AS Kigali yinjiye mu rugamba rwo gusinyisha rutahizamu wifuzwa na Rayon Sports

Yanditswe na Eric Tony Ukurikiyimfura
Kuya 20 Ukwakira 2020 saa 09:49
Yasuwe :
0 0

AS Kigali irifuza kugura rutahizamu w’Umunyarwanda Biramahire Abeddy ukinira Buildcon FC yo muri Zambia kugira ngo ayifashe mu busatirizi.

Biramahire Abeddy amaze iminsi ari mu biganiro na Rayon Sports, ariko hari amakuru avuga ko yamaze kumvikana n’ubuyobozi bwa AS Kigali.

Umunyamabanga Mukuru w’iyi kipe ifashwa n’Umujyi wa Kigali, Gasana Francis, yabwiye IGIHE ko bakiri mu biganiro na Biramahire Abeddy ndetse ari umukinnyi bakeneye wabafasha.

Ati “Turi kuganira na we nk’uko ari kuganira n’abandi batandukanye, burya iyo umukinnyi atarasinyishwa aba yajya aho ashaka. Natwe dukeneye rutahizamu ukinana na Orotomal Alex cyangwa akamusimbura. Tubirimo.”

AS Kigali yegereye Biramahire mu gihe Perezida w’inzibacyuho muri Rayon Sports, Murenzi Abdallah, aherutse kwemeza ko nta tike y’indege bamwoherereje.

Ati “Biramahire Abeddy ni umukinnyi turi mu biganiro, impamvu tutamwoherereje itike ni uko yari asanzwe ayifite kuko ni Umunyarwanda utaha iwabo, turahamya neza ko ibiganiro bikomeje kugenda neza, na we ari umukinnyi uzaza kutwunganira.”

Biramahire Abeddy yagiye muri FC Buildcon muri Nyakanga 2019, aho yageze nyuma yo gukina amezi atandatu muri Mukura Victory Sports.

Uyu mukinnyi w’imyaka 22, wamenyekanye cyane akinira Police FC, yageze muri Mukura Victory Sports avuye muri Club Sfaxien yo muri Tunisie, yari yagezemo muri Nzeri 2018.

Birahamire watangiye guhamagarwa mu Amavubi mu 2017, ni umwe mu bakinnyi bari bato mu ikipe y’Igihugu yakinnye CHAN 2018 muri Maroc.

Biramahire Abeddy umaze umwaka umwe muri FC Buildcon arifuzwa muri AS Kigali na Rayon Sports
Biramahire Abeddy yakiniye Mukura Victory Sports mbere yo kwerekeza muri Zambia
Biramahire yanyuze kandi muri Tunisie, aho yari yaguzwe na Club Sfaxien

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .