Gasogi United yakiriye rutahizamu Iddy Museremu, yakoresheje hafi miliyoni 80 Frw igura abakinnyi (Amafoto)

Yanditswe na Eric Tony Ukurikiyimfura
Kuya 23 Nzeri 2020 saa 07:00
Yasuwe :
0 0

Ku gicamunsi cyo kuri uyu wa Gatatu, ubuyobozi bwa Gasogi United bwamurikiye abafana b’iyi kipe rutahizamu w’Umurundi, Iddy Museremu, watsinze ibitego byinshi (19) muri Shampiyona y’Icyiciro cya Mbere mu Burundi mu mwaka w’imikino wa 2019/20.

Ni rutahizamu Umuyobozi wa Gasogi United, Kakooza Nkuriza Charles (KNC), avuga ko bitezeho kubafasha guhangana n’amakipe nka APR FC ku gikombe cya Shampiyona ndetse yamwise “Intare y’Akanwa Rwabwiga.”

Ati “Ngira ngo abakurikira umupira bose baramuzi ko ari umukinnyi mwiza kuko ibikorwa bye by’imyaka ibiri yakoze birahari, avuye mu ikipe yatwaye igikombe (Le Messeger Ngozi FC). Sinavuga ngo twamuguze amafaranga angana gute ariko agaciro afite ubundi mbona tutanabona amafaranga twamuha ngo bihwane.”

Uyu rutahizamu w’imyaka 23, yavuze ko yahisemo gukinira Gasogi United kuko ari ikipe ashaka ko izamufasha kugera ku ntego ze zo kujya gukina nk’uwabigize umwuga kandi yiteguye kuyiha ibyishimo.

Ati “Abenshi bava mu Burundi baje mu Rwanda gukina muri Rayon Sports kuko ari ikipe nkuru. Ariko njyewe nahisemo Gasogi United kuko nzi intego yayo kandi mbona izamfasha kugera ku ntego zanjye. Niteguye gufatanya na bagenzi banjye kugira ngo tumenyerane, tuzashimishe Perezida nk’uko na we yabikoze yikora mu mufuka kugira ngo atugure.”

Iddy Museremu ari mu bakinnyi 10 Gasogi United yaguze mu mezi ane ashize kuva Shampiyona ya 2019/20 ishyizweho akadomo imburagihe kubera icyorezo cya Coronavirus.

Ku bijyanye n’amafaranga Gasogi United yaba imaze gukoresha igura abakinnyi muri iyi mpeshyi, KNC yavuze ko adafite imibare neza, ariko bigendanye n’abandi bongereye amasezerano, asanga hamaze gukoreshwa ari hejuru y’ibihumbi 80$ (asaga miliyoni 76 Frw).

Ati “Simfite imibare yose aka kanya ariko iyo mbaze neza nkareba amafaranga twatanze ku bakinnyi bashya baje mu ikipe ndetse n’ayo twatanze twongerera abakinnyi amasezerano nka Herron [Berrian Scarla], nsanga atari munsi y’ibihumbi 80$.”

Abajijwe ku ngengo y’imari bateganya gukoresha mu mwaka utaha w’imikino wa 2020/21 nk’ikipe izaba ihataniye igikombe, KNC yavuze ko bitewe n’ibihe bikomeye bya Coronavirus bataremeza niba amafaranga bateganyaga aziyongera cyangwa hakagira ibyo bigomwa kubera ko hiyongereyemo amafaranga azishyurwa ku bipimo bya COVID-19 bizajya bifatwa abakinnyi, ariko bateganya gukoresha miliyoni 210 Frw.

Gasogi United izatozwa na Cassa Mbungo André yungirijwe na Kirasa Alain, yabaye iya cyenda mu mwaka wa mbere ikina Shampiyona y’Icyiciro cya Mbere mu Rwanda mu 2019/20.

Uyu mwaka imaze kugura abakinnyi 10 barimo Iradukunda Bertrand wavuye muri Mukura Victory Sports, Beya Beya Hervé wavuye muri AS Maniema, Nzitonda Eric wavuye muri Gicumbi FC, Bugingo Hakim wakinaga muri Rwamagana City FC.

Yaguze kandi Nkunzimana Sadi wavuye muri Espoir FC, umunyezamu Mfashingabo Didier wa Etoile de l’Est, Umunye-Congo Bola Lobota Emmanuel, Mazimpaka André wakiniraga Rayon Sports, Iddy Museremu wavuye muri Le Messager Ngozi yo mu Burundi na Tuyisenge Hakim ‘Dieme’ wavuye muri Etincelles.

Ubuyobozi bwa Gasogi United buvuga ko bukiri ku isoko mu gihe abatoza babyifuza, aho mu bakinnyi bakenewe cyane harimo ukina inyuma ya ba rutahizamu ahazwi nko kuri nomero 10.

Ku gicamunsi cyo ku wa Gatatu, Umuyobozi wa Gasogi United, KNC yamurikiye abafana b’iyi kipe rutahizamu w’Umurundi, Iddy Museremu, watsinze ibitego byinshi (19) muri Shampiyona y’Icyiciro cya Mbere mu Burundi mu mwaka w’imikino wa 2019/20

Iddy Museremu yatangaje ko yiteguye gufatanya na bagenzi be bagatanga ibyishimo muri Gasogi United
Iddy Museremu yerekanywe na nomero 10, yanditseho amazina ye
Umutoza Cassa Mbungo André yakiriye uyu mukinnyi wakinaga mu Burundi
Mutabaruka Angelbert uyobora abafana ba Gasogi United (Urubambyingwe) afata ifoto na Iddy Museremu
Itangazamakuru ryari ryatumiwe mu kwerekana rutahizamu Iddy Museremu wahawe akabyiniriro k'Intare y'Akanwa Rwabwiga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .