Chelsea igiye kwishyura miliyoni 231£ ku bakinnyi bane, Messi muri Man City na Bergkamp muri Arsenal…Isoko ry’abakinnyi i Burayi

Yanditswe na Eric Tony Ukurikiyimfura
Kuya 25 Kanama 2020 saa 02:28
Yasuwe :
0 0

Chelsea ni imwe mu makipe akomeje kuvugwa cyane ku isoko ry’igura n’igurisha ry’abakinnyi i Burayi, aho ishobora kwishyura miliyoni 231£ ku bakinnyi bane barimo Kai Havertz, Thiago Silva, Malang Sarr na Ben Chilwell.

Iyi kipe yabaye iya kane muri Premier League mu mwaka ushize w’imikino, yamaze kugura Timo Werner wakinaga muri RB Leipzig kuri milyoni 53£ ndetse na Hakim Ziyech wa Ajax kuri miliyoni 38 £.

Kuri ubu, Chelsea iracyavugwa ku isoko, aho byitezwe ko ishobora kwishyura miliyoni 50£ kuri Ben Chilwell wa Leicester City ku masezerano y’imyaka itanu.

Iyi kipe irifuza kandi Kai Havertz wa Bayer Leverkusen ushobora gutangwamo miliyoni 90£ , Thiago Silva watandukanye na Paris Saint-Germain ndetse na Malang Sarr, bose hamwe bagatwara agera kuri miliyoni 231£.

Ben Chilwell ashobora gutangwaho miliyoni 50£ na Chelsea
Kai Havertz ni umwe mu bakinnyi bifuzwa cyane na Chelsea
Thiago Silva yemeye kujya muri Chelsea nyuma yo gusoza amasezerano muri Paris Saint-Germain

Lionel Messi aravugwa muri PSG na Manchester City

Lionel Messi utishimye muri FC Barcelone nubwo aheruka kugirana ibiganiro n’umutoza mushya, Ronald Koeman, biravugwa ko ashobora kwerekeza muri Manchester City kuri ubu ikiri gukora imibare ngo irebe niba yagura uyu rutahizamu w’Umunya-Argentine bisabwa ko atangwaho miliyoni 625£ mu gihe yaba aguzwe.

Manchester City yiteguye kugura uyu mukinnyi mu gihe yaba atandukanye na FC Barcelone.

Lionel Messi w’imyaka 33, yavugwaga kandi muri Paris Saint-Germain ariko nyuma y’umukino wa nyuma wa UEFA Champions League, umutoza Thomas Tuchel yavuze ko “bigoye ko Messi yava muri FC Barcelone.”

Manchester City yiteguye kugura Lionel Messi mu gihe yatandukana na FC Barcelone

Arsenal ishobora gutangaza Gabriel Magalhães

Nyuma yo gukora isuzuma ry’ubuzima, ariko akaba agomba kumara iminsi 14 mu kato nk’umuntu winjiye mu Bwongereza avuye hanze, byitezwe ko Arsenal izatangaza mu gihe cya vuba ko yasinyishije myugariro wa Lille, Gabriel Magalhães.

Iyi kipe iravugwamo kandi ko yifuza kugarura umunyabigwi wayo, Denis Bergkamp, kugira ngo akorane n’umutoza mukuru Mikel Arteta.

Kugeza ubu Arsenal yamaze kugura Willian Borges da Silva wavuye muri Chelsea mu gihe ishobora kugurisha myugariro w’iburyo Héctor Bellerín muri Paris Saint-Germain.

Gabriel Magalhães yamaze kugera mu Bwongereza ndetse ashobora gutangazwa nk'umukinnyi mushya wa Arsenal
Mikel Arteta yasabye ko yakorana n'abarimo Dennis Bergkamp

Manchester United ntirakurayo amaso kuri Sancho

Nubwo Borussia Dortmund ivuga ko Umwongereza Jordan Sancho azayikinira mu mwaka utaha w’imikino, Manchester United ikomeje gutegura uburyo yakongera gusaba kugurishwa uyu mukinnyi uhabwa agaciro ka miliyoni 108£.

Manchetser United itaragura umukinnyi n’umwe muri iyi mpeshyi, iravugwamo rutahizamu ukiri muto wa FC Barcelone, Ansu Fati, watangwaho miliyoni 153£ mbere yo kongera amasezerano azaba akubiyemo ko yatangwaho miliyoni 360£ kugira ngo agurwe.

Manchester United ishobora kugura Ansu Fati nyuma y'uko kugura Jordan Sancho bijemo amananiza

Amasezerano ya Luis Suárez azaseswa imburagihe

Radiyo RAC1 yo muri Espagne, yatangaje ko amasezerano ya rutahizamu w’Umunya-Uruguay, Luis Suárez, muri FC Barcelone, azaseswa imburagihe kuko yabwiwe n’umutoza Ronald Koeman ko atari mu mibare ye.

Suarez w’imyaka 33, yari asigaje umwaka umwe ku masezerano.

Nyuma yo gutsindwa na Bayern Munich ibitego 8-2 muri Champions League, FC Barcelone yirukanye umutoza Quique Sétien na Eric Abidal wari ushinzwe siporo, byitezwe ko izakora n’impinduka zikomeye mu bakinnyi.

Luis Suarez yabwiye n'umutoza Ronald Koeman ko batazakorana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .