Enzo Fernández wageze muri Chelsea avuye muri SL Benfica mu 2023, icyo gihe yari yaciye agahigo ko kuba umukinnyi uhenze kurusha abandi waguzwe n’ikipe yo mu Bwongereza nyuma yo kugurwa miliyoni 107 z’Amapawundi.

Amafaranga agiye gutangwaho na Manchester City angana n’ayo Alexander Isak yaguzwe na Liverpool FC mu mpeshyi ishize, aho na we yatanzweho miliyoni 125 z’Amapawundi.

Manchester City na Chelsea zari zimaze iminsi 24 zishaka uko zumvikana, ndetse kuri ubu byagezweho ku buryo Enzo Fernandez agiye gukorerwa ibizamini by’ubuzima mbere yo gusinya amasezerano y’igihe kirekire mu ikipe nshya.

Uyu Munya-Argentine asanzwe aziranye n’Umutoza wa Manchester City, Enzo Maresca, kuko bakoranye ubwo Maresca yari Umutoza Mukuru wa Chelsea.

Fernández ntiyakinnye umukino Chelsea yatsinzemo Brighton ibitego 4-3 muri Shampiyona y’u Bwongereza ku Cyumweru, ndetse ntiyagaragaye no mu ntsinzi ya Chelsea imbere Luton muri Carabao Cup.

Ni ku nshuro ya kabiri muri iyi mpeshyi Manchester City yongera guca agahigo ko gutanga amafaranga menshi mu kugura abakinnyi, nyuma yo kugura Elliot Anderson avuye muri Nottingham Forest kuri miliyoni 116 z’Amapawundi.

Enzo Fernández agiye kuba umukinnyi wa kane ugeze muri Premier League muri iyi mpeshyi aguzwe nibura miliyoni 100 z’Amapawundi. Abandi ni Morgan Rogers waguzwe na Chelsea kuri miliyoni 117 z’Amapawundi, Bradley Barcola waguzwe na Liverpool kuri miliyoni 123 Z’Amapawundi ndetse na Elliot Anderson wa Manchester City.

Manchester City yatakaje abakinnyi benshi bo hagati aho Tijjani Reijnders yagiye muri Al-Qadsiah yo muri Arabie Saoudite kuri miliyoni 52 z’Amapawundi, Rodri yerekeza muri FC Barcelone kuri miliyoni 65 z’Amapawundi, Nico Gonzalez ajya muri Newcastle kuri miliyoni 52, mu gihe Bernardo Silva na we yasezeye mbere yo kwerekeza muri Real Madrid nk’umukinnyi wasoje amasezerano.

Iyi kipe kandi yagurishije Savio muri Tottenham kuri miliyoni 75 z’Amapawundi, ndetse ikazabona izindi miliyoni 60 z’Amapawundi mu mpeshyi itaha ubwo Omar Marmoush azahita aba umukinnyi wa Tottenham burundu nyuma y’intizanyo.

Mu kongera imbaraga mu kibuga hagati, Manchester City yanaguze umukinnyi ukiri muto Ayoub Bouaddi w’imyaka 18 avuye muri Lille kuri miliyoni 86 z’Amapawundi, inagura Umunya-Brésil Allan Elias kuri miliyoni 34 z’Amapawundi, ndetse yongeramo Jeremy Monga ukina asatira n’umunyezamu Geronimo Rulli ku mafaranga aciriritse.

Manchester City yemeye gutanga miliyoni 125 z'Amapawundi kuri Enzo Fernández wakiniraga Chelsea