APR FC ni yo yabonye uburyo bwa mbere bukomeye bwabonetse mu mukino ubwo yahabwaga penaliti ku munota wa munani w’umukino, Nsabimana Eric agusha Imanishimwe Emmanuel mu rubuga rw’amahina.

Rutahizamu Sugira Ernest ni we wateye iyi penaliti mu ruhande, umunyezamu Ndayishimiye Eric ‘Bakame’ araryama, akuramo umupira.

Kuvinikisha Benedata Janvier hakiri kare, byatumye AS Kigali ikora impinduka ku munota wa cyenda, asimburwa na myugariro Rusheshangoga Michel wahuraga na APR FC yakiniye.

Ikipe y’Abanyamujyi yashoboraga gufungura amazamu ubwo Kalisa Rachid yahanaga ikosa Niyonzima Olivier ‘Sefu’ yakoreye kuri Rick Martel Mba, umupira ukomeye yateye ushyirwa muri koruneri na Rwabugiri Umar.

APR FC na yo yakoze impinduka ya mbere ku munota wa 20 ubwo Mutsinzi Ange wagize ikibazo yasimburwaga na Buregeya Prince, gusa na we ntiyasoje umukino kuko yasimbuwe na Bukuru Christophe mbere y’uko gice cya kabiri gitangira, kubera imvune.

Habura iminota irindwi ngo 45 ibanza irangire, APR FC yahushije igitego cyabazwe ubwo Usengimana Danny yasigaga abakinnyi b’inyuma ba AS Kigali, acenga umunyezamu Ndayishimiye Eric Bakame, ateye ishoti rikomeye mu izamu umupira ushyirwa muri koruneri na Rusheshangoga Michel.

Mugunga Yves winjiye mu kibuga asimbuye Sugira Ernest mu gice cya kabiri, yafashije APR FC gusatira AS Kigali ndetse atanga umupira wavuyemo igitego cyatsinzwe na Usengimana Danny ku munota wa 73.

Ikipe y’Ingabo yashoboraga gutsinda ikindi gitego ku buryo bwabonywe na Mugunga, umupira yaherejwe na Manzi Thierry n’umutwe, awufungishije igituza ufatwa na Bakame.

AS Kigali yishyuye igitego yatsinzwe ku munota ubanza muri itandatu y’inyongera, ku mupira w’umuterekano watewe na Rusheshangoga Michel wahanaga ikosa Bukuru Christophe yakoreye kuri Fosso Raymond.

Rwabugiri Umar yananiwe kugarura ishoti ridakanganye ryatewe n’uyu myugariro w’iburyo utishimiye igitego yatsinze ikipe yakuriyemo.

Ni ku nshuro ya mbere APR FC inaniwe gutsinda umukino wayo wa mbere muri Shampiyona nyuma yo gutsindwa na ATRACO FC igitego 1-0 mu 2006.

AS Kigali izagaruka mu kibuga ku wa Kabiri yakirwa na Rayon Sports mu gihe APR FC izaba yakiriwe na Bugesera FC.

Uko amakipe ahura ku munsi wa Mbere wa Shampiyona

Ku wa Gatanu, tariki ya 4 Ukwakira 2019

• AS Kigali 1-1 APR FC

Ku wa Gatandatu, tariki ya 5 Ukwakira 2019

• Gasogi United vs Rayon Sports FC (Stade Amahoro, 15:00)
• Bugesera FC vs Heroes FC (Stade Bugesera, 15:00)
• Etincelles FC vs SC Kiyovu (Stade Umuganda, 15:00)
• Mukura VS vs Espoir FC (Stade Huye, 15:00)

Ku Cyumweru, tariki ya 6 Ukwakira 2019

• Marines Fc vs Gicumbi FC (Stade Umuganda, 15:00)
• AS Muhanga vs Musanze FC (Stade Muhanga, 15:00)
• Police FC vs Sunrise FC (Stade de Kigali, 15:00)

Abakinnyi 11 ba APR FC babanjemo: Sugira, Omborenga, Mutsinzi, Mangwende, Usengimana, Manzi, Lague, Djabel, Umar, Sefu na Mohamed

Abakinnyi ba AS Kigali babanjemo: Ntamuhanga, Ishimwe, Bishira, Farouq, Shaffy, Haruna, Zidane, Benedata, Bakame, Rashid na Martel.

Umusifuzi Uwikunda Samuel afasha Haruna Niyonzima na Manzi Thierry gutombora ibibuga

Omborenga Fitina ahanganiye umupira na Rick Martel Mba

Ndayishimiye Eric 'Bakame' akuramo penaliti yatewe na Sugira Ernest

Mutsinzi Ange ashoboreye umupira mbere yo kugira ikibazo cyatumye ajyanwa kwa muganga

Mutsinzi Ange wagize ikibazo mu minota ya mbere, azibira Ssentongo Farouq

Nshimiyimana Ibrahim winjiye mu kibuga mu gice cya kabiri, ashoreye umupira

Abafana ba APR FC bishimira igitego ikipe yabo yabonye muri uyu mukino

Abafana ba AS Kigali bari babukereye

Umutoza wa AS Kigali Nshimiyimana Eric atanga amabwiriza ku bakinnyi be

Mugunga Yves ahanganiye umupira na Nshimiyimana Ibrahim

Abafana ba Rayon Sports bishimiye kunganya kw'amakipe yombi

Umutoza wa APR FC Adil Mohammed Erradi atanga amabwiriza kuri Imanishimwe Emmanuel ubwo bari bamaze kwishyurwa igitego mu minota ya nyuma

Nshuti Savio na Nsabimana Aimable (bombi ba Police FC) barebaga APR FC bigeze gukinira

Umutoza mukuru wa Rayon Sports, Javier Martinez Espinoza na Kirasa Alain barebaga AS Kigali bazahura ku wa Kabiri

Abakinnyi ba Rayon Sports izakina na Gasogi United ejo ku wa Gatandatu, barebye uyu mukino

Ingabo z'igihugu zari zaje gushyigikira APR FC

Perezida wa Rayon Sports Munyakazi Sadate yarebye uyu mukino

Visi Perezida wa APR FC Maj Gen Mubaraka Muganga aganira na Perezida wa FERWAFA, Sekamana Jean Damascène

Gen Kabarebe James, Umujyanama wa Perezida Kagame mu by'Umutekano akaba n'Umuyobozi w'icyubahiro wa APR FC, yarebye uyu mukino

Ishimwe Christian agerageza gucenga Byiringiro Lague

Nshimiyimana Eric yereka Haruna Niyonzima aho bagomba kwibanda mu mikinire

Omborenga Fitina ahanganiye umupira na Rick Martel Mba

Buregeya Prince wakinnye iminota 25 gusa, atanga umupira

Nsabimana Eric atera umupira wahagaritswe na Mushimiyimana Mohamed

Amafoto: Usanase Anitha