Bayern Munich yegukanye igikombe cya Shampiyona y’u Budage ku nshuro ya munani yikurikiranya

Yanditswe na Eric Tony Ukurikiyimfura
Kuya 17 Kamena 2020 saa 07:53
Yasuwe :
0 0

Igitego cyatsinzwe na rutahizamu Robert Lendawoski, cyafashije Bayern Munich gutsinda Werder Bremen 1-0, yegukana igikombe cya shampiyona y’icyiciro cya mbere mu Budage ‘Bundesliga’ ku nshuro ya munani yikurikiranya.

Robert Lewandowski yatsinze iki gitego ku munota wa 43 ku mupira yaherejwe na Jérôme Boateng.

Bayern Munich yatsindaga umukino wa 11 yikurikiranya, yagize amanota 76 mu mikino 32 ndetse ishyiramo ikinyuranyo cy’amanota 10 hagati yayo na Borussia Dortmund isigaranye imikino itatu.

Muri uyu mukino wabereye mu muhezo kubera amabwiriza yo kwirinda ikwirakwira ry’icyorezo cya Coronavirus, Bayern Munich yawusoje ari abakinnyi 10 nyuma y’uko Alphonso Davies yahawe amakarita abiri y’umuhondo yavuyemo ikarita itukura.

Igitego cya Lewandowski cyamufashije kugeza ibitego 31, byinshi byatsinzwe n’umunyamahanga mu mwaka umwe wa shampiyona y’u Budage. Pierre-Emerick Aubameyang kuri ubu ukinira Arsenal, yabitsinze akinira Borussia Dortmund mu mwaka w’imikino wa 2016/17.

Uyu mwaka w’imikino wa 2019/20, Bayern Munich yari yawutangiranye ibihe bikomeye, aho yigeze gutsindwa na Eintracht Frankfurt ibitego 5-1, ikagera ku mwanya wa kane irushwa amanota ane na Borussia Monchengladbach yayoboye shampiyona mu ntangiriro.

Ibi byatumye umutoza Niko Kovač yirukanwa nyuma y’amezi 16, asimburwa Hansi Flick wahawe ikipe by’agateganyo mbere yo gusinya amasezerano nk’umutoza mukuru kugeza muri Mata 2023.

Bayern Munich izakina kandi umukino wa nyuma w’Igikombe cy’Igihugu izahuriramo na Bayer Leverkusen tariki ya 4 Nyakanga i Berlin, mu gihe muri UEFA Champions League izahura na Chelsea mu mukino wa 1/8 wo kwishyura, ni nyuma y’uko yari yatsinze umukino ubanza ku bitego 3-0.

Jérôme Boateng ashimira Robert Lewandowski watsinze igitego cyatandukanyije amakipe yombi
Bayern Munich yegukanye igikombe cya shampiyona ku nshuro ya 30- ikaba iya munani yikurikiranya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .