Habyukijwe ikirego rutahizamu Tuyisenge Jacques ashinjwamo gukubita umwana

Yanditswe na Eric Tony Ukurikiyimfura
Kuya 28 Kanama 2020 saa 08:11
Yasuwe :
0 0

Umuryango w’umwana witwa Munyemana Ananias watoraguraga imipira ku kibuga, wasabye ko Tuyisenge Jacques yafatirwa ibihano kuko yamukubise ubwo Police FC yakiniraga yari imaze gutsinda Esperance ibitego 2-1 mu mwaka w’imikino wa 2013/14.

Muri Gashyantare 2014 ubwo hari hashize ibyumweru bibiri umukino ubaye, Ishyirahamwe ry’Umupira w’Amaguru mu Rwanda (FERWAFA) ryahannye Tuyisenge, acibwa amande y’ibihumbi 50 Frw no guhagarikwa imikino ine.

Ubuyobozi bwa Police FC icyo gihe, bwavuze ko ibi bihano bitari bikwiye kuko uyu mukinnyi yari yasabwe gusaba imbabazi akanishyura Munyemana Ananias ibihumbi 100 Frw kandi akaba yarabikoze.

Nk’uko bigaragara mu ibaruwa yanditswe ku wa Kane tariki ya 27 Kanama 2020, Nibishaka Abraham, se wa Munyemana Ananias wakubiswe na Tuyisenge, yongeye gutanga ikirego muri FERWAFA asaba ko cyihutishwa kuko ngo ubwa mbere batengushywe na Nzamwita Vincent De Gaulle wayoboraga FERWAFA.

Ati “Nyuma y’uko FERWAFA yari iyobowe na Nzamwita De Gaulle idutengushye, twategereje igihe azaba atakiri ku buyobozi. Byahuriranye no kuba Tuyisenge yaragiye gukina hanze. Twumvise amakuru ko yagarutse mu Rwanda, ariyo mpamvu dusaba ko FERWAFA mubereye umuyobozi ko yaduha ubutabera.”

Nibishaka yakomeje asaba FERWAFA guhana Tuyisenge mu rwego rwo “Guha isomo abandi bakinnyi bose ko mu mupira atari ngombwa kwitwaza ko ukina mu ikipe ikomeye cyangwa ko FERWAFA ntacyo yagukoraho ngo uhohotere mugenzi wawe.”

Se w’umwana wakubiswe avuga ko kandi babyukije ikirego kubera ko babonye mu bitangazamakuru ko Tuyisenge Jacques yahanwe na Police FC igacibwa amafaranga mu gihe bo nk’umuryango we banamuvuje nyuma yo kuremba, batigeze babimenya.

Tuyisenge Jacques yagarutse mu Rwanda mu ntangiriro z’iki cyumweru nyuma yo gutandukana na Petro Atlético yo muri Angola.

Yavuye mu Rwanda muri Gashyantare 2016, aguzwe ibihumbi 40$ na Gor Mahia FC yo muri Kenya mu gihe mu mpeshyi ya 2019 aribwo yaguzwe na Petro Atlético agera kuri miliyoni 350 Frw.

Uyu mukinnyi usanzwe ari visi kapiteni w’ikipe y’Igihugu ‘Amavubi’, ni umwe mu bifuzwa na APR FC.

Umubyeyi w'umwana Tuyisenge Jacques yakubitiye ku kibuga mu 2014, yongeye gutanga ikirego muri FERWAFA
Mu 2014, Tuyisenge Jacques yahanwe na FERWAFA, acibwa ibihumbi 50 Frw no guhagarikwa imikino ine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .