Bwa mbere ikigendajuru cya NASA cyakuye utuvungukira ku ibuye rya rutura mu isanzure

Yanditswe na IGIHE
Kuya 21 Ukwakira 2020 saa 01:15
Yasuwe :
0 0

Ikigendajuru kiri mu butumwa bwiswe Osiris-Rex bw’ikigo cya Amerika gishinzwe iby’isanzure, NASA, cyabashije gukora ku ibuye rinini rizwi nka ’astéroïde’ mu isanzure, hagamijwe kuvanaho ibice bito bizifashishwa mu bushakashatsi.

Amakuru yaturutse muri kilometero miliyoni 321 uvuye ku isi, aho icyo kigendajuru cyiswe OSIRIS-REx (Origins, Spectral Interpretation, Resource Identification, Security, Regolith Explorer) giherereye, yahamije ko cyabashije kurambura ukuboko kwacyo gifata ku ibuye ringana na metero 500, rizwi nka Bennu.

Bitewe n’uko Bennu ari ibuye rifatwa ko rimaze igihe kirekire mu isanzure kuko ryabayeho mu myaka miliyari nyinshi ishize, abashakashatsi bakeka ko ibimenyetso byariturukaho bishobora gutanga amakuru y’uburyo ku Isi habaye ubuzima, n’inkomoko y’imibumbe irimo Izuba, kuva mu myaka miliyari 4,5 ishize.

Nubwo igikorwa cyo gukora kuri iryo buye cyagenze neza, biracyasaba gutegereza nibura icyumweru kimwe kugira ngo abakurikirana OSIRIS-Rex bemeze niba hari utuntu yabashije kuvungura kuri iryo buye, mu gikorwa cyabaye kuri uyu wa Kabiri. Intego yari ukuvanaho nibura garama 60, byanashoboka zikarenga.

Biteganyijwe ko mu gihe haba hafashwe ingano ikwiye, iki kigendajuru kizahabwa amabwiriza yo gutangira kugaruka ku Isi muri Werurwe 2021, kikazahagera mu 2023. Bitabaye ibyo, abayoboye ubwo butumwa bazahita bategurira Osiris-Rex urundi rugendo guhera muri Mutarama.

Umuyobozi wa NASA, Jim Bridenstine, yavuze ko ari intambwe ikomeye igezweho mu kurushaho kwagura ubumenyi, no kurenga ku mbogamizi zagiye zibaho.

Yakomeje ati "Uru rwego, amashuri n’abafatanyabikorwa mpuzamahanga batumye bishoboka ko twagira mu biganza byacu ikimanyu cy’umwe mu mibumbe igaragiye izuba.”

Osisris-Rex yafashe amashusho menshi, ariko ntiyabasha guhita iyohereza ku Isi, akazajya ahabona mu minsi mike iri imbere.

Ubwo Osiris-Rex yasatiraga ibuye rya Bennu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .