Umuhango wo guhemba abakinnyi n’abatoza bitwaye neza muri BK Pro League ya 2025/26 wabereye muri Kigali Marriott Hotel ku mugoroba wo kuri iki Cyumweru, tariki ya 12 Nyakanga.

Igihembo nyamakuru cy’imodoka cyahawe umukinnyi w’umwaka, cyegukanywe na Girumugisha Jean Claude usatira izamu anyuze ku ruhande. Uyu mukinnyi w’Umurundi yatsinze ibitego icyenda, atanga imipira irindwi yavuyemo ibindi bitego kuri bagenzi be.

Ni igihembo yari ahataniye na Mbonyumwami Taiba wa Marine FC, Madické Kane bakinana muri Al-Hilal n’abakinnyi babiri ba APR FC ari bo Djibril Ouattara na Byiringiro Jean Gilbert.

Rutahizamu wa APR FC, Djibril Ouattara, ni we wahembwe nk’umukinnyi watsinze ibitego byinshi (18) naho Umunya-Roumania Laurențiu Reghecampf watozaga Al-Hilal SC, atorwa nk'Umutoza w'umwaka.

Umunyezamu w’umwaka yabaye Umunya-Cameroun Désiré James w’Ikipe ya Kiyovu Sports, umukinnyi muto aba Umunya-Liberia Emmanuel Flomo w’Ikipe ya Al-Hilal SC naho igitego cyiza kiba icyo Rutonesha Hesbon yatsinze ubwo Gorilla FC yakinaga na Al-Merrikh.

Abakinnyi 11 bagize ikipe y’umwaka ya BK Pro League 2025/26 ni James Desire (Kiyovu Sports), Byiringiro Jean Gilbert (APR FC), Ernest Luzolo Nsita (Al-Hilal), Mustafa Muhamed Abdelgader Karshoum (Al-Hilal) na Daba Sogoba (Al-Merrikh).

Hari kandi Madické Kane (Al-Hilal), Joseph Sackey (Mukura VS), Jules Razafimaro (Al-Merrikh), Girumugisha Jean Claude (Al-Hilal), Djibril Ouattara (APR FC) na Mbonyumwami Taiba (Marine FC).

Bamwe mu bagize ikipe y'umwaka ya BK Pro League 2025/26
Bamwe mu bagize ikipe y'umwaka ya BK Pro League 2025/26
James Bienvenue Désiré Djayoyang wa Kiyovu Sports ni we wabaye umunyezamu w'umwaka
James Bienvenue Désiré Djayoyang wa Kiyovu Sports ni we wabaye umunyezamu w'umwaka
Emmanuel Flomo yatowe nk'umukinnyi ukiri muto (utarengeje imyaka 21) witwaye neza
Emmanuel Flomo yatowe nk'umukinnyi ukiri muto (utarengeje imyaka 21) witwaye neza
Rutonesha Hesbon ni we wahawe igihembo cy'uwatsinze igitego cyiza
Rutonesha Hesbon ni we wahawe igihembo cy'uwatsinze igitego cyiza
Djibril Ouattara yahembewe kuba yaratsinze ibitego byinshi muri Shampiyona ishize
Djibril Ouattara yahembewe kuba yaratsinze ibitego byinshi muri Shampiyona ishize
Girumugisha Jean Claude yifotozanya igihembo cy'umukinnyi w'umwaka, icyo kuba mu ikipe y'umwaka n'urufunguzo rw'imodoka yatsindiye
Girumugisha Jean Claude yifotozanya igihembo cy'umukinnyi w'umwaka, icyo kuba mu ikipe y'umwaka n'urufunguzo rw'imodoka yatsindiye