Iyi kipe itozwa na Mikel Arteta igiye gukina imikino ibiri ikomeye, igena umwaka wayo w’imikino muri Premier League no muri Champions League.

Nyuma yo gutsinda Sporting Lisbon igitego 1-0 mu mukino ubanza wabaye mu cyumweru gishize, Arsenal iri gusatira kugera muri ½ cy’irushanwa rihuza amakipe ya mbere i Burayi ku nshuro ya kabiri yikurikiranya.

Ni mu gihe ku Cyumweru, izasura Manchester City mu mukino uzahuza amakipe abiri ya mbere ahataniye igikombe cya Shampiyona y’u Bwongereza.

Mu kiganiro n’abanyamakuru cyabaye ku wa Kabiri, Arteta yavuze ko “nta bwoba” buhari mbere yo gukina iyi mikino ibiri.

Ati “Turi muri Mata, dufite amahirwe adasanzwe imbere yacu. Reka duhure na yo, dushyiremo buri kimwe.”

Arsenal ntiyitwaye neza mu byumweru bike bishize, itsindwa na Manchester City ku mukino wa nyuma wa Carabao Cup, aho byakurikiwe no gusezererwa na Southampton muri FA Cup.

Mu mpera z’icyumweru gishize, yatsindiwe mu rugo na Bournemouth muri Shampiyona, byongera guha amahirwe Manchester City zihataniye igikombe kuko kuri ubu Arsenal iyirusha amanota atandatu gusa kandi yo ifite ikirarane.

Arteta yavuze ko kuri ubu barajwe ishinga n’umukino wa Champions League, igikombe Arsenal itigeze itwaraho mu mateka yayo.

Ati “Nabwiye abakinnyi nti ‘turi kugerageza gukora ikintu kitigeze gikorwa mu mateka y’ikipe mu myaka 140′. Ibyo bikumvisha uburemere bw’ibyo uri gukora.”

Declan Rice arashidikanywaho nyuma yo gusiba imyitozo yo ku wa Kabiri mu gihe Bukayo Saka na Jurrien Timber na bo hibazwa niba bashobora kubanza mu kibuga.

Ikipe ikomeza hagati ya Arsenal na Lisbon, izahura na Atlético Madrid muri ½, nyuma y’uko yasezereye FC Barcelone ku bitego 3-2.