Abaharanira impinduka muri Rayon Sports batunguwe n’icyemezo cya RGB cyo kudatumiza Inteko Rusange

Yanditswe na Eric Tony Ukurikiyimfura, Kabera Haruna
Kuya 11 Kanama 2020 saa 10:08
Yasuwe :
0 0

Abashaka ko muri Rayon Sports haba impinduka mu buyobozi bavuga ko batunguwe no kubona amabaruwa abiri yasohotse ku wa Mbere harimo iyanditswe n’Urwego rw’Igihugu rw’Imiyoborere (RGB) ivuga ko iyi kipe itemerewe gutegura inama y’Inteko Rusange.

Ku wa Gatandatu w’icyumweru gishize, bamwe mu banyamuryango 27 ba Rayon Sports bavuga ko bifuza impinduka, bari bandikiye umuyobozi wayo, Munyakazi Sadate, bamusaba gutumiza inama y’Inteko Rusange idasanzwe.

Bari basabye ko iyi nama yari igamije “Kurebera hamwe ibibazo biri mu muryango wa Rayon Sports n’uburyo bwo kubikemura” iba mu gihe kitarenze iminsi itanu kugira ngo hakemurwe ibibazo birimo gutakaza abakinnyi bari bafitiye akamaro ikipe, gucamo ibice abanyamuryango no guheza zimwe muri za Fan Club.

Ku wa Mbere, hagiye hanze ibaruwa Urwego rw’Igihugu rw’Imiyoborere (RGB) rwandikiye Umuyobozi wa Rayon Sports, Munyakazi Sadate, rumusaba kuba ahagaritse inzego zose ziyigize uretse Komite Nyobozi mu gihe hagikorwa inonosora n’ivugurura ry’amategeko shingiro yayo.

Kuri ibyo hiyongera ko kandi nta nama y’Inteko Rusange yemewe gutumizwa muri iyi kipe mu gihe RGB itarasoza isesengura ry’amategeko y’Umuryango Rayon Sports.

Umuvugizi w’abashaka impinduka muri Rayon Sports , Mike Runigababisha, yabwiye IGIHE ko we yabonye harimo ibintu bidasobanutse kubera ko yasanze ibaruwa ya RGB yaranditswe ndetse ikanashyirwaho umukono ku wa Gatanu kandi wari umunsi w’ikiruhuko rusange, ngo yibaza impamvu batategereje umunsi w’akazi wo ku wa Mbere.

Avuga ko aho bibereye urujijo ari uko umunsi iyo baruwa ya RGB yandikiwe ari nabwo abashaka impinduka bakoze inama yafatiwemo umwanzuro wo gusaba Perezida wa Rayon Sports gutumiza inama y’inteko rusange y’abanyamuryango b’iyi kipe.

Ati “Twe n’ubu ntabwo turi kubona ibyo aribyo kuko harimo ibintu bidasobanutse, ni gute wavuga ko igihe twakoraga inama yo gusaba Sadate gutumiza inama rusange ari nabwo handitswe iriya baruwa ya RGB kandi hari n’umunsi w’ikiruhuko? Ese kuki niba barahisemo kuyandika icyo gihe bahisemo kuyisohora uyu munsi ari nabwo hasohotse iyo Perezida Sadate yanditse?”

“Twe turabona harimo byinshi bidasobanutse nko kuba RGB yarasabye Sadate na komite ye kuvugururura amategeko agenga umuryango wa Rayon Sports bagahabwa ukwezi nyuma bakaza kongerwa igihe cyingana n’ukwezi kandi babonako iminsi yo gutangira kwa shampiyona yegereje.”

Runigababisha yakomeje agira ati “Twabishyikirije abanyamategeko bacu barabikurikirana buriya umwanzuro uzavamo nawo tuzawubamenyesha.”

RGB ivuga ko Komite Nyobozi ya Rayon Sports ikomeza gucunga ikipe gusa kuko badashobora kwivanga mu mikorere yayo.

Umuvugizi w'abashaka impinduka muri Rayon Sports, Runigababisha Martin Mike, avuga ko batunguwe no kubona ibaruwa yanditswe na RGB isaba ko hadatumizwa inama y'Inteko Rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .