APR FC yahawe uruhushya rwo kwitabira amarushanwa ya CAF

Yanditswe na Eric Tony Ukurikiyimfura
Kuya 19 Ukwakira 2020 saa 10:59
Yasuwe :
0 0

Ishyirahamwe ry’Umupira w’Amaguru mu Rwanda (FERWAFA) ryahaye ikipe ya APR FC icyemezo cyo kwitabira amarushanwa Nyafurika ategurwa na CAF mu mwaka w’imikino wa 2020/21.

Ku wa Mbere w’icyumweru gishize nibwo Komisiyo ishinzwe kugenzura niba amakipe yujuje ibisabwa kugira ngo ahabwe impushya zo kwitabira amarushanwa muri FERWAFA, yasuye iyi kipe y’ingabo.

Nk’uko bigaragara ku cyemezo cyasinywe n’Umunyamabanga Mukuru wa FERWAFA, Uwayezu François Régis, ku wa 14 Ukwakira 2020, APR FC yemerewe kwitabira amarushanwa Nyafurika mu mwaka utaha w’imikino.

Kigira kiti “Turamenyesha ko APR FC, yubahirije ibijyanye na siporo, ibikorwaremezo, imiyoborere, amategeko n’umutungo by’amabwiriza agenga impushya zihabwa amakipe na CAF, bityo ikaba yarahawe uruhushya rwo kwitabira amarushanwa Nyafurika ya CAF, azahuza amakipe mu mwaka w’imikino wa 2020-21.”

APR FC yahawe uru ruhushya nyuma y’uko Komisiyo ikuriwe na Kayiranga Vedaste, yayishimiye ko ifite aho ibarizwa ndetse yujuje ibisabwa .

Ati ”APR FC nk’ikipe ifite aho ibarizwa kandi heza bitandukanye n’andi makipe rimwe na rimwe dusura tukabura aho akorera, ibyo turabibashimiye. Si ubwa mbere tubasuye, n’ubushize twaraje turagenzura kandi dusanga byose byuzuye neza.”

Umunyamategeko wa FERWAFA, Karangwa Jules, yabwiye ubuyobozi bwa APR FC ko “ibisabwa cyane kugeza ubu ni ikibuga cyo kwakiriraho imikino cyemewe ku rwego mpuzamahanga ndetse n’icy’imyitozo ikipe yasuye ishobora gukoreraho imyitozo.”

“Hari kandi ubuzima gatozi bw’ikipe, abakozi b’ingenzi bagize ubunyamabanga bukuru bw’ikipe mu rwego rwo kunoza imikorere nk’Umunyamabanga Mukuru, ushinzwe imari, ushinzwe amakipe y’abana n’ushinzwe umutekano ufasha ikipe mu gihe yakiriye imikino.”

APR FC izahagararira u Rwanda muri CAF Champions League ya 2020/21 nyuma yo kwegukana Shampiyona ya 2019/20 idatsinzwe mu mikino 23 yari imaze gukinwa mbere y’uko amarushanwa ahagarikwa kubera COVID-19.

Ijonjora rya mbere ry’imikino Nyafurika y’umwaka mushya w’imikino riteganyijwe hagati ya tariki ya 20 n’iya 29 Ugushyingo 2020.

APR FC yahawe uruhushya rwo kwitabira amarushanwa ya CAF mu mwaka w'imikino wa 2020/21
Komisiyo ishinzwe kugenzura iyubahirizwa ry'ibisabwa yashimye ko APR FC yujuje ibisabwa
Ubuyobozi bwa APR FC bwakiriye Komisiyo yo muri FERWAFA mu cyumweru gishize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .