00:00:00 IGIHE NETWORK KN KINYARWANDA EN ENGLISH FR FRANCAIS

Impamvu zatumye umutoza Frank Ouna wa Musanze FC ata akazi akigira i Burayi

Yanditswe na Bukuru JC
Kuya 22 Mutarama 2023 saa 04:19
Yasuwe :

Amezi abaye atatu Musanze FC idaca iryera umutoza wayo, Frank Ouna, wagiye ayibwiye ko agiye kwivuriza iwabo muri Kenya ariko ubu akaba ari mu Budage.

Ku wa 20 Ugushyingo 2022 ni bwo Frank Ouna yandikiye Musanze FC ayimenyesha ko agiye kwivuza, ariko kugeza magingo aya ntarasubira mu kazi.

Iyi kipe yo mu Majyaruguru iherutse kumwandikira imubaza igihe azasubirira i Musanze, ariko ntiyigeze ayisubiza.

Muri Nyakanga 2021 ni bwo Musanze FC yasinyishije umutoza w’Umunya-Kenya Frank Ouna waciye mu makipe y’iwabo nka Sofapaka FC na Gor Mahia nk’umutoza wungirije, muri Wazito United, KCB FC na Mathare United aherukamo nk’umutoza mukuru. Yabaye kandi mu Ikipe y’Igihugu ya Kenya Harambee Stars nk’umutoza wungirije.

Uyu Munya-Kenya yari asimbuye Seninga Innocent wirukaniwe ku kibuga mu mukino Musanze FC yatsindiwemo kuri Stade ya Bugesera na Gasogi United ibitego 4-1 tariki ya 23 Gicurasi 2021.

Umunya-Kenya Frank Ouna yerekwa itangazamakuru nk’umutoza mushya, Abanya-Musanze bari bishimiye kwakira umutoza wubakiye ku mukino usatira cyane ndetse n’ubwugarizi bukorera hamwe.

Inzozi zaje kuba impamo nyuma y’uko mu mwaka we wa mbere, Musanze FC yasoje shampiyona ya 2021/22 iri ku mwanya wa gatandatu n’amanota 40 yanganyaga na Police FC.

Gusa ibi si ko byaje gukomeza, hari imbogamizi Ouna yagendaga ahura na zo zimwe zitewe n’abamukikije, izindi ari we uziteye ubwe.

Ku ikubitiro, Ouna wari uje gushaka ubunararibonye mpuzamahanga mu Rwanda, mu bakinnyi ikipe ya Musanze FC yakinishije mu mwaka w’imikino wa 2021-22 yiguriyemo umwe gusa ari we rutahizamu Victor Ogedo Omondi yakuye iwabo. Uyu mukinnyi yaje afite imvune, ibintu bitashimishije ubuyobozi bwa Musanze FC.

Ntibyaciye intege uyu mutoza, ubuzima bw’i Musanze ntibwigeze bumugora kuko yari ari kumwe na Nshimiyimana Maurice ‘Maso’, umwungiriza we wanamuranze ndetse akemeza Perezida wa Musanze FC uburyo ari umutoza mwiza kuko bari baziranye guhera mu 2009.

Umutoza mukuru wa Musanze FC, Frank Ouna (hagati) na Nshimiyimana Maurice 'Maso' (iburyo) baziranye guhera 2009

Urunturuntu rwatangiye ku mukino w’Umunsi wa 19 wa Shampiyona y’umwaka ushize w’imikino ubwo Espoir FC yari yakiriye ndetse ikanganyiriza igitego 1-1 na Musanze FC kuri Stade ya Rusizi.

Muri uyu mukino, ubuyobozi bwanenze umutoza Ouna kuba yarabuze amahitamo aho mu minota y’inyongera Musanze FC yabonye penaliti yagombaga kuyiha intsinzi ariko umutoza akareba abakinnyi gusa ntatange amabwiriza y’uwayitera, bigatuma myugariro Nyandwi Saddam afata icyemezo cyo kuyitera, akayihusha.

Ibijya gusa n’ibi byabaye mu myitozo yo muri Gicurasi 2022 mu mpera za shampiyona y’umwaka ushize, ubwo abakinnyi babiri ba Musanze FC, Umunya-Nigeria Samson Ilokani Ikechukwu n’Umunyarwanda Murangamirwa Serge barwaniraga mu myitozo.

Nta cyemezo gikomeye cyabafatiwe ako kanya, kuko bahise basohorwa mu myitozo gusa, ubuyobozi butungurwa n’uko umutoza abasabiye kwirukanwa ku mpera ya Shampiyona.

Ubu Ikechukwu akina muri Espoir FC aho amaze kuyitsindira ibitego bine muri shampiyona naho Murangamirwa we yabengutswe n’umutoza Ruremesha Emmanuel yerekeza muri Rwamagana City FC.

Mu mwaka we wa mbere, Musanze FC yarangirije ku mwanya wa gatandatu n’amanota 40 aho yatsinze imikino 10, itsindwa 10, inganya 10.

Uyu ni wo mwanya mwiza ikipe iheruka mu myaka itandatu ishize, kuko yawuherukaga muri shampiyona ya 2016-2017 ubwo yatozwaga na Ruremesha Emmanuel. Icyo gihe yari ifite amanota 45 mu mikino 30.

Nubwo bimeze gutyo ariko, hari ibyemezo uyu mutoza yagiye afata bigahabwa umugisha n’ubuyobozi ndetse bwabonaga ko bikwiye.

Nko ku mukino w’umunsi wa mbere wa shampiyona ya 2022-23, tariki ya 19 Kanama, ubwo APR FC yatsindaga Musanze FC ibitego 2-1, ubuyobozi bwahagaritse umunyezamu Ntalibi Steven usanzwe ari na Kapiteni wungirije wa Musanze FC.

Muri uyu mukino, Musanze FC yagejeje ku munota wa 91 w’umukino inganya na APR FC 1-1 kuri Stade ya Kigali, batsindwa kuri coup-franc ya Ruboneka Jean Bosco yateye umupira ku mutwe wa Rutahizamu Mugunga Yves na we wahise awuboneza mu izamu.

Icya kabiri kijya kwinjira, Umunyezamu Ntalibi wigeze gukinira Ikie y’Ingabo z’Igihugu, umupira yawuhojeje awuganisha ku kirenge cya Rutahizamu Bizimana Yannick na we wahise awushyira mu rushundura adahagaritse.

Icyo gihe Umunyamakuru Mugaragu David wogezaga uyu mukino kuri Magic Sports yagize ati "Ntalibi Steven abakinnyi bagenzi be ntari bubakire."

Ibi umutoza Ouna yabifashe nko kugambanira ikipe, nyuma y’umukino yamusanze mu rwambariro amubwira amagambo akomeye hagati ya bagenzi be, amushinja gukora iri kosa nkana.

Yasabye ubuyobozi guhagarika uyu munyezamu, imikino ine yakurikiyeho yose Musanze FC iyitsinda ikinisha umunyezamu Muhawenayo Gad usanzwe ari uwa kabiri muri iyi kipe. Iyi ni uwo bahuyemo na Marines FC, Espoir FC, Gorilla FC ndetse na Sunrise FC.

Umunyezamu Ntalibi Steven yabwiwe amagambo akomeye n'Umutoza we Frank Ouna nyuma yo gutsindwa na APR FC igitego yita ko yatanze ku bushake

Ibi byakomereje ku mikino yakurikiyeho, aho ku munsi wa cyenda wa shampiyona mu mukino Etincelles FC yakiriyemo ndetse igatsinda Musanze FC ibitego 3-2 kuri Stade Umuganda. Nyuma y’umukino ubwo abakinnyi bari mu modoka bataha, bamwe muri bo bagaragaje ko batishimiye imitoreze y’umutoza Frank Ouna, byanatumye bitotomba bituma batatu muri bo bahagarikwa abo ni Nshimiyimana Imran, Rurihoshi Héritier na Habineza Isiaq.

Ibyari byabaye mu gihe Musanze FC yari ku mwanya wa munani, yari imaze imikino ine yikurikiranya itabona intsinzi nyamara yari yatangiye neza Shampiyona dore ko mu mikino itanu ibanza yari iyifitemo intsinzi enye uretse umukino w’umunsi wa mbere yatsinzwemo na APR FC 2-1.

Ibi byaterwaga ahanini n’ibice byari bimaze kuvuka mu bakinnyi, ahanini byaterwaga n’abatoza bifuzaga kuzamurwa mu nshingano.

Imurora Japhet usanzwe ari Team Manager w’ikipe ndetse akaba afite Licence C ya CAF, yigizagayo umutoza wungirije Nshimiyimana Maurice kuko yateganyaga kwigira Licence B ya CAF muri uyu mwaka wa 2023 hanyuma akamusimbura nk’umutoza wungirije.

Ibi byatumye havuka umwuka mubi mu ikipe, abakinnyi bacikamo ibice bamwe bajya ku ruhande rwa Imurora abandi bajya ku rwa Maso, ntibakomeza kumva umutoza mukuru nk’imwe mu mpamvu yatumye ataha iwabo imburagihe.

Ibi byose uko byakomezaga kuba, ikibazo umutoza Ouna yahuraga na cyo cyose yagituraga Team Manager we Imurora Japhet, ntiyikoze Umunyamabanga mukuru w’ikipe Barakagwira Chantal yashinjaga kudafata icyemezo na kimwe ndetse no kudasobanukirwa umupira.

Uku kudashyigikirwa n’ubuyobozi byatumaga yibona nk’aho ari wenyine ndetse n’ibibazo byerekeranye n’abakinnyi bagomba kugurwa ndetse n’imicungire y’ikipe byose, yabiganiragaho n’abantu babiri gusa mu ikipe ari bo Team Manager ndetse n’umutoza wungirije, Maso.

Ouna yatashye mu gihe umutoza we wungirije Maso yari muri Uganda yigira Licence B ya CAF, ikipe isigarana Umutoza wongera imbaraga abakinnyi, Nyandwi Idrissa ufite Licence C, Harerimana Gilbert w’abanyezamu ndetse na Team Manager, Imurora Japhet ’Drogba’ na we ufie Licence C.

Nyuma yo gusezerera Seninga wabanjirije Frank Ouna muri Gicurasi 2021, Perezida wa Musanze FC, Tuyishimire Placide ‘Trump’, yavuze ko ibyo abatoza b’Abanyarwanda batoza n’abayobozi b’iyi kipe na bo babitoza.

Byabaye impamo ubwo Visi Perezida wayo Rwamuhizi Innocent yatoranywaga na Komite y’ikipe agatoza umukino w’umunsi wa 11 Musanze FC yatsinzemo Rayon Sports ibitego 2-0, kuri Stade Ubworoherane.

Amakuru IGIHE yamenye avuga ko umutoza Frank Ouna ari we wapanze ikipe ndetse akanereka abayisigaranye nk’abatoza amayeri y’umukino yatsinda Rayon Sports. Gusa, Ouna yababajwe cyane no kubona uyu muyobozi yicaye ku ntebe y’abatoza atoza umukino aranawutsinda.

Visi Perezida wa Musanze FC, Rwamuhizi Innocent yatoje umukino Musanze FC yatsinzemo Rayon Sports ibitego 2-0, ibintu byababaje Umutoza mukuru Frank Ouna

Nyuma y’uko Rwamuhizi atoje uyu mukino, Ouna wabonaga ko atangiye kuvangirwa n’abayobozi, nubwo yari akiri iwabo yasabye Maso wari ukiri muri Uganda ko yagategereje abayobozi bagatsindwa imikino bari bakomeje kwivangamo mu mitoreze, ko igihe batangira gutsindwa bazakenera abatoza bakabagarura akaba ari bwo bongera gutoza.

Nyamwanga kumva ntiyanze no kubona! Nyuma yo gusezererwa n’Ubuyobozi amaze gutsindwa na Gasogi United, Maso yabwiye inshuti ze za hafi ko mbere yo gutoza uyu mukino umutoza we mukuru Frank Ouna yari yabanje kumubuza kuwutoza, ariko ntiyamwumvira.

Kuri uyu mukino wabereye kuri Stade Ubworoherane tariki 11 Ukuboza 2022, Gasogi United yatsinze Musanze FC yatozwaga na Maso igitego 1-0 cyinjijwe n’Umunya-Cameroun Maxwell Njoumekou ku munota wa 79. Uyu ni wo wabaye umukino wa nyuma kuri Maso wahise asezererwa n’ubuyobozi bwa Musanze FC bwirengagije ko avuye kwiga.

Nshimiyimana Maurice 'Maso' yagiye gutoza umukino yatsinzwemo na Gasogi United yabanje kubuzwa n'Umutoza we mukuru Frank Ouna abirengaho aba ari wo yirukanirwaho

Mu gihe Maso wari ufite igikundiro i Musanze yasezererwaga, byahuriranye n’uko umutoza Frank Ouna yari ari kwivuza ahawe icyumweru cy’ikiruhuko ngo abaganga bazongere kumurebera uburwayi bw’umutima uko buhagaze, ariko kandi yaniteguragaga kwerekeza ku Mugabane w’u Burayi mu gihugu cy’Ubudage gusanga umuryango we.

Muri uku gutinda kugaruka, yari muri gahunda yo gutega ikipe umutego ngo ikore amakosa imwirukane mu masezerano ye hagati. Ouna wahembwaga miliyoni 1.5 Frw ku kwezi, iyo Musanze FC imwirukana yagombaga kumwishyura amezi ane ahwanye na miliyoni 6 Frw nk’uko amasezerano abivuga. Gusa, iyi kipe yamubereye ibamba iramwihorera kugeza aka kanya.

Ouna kuri ubu uri mu Budage, yamenyesheje Musanze FC ko yamuha ikiruhuko cy’amezi atandatu nk’uko amakuru agera ku IGIHE abihamya, n’ubwo iyi kipe itigeze imusubiza.

Musanze FC na yo yanze kumwirukana yirinda kwishora mu manza ikaba itegereje ikizava mu biganiro bazakomeza kugirana mu gihe ikipe izaba iri gutozwa na Nyandwi Idrissa wongera imbaraga, Team Manager Imurora Japhet n’ubuyobozi buri hafi y’ikipe.

Imurora Japhet, Team Manager wa Musanze FC ufite Licence C ya CAF yigijeyo Umutoza wungirije Nshimiyimana Maurice ngo azamusimbure yungirize Frank Ouna
Umutoza mukuru wa Musanze FC, Frank Ouna ntiyikozaga Umunyamabanga mukuru wa Musanze FC, Barakagwira Chantal yashinjaga kudafata ibyemezo mu ikipe no kudasobanukirwa umupira
Umutoza Frank Ouna yateze Musanze FC imishibuka ngo arebe ko yamwirukana na yo iramwihorera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .