibijyanye n’umupira w’amaguru kera nubwo yatangiye kubigiramo uruhare mu 2005.

Mu muziki nyarwanda azwi nk’umuntu wabaye Umujyanama w’umuhanzi Social Mula.

Uyu mugabo wigeze kuba Umukozi wa Banki y’Abaturage, ubu ni rwiyemezamirimo mu bikorwa by’ubwubatsi no muri kompanyi ye ya MK Sky Vision.

Ni byinshi bitanga icyizere ku buyobozi bwa Sadate muri Rayon Sports

Munyakazi ubwo yinjiraga muri Rayon Sports, yikije cyane ku mikorere iciye mu mucyo, agena ko abakunzi b’iyi kipe bazajya bagaragarizwa uko umutungo w’ikipe ukoreshwa umunsi ku wundi. Kuva icyo gihe nibwo hagiye hatangazwa amafaranga yavuye kuri buri mukino.

Ikindi cyagaragaje itandukaniro mu miyoborere ye n’abandi, ni uko yitaye ku mishinga y’igihe kirekire, kurusha uko ubundi Rayon Sports yabaga ari ikipe ishaka intsinzi y’ejo gusa aho kureba n’ahazaza.

Na mbere yo kwinjira muri Rayon Sports, bivugwa ko Munyakazi yari yaratanze igitekerezo cyo kubaka Gikundiro Stadium yakira abantu ibihumbi 60, igitekerezo amakipe yose yo mu Rwanda atari yarigeze yumva ko gishoboka.

Yazanye imishinga igomba gutuma bigerwaho, aho ikipe yagombaga kwinjiriza amafaranga binyuze ku byaguzwe n’abafana ba Rayon Sporsts binyuze muri MK Card.

Mu mezi ya mbere y’ubuyobozi bwe, yasinye amasezerano y’ubufatanye na sosiyete zirimo Mogas, Ritco, Gas Oil, La Palisse n’izindi. Ibi byagaragazaga gutekereza cyane, ikipe ikaba yagira aho ishingira by’igihe kirekire.

Iyi mikorere kandi yatumye bamwe mu bakinnyi ba Rayon Sports bamugirira icyizere, babona ko ari umuntu uje guhindura ibintu mu buryo butari busanzwe ndetse benshi muri bo bemera gusinyira Rayon Sports badahawe amafaranga yose mu gihe abarimo Rusheshangoga Michel na Nshuti Dominique Savio, banze kwerekeza muri iyi kipe kubera kutizera ibyo babwirwaga n’ubuyobozi.

Munyakazi Sadate yabashije kugumana abakinnyi iyi kipe yaguze mu mpeshyi ishize nyamara bamwe muri bo bari bafite ingingo ziri mu masezerano ko bashobora kugenda igihe icyo ari cyo cyose nka Kimenyi Yves na Rutanga Eric.

Ubwo Rayon Sports yaguraga abakinnyi mu mwaka ushize w’imikino, nta mafaranga menshi yari ifite ndetse abenshi muri bo bahawe ibice, ikipe ibasigaramo asaga miliyoni 50 Frw. Ciza Hussein ni we mukinnyi wenyine waguzwe mu mpeshyi ya 2019 wahawe amafaranga ye yose uko yakabaye.

Mu bibazo byose Rayon Sports imaze guhura nabyo kuva mbere gato y’uko Munyakazi Sadate aba umuyobozi wayo kugeza uyu munsi, uyu mugabo yagaragaje kwitangira ikipe ndetse amakuru IGIHE yamenye ni uko yigeze gufata ideni rya miliyoni 15 Frw kuri umwe mu bo bakorana kugira ngo ibibazo byari biyirimo mu ntagiriro z’uyu mwaka bikemuke ndetse ubu imubereyemo asaga miliyoni 50 Frw.

Munyakazi Sadate amaze umwaka umwe atorewe kuyobora Rayon Sports

Nta byera ngo de!

Mu mwaka wa Munyakazi nk’Umuyobozi wa Rayon Sports, kimwe mu byo abafana b’iyi kipe batishimiye, ni uburyo yitwaye ku isoko ryo kugura no kugurisha abakinnyi kuko ari we wari ubishinzwe nk’uwategurirwaga kuba Umuyobozi w’ikipe.

Benshi mu bari inkingi za mwamba zayo, bagiye mu ikipe y’abakeba, bamwe mu buryo butavugwaho rumwe. Ni mu gihe hari hashize igihe bisa n’ibidashoboka ko umukinnyi yava muri Rayon Sports akajya muri APR FC nyuma y’inkundura yabaye ubwo iyi kipe yambara ubururu n’umweru yamburaga iy’ingabo z’igihugu bamwe mu bakinnyi bayo bakomeye nka Yannick Mukunzi, Rwatubyaye Abdul n’abandi.

Icyo gihe byaciye igikuba ndetse benshi mu bafana ba Rayon Sports batangira kumva ko ikipe yabo nayo ari ndakorwaho, ko ntawayikora mu jisho ngo ayitware umukinnyi.

Nyuma y’iyo ntambara, byakunze kuvugwa ko aya makipe yombi yumvikanye ko atazongera gutwarana abakinnyi ariko mu mwaka ushize byarahindutse aho uhereye k’uwari Kapiteni wa Rayon Sports, Manzi Thierry; myugariro Mutsinzi Ange, Manishimwe Djabel na Niyonzima Olivier Sefu bari inkingi ya mwamba iyi kipe yari yubakiyeho ubwo yajyaga gutwara igikombe cya Shampiyona ya 2018/19, bose bagiye muri APR FC, baza kwiyongeraho na Bukuru Christophe.

Mu byasaga n’igurana, Rayon Sports yaguze abakinnyi batandatu muri 16 birukanwe na APR FC, barimo Kimenyi Yves, Rugwiro Hervé, Nshimiyimana Amran, Nizeyimana Mirafa, Iranzi Jean Claude na Sekamana Maxime.

Ku bakurikiranira hafi umupira w’u Rwanda, Rayon Sports yasaga n’itsinzwe igitego cya mbere na APR FC kuko abayisohotsemo ari bo bari hejuru kurusha abinjiye ndetse nyuma yaho ikaba yaratakaje rutahizamu wari watsinze ibitego byinshi mu 2018/19, Jules Ulimwengu, kubera ikibazo cy’ibyangombwa yagize, aho yari atunze indangamuntu y’u Rwanda kandi ari Umurundi.

Manishimwe Djabel (ibumoso), Manzi Thierry (iburyo), Sefu (inyuma- ibumoso) na Mutsinzi Ange (inyuma- iburyo) berekeje muri APR FC nyamara bari abakinnyi bari bamaze guhesha Rayon Sports igikombe
Nshimiyimana Amran, Nizeyimana Mirafa, Rugwiro na Sekamana Maxime bari mu bakinnyi batandatu Rayon Sports yaguze nyuma yo kwirukanwa na APR FC

Gutira Sugira Ernest muri APR FC mu Ukuboza 2019, byibajijweho niba koko Rayon Sports yaba igihanganye n’ikipe y’ingabo cyangwa ari ukwemera ko iciye bugufi ahubwo amakipe yombi akabana nk’abavandimwe.

Ibintu byarushijeho kujya irudubi kuko muri manda ya Munyakazi, iyi kipe yaburiye intsinzi iburyo n’ibumoso mu marushanwa yose.

Mu marushanwa yose Rayon Sports yakinnye kuva muri Nyakanga, nta gikombe yegukanye ndetse bigaragaza gutsindwa nk’ubuyobozi nubwo biri mu biranga imikino.

Muri CECAFA Kagame Cup yabereye i Kigali muri Nyakanga 2019, Rayon Sports yasezerewe itarenze muri kimwe cya kane, muri CAF Champions League ntiyarenga ijonjora rya mbere, mu Igikombe cy’Agaciro 2019 yatsindiwe ku mukino wa nyuma mu gihe muri Shampiyona yasoreje ku mwanya wa kabiri.

Ku buyobozi bwa Sadate, Rayon Sports yakoresheje abatoza bakuru bagera kuri barindwi uhereye kuri Mathurin Olivier Ovambe, Robertinho, Kayiranga Baptiste (nk’uw’agateganyo), Javier Martinez Espinoza, Kirasa Alain (wasigaranye ikipe by’igihe gito), Cassa Mbungo André na Guy Bukasa uherutse guhabwa akazi.

Rayon Sports iheruka kwishyura Javier Martinez Espinoza ibihumbi 5$ nyuma yo kuregwa muri FIFA mu gihe Cassa Mbungo utarahembwe kuva ahawe ikipe mu mpera za Gashyantare, yishyuza iyi kipe hafi miliyoni 8 Frw. Bivugwa ko mbere yo gusinya mu ntangiriro z’uku kwezi, Guy Bukasa yabanje gusaba guhabwa ibihumbi 8$ y’amezi abiri kuko atizeye ko umushahara we uzajya uzira igihe.

Kuri ibi hiyongeraho kandi ikibazo cy’imodoka y’ikipe kuri ubu yasubijwe mu Akagera Motors nyuma y’uko iyi kipe inaniwe kwishyura asaga miliyoni 36 Frw mu gihe cyumvikanywe ndetse bivugwa ko ishobora gutezwa cyamunara.

Hari abakinnyi ba Rayon Sports baherukaga umushahara muri Mutarama uyu mwaka, Ally Niyonzima avuga ko yahawe igice cy’umushahara w’ukwezi kumwe kuva asinyiye iyi kipe muri Mutarama mu gihe kandi abakozi bose b’iyi kipe batarishyurwa ukwezi kwa Werurwe.

Icyemezo cyo guhagarika imishahara y’abakozi n’abakinnyi guhera muri Mata kubera icyorezo cya Coronavirus, ntikivugwaho rumwe. Bamwe mu bakinnyi bavuga ko batigeze babyemera.

Gutira Sugira Ernest muri APR FC byatumye hibazwa ku bukeba bwo guhanganira ibikombe hagati y'amakipe yombi
Imodoka ya Rayon Sports yongeye gufatirwa, isubira mu Akagera Motors

Kwanga gukina irushanwa ry’Intwari n’imishinga itaratanze umusaruro

Ubuyobozi bwa Rayon Sports bwanenzwe kuba bwarafashe icyemezo cyo kudakina irushanwa ry’Intwari rya 2020 kubera kutumvikana na FERWAFA ku bakinnyi bari kwifashishwa muri iryo rushanwa.

Bijyanye n’amagambo yakurikiye ibi, Umuyobozi wa Rayon Sports yahagaritswe amezi atandatu kubera kuvuga ko "Ubuyobozi bwa FERWAFA nta cyizere bugifitiwe, bugomba kwegura", ariko nyuma Komisiyo y’Ubujurire ikuraho ibi bihano.

Ibi byaje byiyongera kandi ku kuba nubwo mu ntangiriro yashimirwaga na benshi kubera imishinga yatangaga icyizere, Munyakazi ntabwo yigeze asobanurira abakunzi b’iyi kipe icyavuye mu bufatanye yari yaragiranye na sosiyete zitandukanye hagamijwe gushaka amikoro ajya mu ikipe no kubaka Gikundiro Stadium ndetse kugeza ubu uburyo bwa MK Card bwifashishwaga ntibizwi neza umusaruro wabwo.

Agatotsi mu mikoranire na Skol no gucikamo ibice kw’abafana

Ubwo Munyakazi Sadate yatangiraga kuyobora Rayon Sports, umubano wayo na SKOL nk’umuterankunga wayo mukuru, wari mwiza ndetse uru ruganda rwenga ibinyobwa bisembuye n’ibidasembuye, icyo gihe rwagurizaga ikipe amafaranga mu bikorwa bitandukanye.

Nyuma, umubano w’impande zombi wajemo agatotsi no gucengana bituma ikipe ibaho mu buzima bugoye kugeza ubwo bamwe mu bakinnyi bajya mu itangazamakuru bavuga ko babayeho nabi.

Umuyobozi wa Skol, Ivan Wullfaert, yavuze ko mu gihe Rayon Sports ikiyobowe na Munyakazi Sadate, imikoranire y’impande zombi izagorana. Aha ngo yashingiye ku kuba ku buyobozi bwe nta raporo z’imikoreshereze y’amafaranga zahabwaga uru ruganda.

Muri Werurwe, Rayon Sports yishyuzaga SKOL agera kuri miliyoni 34 Frw nyamara ngo uru ruganda rwari ruyisigayemo miliyoni 1 Frw gusa yo kwamamaza ku modoka kuko andi yose (y’umwaka w’imikino wa 2019/20) yari yaratanzwe nk’uko byagaragarijwe abarimo Muvunyi Paul na Dr Rwagacondo Emile Claude ubwo bajyaga muri SKOL muri Gicurasi.

Muri Gicurasi, Rayon Sports yandikiye SKOL iyimenyesha ko bazatandukana ndetse n’ibyari byagezweho binyuze mu biganiro byakozwe n’abagize icyari cyiswe Akanama Ngishwanama, byaheze mu mpapuro.

Bivugwa ko Munyakazi Sadate yasabaga SKOL kongera amafaranga akagera kuri miliyoni 250 Frw zivuye kuri miliyoni 66 Frw ku mwaka, kubera ko hari ibiganiro yagiranye na Bralirwa ndetse mu nshuro zitandukanye, yagiye muri Tanzania kuganira na Azam Group kugira ngo izakorane na Rayon Sports.

Ku rundi ruhande umwuka ntiwabaye mwiza mu bakunzi b’iyi kipe. Kugeza ubu amatsinda y’abafana (Fan Club) 11 arimo March’ Generation, Rocket, Lucky Jersey, Ishema ry’Aba Rayon, Les Bleus du Sud, Nyanza, Gicumbi cy’Aba Rayon Fan Club na Omega zarahagaritswe.

March' Generation yari imwe muri Fan Club zikomeye muri Rayon Sports, yacitsemo ibice bibiri ndetse bamwe mu bari bayigize bashinga indi nshya yiswe Dream Unity

Bivugwa ko yazize kudatanga umusanzu mu ikipe, ariko abayayobora babwiye IGIHE ko babikoreye rimwe n’abandi ahubwo harimo ikibazo cyo kutumvikana n’ubuyobozi bw’ikipe.

Nyuma yo gutererwa icyizere n’Ihuriro ry’amatsinda y’abafana (Fan Base), bivugwa ko Munyakazi yafashe bamwe mu bayigize, bashinga urundi rubuga rwa kabiri rwa Whatsapp, ari narwo rukorerwaho gahunda zose z’abafana muri iyi minsi.

Bamwe mu bakoranye na Munyakazi Sadate bavuga ko “yumva byose yabyikorera” ndetse agira ubwiru. Munyakazi Sadate, ubwe yigeze kuvuga ko hari ibyo yasangaga hanze kandi yarabiganirije abo bakoranaga hagati yabo. Abari bamwungirije bose bareguye ndetse n’Umunyamabanga yareguye asabwa kugaruka.

Nyuma y’uko abahoze bayobora Rayon Sports bashatse kumukura ku buyobozi muri Gicurasi bavuga ko ikipe iri kugana habi ndetse akaba yari yasabwe kwegura ntabikore, Munyakazi Sadate yaregeye Urwego rw’Igihugu rw’Ubugenzacyaha (RIB) ko banyereje hafi miliyari 1 Frw, avuga ko iyi kipe itishyuye imisoro igera kuri miliyoni 239 Frw ndetse yajyaga igura abasifuzi.

Rayon Sports ishobora gutandukana na SKOL nyuma y'imyaka itandatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .